Գլուխ 29

   
1. Որ առնէ զողորմութիւն՝ փոխ տայ ընկերի, եւ որ սփռէ ձեռամբ՝ պահէ զպատուիրանս։

4. Բազումք են որ զփոխն իբրեւ զգիւտ համարեցան, եւ ջան մեծ հասուցին փոխատուաց իւրեանց։

5. Յառնուլն համբուրեն զձեռս, եւ յայլոյ իրաց զիւր ձայնն յեղուկս արկանէ,

6. եւ ի ժամանակի հատուցմանն յապաղէ զժամանակն՝ եւ բանս տայ ձանձրալիս.

7. եւ եթէ կարի տագնապիցէ՝ զկէսն թէ վճարէ, եւ նա ի միտս համարի եթէ գիւտս գտի։

9. զանէծս եւ բամբասանս արկանէ ի վերայ նորա.

8. եւ ստանայ զնա իւր թշնամի տարապարտուց,

9. եւ փոխանակ մեծարանաց անարգանս։

12. Յաղագս պատուիրանին աւգնական լեր աղքատի, եւ յողորմութենէ մի ունայն զնա արձակեր։

13. Կորո զարծաթ վասն եղբաւր եւ բարեկամի, եւ մի ժանգակեր լիցի ընդ կորուստ վիմաւ։

14. Զգանձս տուր չքաւորաց ըստ պատուիրանի,

17. եւ պաշտպան լիցի քեզ յերեսաց թշնամւոյն։

19. Այր բարերար երաշխաւոր լիցի բարեկամի.

20. եւ զշնորհ երաշխաւորութեան նորա մի մոռանար, զի նա ետ զանձն փոխանակ քո։

24. Երաշխաւորութիւն զբազումս կորոյս՝ եւ եհան ի բարւոյ.

25. եւ մոլորեցոյց զնոսա յազգ աւտար։

26. Յերաշխաւորութիւն մեղաւորի մի անկցիս, եւ չարայաւժարն մտցէ ի դատաստան նորա։

28. Սկիսբն կենաց մարդկան՝ ջուր, հուր, հաց, եւ հանդերձ, եւ տուն որ ծածկէ զանարգանս։

29 Լաւ են կեանք աղքատին ընդ յարկաւ փայտից իւրոց, քան զսրահս մեծամեծս յաւտար սեղանոյ։

30. Զմեծն եւ զփոքրն յականէ մի փորձեր։

31. Կեանք չար է փոխել տանէ ի տուն, եւ ուր պանդխտեսցիս՝ ոչ գտցես համարձակութիւն.

32. թէպէտ ջանաս եւ վաստակես՝ անաւգուտ է, եւ ի վերայ այսր ամենայնի չար բանս լսես,

34. եթէ. եկ ել ի տանէ այտի. պարապեցո զտունդ յորում ես, զի եղբայր սիրելի եւ բարեկամ եկեալ է։

35. այս ծանր է մարդոյ լսել՝ որոյ միտք իւր առ իւր է. զի պախարակեաց զնա կենդանւոյն, եւ զտառապանաւք կեանս նորա մատն արար բազմաց։