Գլուխ 3

   
1. Ինձ Հաւրս լուարուք որդեակք, եւ զայս արասջիք զի ապրեսջիք:

2. Զի Տէր փառաւորեաց զհայր ի վերայ որդւոյ, եւ զիրաւունս հաւր հաստատեաց յորդիս:

3. Որ պատուէ զհայր` քաւէ զմեղս, եւ անձին իւրում գանձէ գանձս:

4. Փառաւոր առնէ զմայր իւր`

5. որ պատուէ զնա, եւ ուրախ լիցի յորդիս իւր:

6. Մեծարեա դու զհայր քո,

9. զի ծաղկեսցէ ի վերայ քո աւրհնութիւն նորա:

10. Աւրհնութիւն Հաւր հաստատէ զտունս որդւոյ` եւ անէծք մաւր խախտեն ի հիմանէ:

11. Որդեակ` մի մեծարիր ի վերայ հաւր անարգանաց, զի չէ քեզ փառք ի վերայ անարգանաց նորա:

13. Զի փառք մարդոյ ի վերայ մեծարանաց հաւր իւրոյ. եւ նախատինք որդւոյ` անարգանք մաւր:

14. Որդեակ` զաւրավիգն լեր ծերութեան հաւր քո, եւ մի տրտմեցուցաներ զնա ի կեանս իւր:

18. Հայհոյիչ է` որ թողու զհայր, եւ անիծեալ է ի Տեառնէ` որ ցասուցանէ զմայր:

19. Որդեակ իմ, զկեանս քո հեզութեամբ անցո, եւ ընդունելի մարդոյ սիրելի լիցիս:

20. Որչափ մեծ իցես` խոնարհ կալջիր զանձն քո, զի առաջի Տեառն գտցես շնորհս:

21. Մեծ է զաւրութիւն Տեառն` եւ փառաւորեսցի ի խոնարհաց իւրոց:

22. Որդեակ իմ` որ մեծ է քան զքեզ, զայն մի քններ. այլ որ ինչ հրամայեցաւ քեզ` զայն խորհեաց:

24. Որ ինչ աւելին է քան զպէտս քո` զայն մի զններ.

26. եւ մի մոլորիցիս կարծեաւք, զի զբազում հանճարեղաց խորհուրդս կարծաւղ միտք գայթակղեցուցին:

27. Որ սիրէ զչար` ի նմին սատակեսցի:

29. Սիրտ խիստ ծանրասցի ցաւաւք:

30. Չիք ինչ բժշկութիւն տանջանաց ամբարտաւանին, զի զարմատ դառնութեան տնկեաց յանձն իւր:

31. Սիրտ իմաստնոյ խորհեսցի յառակս. եւ ունկն լսելեաց ցանկասցի իմաստութեան:

33. Զվառեալ հուր` ջուր շիջուցանէ, եւ զմեղս բազումս քաւեն ողորմութիւնք.

34. եւ ի ժամանակի կործանման նորա գտցէ ձեռնկալութիւն: