1. Որ սիրէ զխրատ` սիրէ զիմաստութիւն. իսկ որ ատեայ զյանդիմանութիւն` անմիտ է:
2. Լաւ է որ գտանէ շնորհս ի Տեառնէ. իսկ այր անաւրէն կարկեսցի:
3. Ոչ յաջողեսցի մարդոյ յանաւրէնութենէ. արմատք արդարոց ոչ հատցին:
4. Կին ժրագլուխ` պսակ է առն իւրոյ: որպէս որդն` փայտի վնասակար է, նոյնպէս կորուսանէ զայր կին չարագործ:
5. Խորհուրդք արդարոց իրաւունք: առաջնորդք են ամպարիշտք նենգութեանց:
6. Բերան ամպարշտաց նենգաւորք: բերան ուղղոց փրկեսցէ զնոսա:
7. Յոր կողմ եւ դարձցի ամպարիշտն` եղծանի. տունք արդարոց յերկարեսցին:
8. Բերան իմաստնոյ գովի ի մարդկանէ. իսկ խաւթասիրտն արհամարհեսցի:
9. Լաւ է մարդոյ խոնարհութեամբ ծառայել անձին, քան անձին շուք եդեալ` եւ հաց մուրանայցէ:
10. Արդար ողորմի անասնոյ իւրում: աղիք ամպարշտաց անողորմ են:
11. Որ գործէ զերկիր իւր` յագեսցի հացիւ. իսկ որ զհետ երթան զնանրութեան` պակասամիտք են: Որ ախորժէ զգինեաց դեգերանս, թողցէ ի բնակութիւն իւր զանարգանս:
12. Ցանկութիւնք ամպարշտաց` չար են: արմատք բարեպաշտաց` հաստատունք են:
13. Վասն վնասու շրթանց անկանի յորոգայթ մեղաւորն` եւ արդարն զերծանի ի նմանէ: Քաղցրահայեացն գթութիւն գտցէ. որ պատահէ ի դրունս` նեղէ զոգիս:
14. Ի պտղոյ բերանոյ առն` լցցի անձն իւր բարութեամբ. հատուցումն շրթանց իւրոց հատուսցի նմա:
15. Ճանապարհք անմտաց` ուղիղ թուին առաջի նոցա: Ունկնդիր լինի խրատու իմաստունն.
16. իսկ անմիտն առ աւրին յայտնէ զբարկութիւն իւր: Թաքուցանէ զանարգանս իւր այր խորագէտ:
17. եւ զյայտ հաւատս պատմէ արդար: իսկ վկայ անաւրինաց նենգաւոր է:
18. Են` որ բանիւք իւրեանց խոցեն որպէս սրով. բայց լեզուք իմաստնոց բժշկեն:
19. Շրթունք ճշմարիտք հաստատեն զվկայութիւն: վկայ վաղվաղուկ` ունի լեզու անիրաւ:
20. Նենգութիւն կայ ի սրտի չարանիւթի: իսկ որ կամին զխաղաղութիւն` ուրախ լիցին:
21. Ոչ է հաճոյ արդարոյ` եւ ոչ մի ինչ անիրաւ: իսկ ամպարիշտք լցցին չարութեամբ:
22. Պիղծ են առաջի Տեառն շրթունք սուտք. իսկ որ առնէ զհաւատս ընդունելի է նմա:
23. Այր իմաստուն` աթոռ հանճարոյ. սիրտ անզգամաց պատահեսցէ նզովից:
24. Ձեռն ընտրելոց դիւրաւ յաղթեսցէ. նենգաւորք մատնեսցին ի յափշտակութիւն:
25. Բան ահեղ խռովեցուցանէ զսիրտ առն արդարոյ: աւետիք բարեաց` ուրախ առնեն զնա: Արդարն իրաւախոհ սիրէ զանձն. խորհուրդք ամպարշտաց մեղմեխք են: Զմեղաւորս հալածեն չարիք.
26. արդարոց հասցեն բարութիւնք: Ճանապարհք ամպարշտաց մոլորեցուսցէ զնոսա:
27. ոչ պատահեսցէ որս նենգաւորի: Ստացուածք պատուական է այր սուրբ եւ առատ:
28. Ի ճանապարհս արդարութեան կեանք. ճանապարհք ոխակալաց մահ:
Հաղորդում կայքում սխալի վերաբերյալ
Տվյալ հատվածում առկա է սխալ: