1․ Նայեցարուք երկինք եւ խաւսեցայց, եւ լուիցէ երկիր զպատգամս բերանւոյ իմոյ:
2․ ակնկալեսցի իբրեւ զանձրեւ բարբառ իմ. իջցեն որպէս զցաւղ պատգամք իմ: որպէս զանձրեւ ի վերայ սիզւոյ, եւ իբրեւ
զտեղատարափ ի վերայ խոտոյ:
3․ զի զանուն Տեառն կարդասցուք. եւ տուք մեծութիւն տեառն Աստուծոյ մերոյ:
4․ Աստուած որոյ ճշմարիտ են գործք նորա. եւ ամենայն ճանապարհք նորա իրաւունք: Աստուած հաւատարիմ է, եւ ոչ գոյ ի նմա անիրաւութիւն. արդար եւ անարատ է Տէր:
5․ մեղան` եւ ոչ նմա որդիքն արատոյ, ազգ թիւր եւ խոտորեալ:
6․ Զա՞յդ Տեառն հատուցանէք այդպէս, ժողովուրդ յիմար` եւ ոչ իմաստուն: ո՞չ նա է հայր քո որ ստացաւ զքեզ, արար զքեզ` եւ հաստատեաց զքեզ:
7․ Յուշ լիցին քեզ աւուրքն յաւիտենից. իմացարուք զամսն ազգաց յազգս: հարց ցհարս քո` եւ պատմեսցեն քեզ. եւ ցծերս քո` եւ ասասցեն քեզ:
8․ Յորժամ բաժանեաց բարձրեալն զազգս ամենայն. որպէս սփռեաց զորդիսն Ադամայ: Կացոյց սահմանս հեթանոսաց ըստ թուոյ որդւոցն Աստուծոյ:
9․ Եղեւ բաժին Տեառն ժողովուրդ իւր Յակովբ, եւ վիճակ ժառանգութեան իւրոյ Իսրայէլ:
10․ Բաւական եղեւ նմա յանապատի, ի ծարաւ տաւթւոյ յանջրդի պաշտեաց զնա: խրատեաց զնա եւ պահեաց զնա իբրեւ զբիբ ական.
11․ իբրեւ զարծուի ի ծածկել զբոյն իւր, եւ ի ձագս իւր գթացաւ: տարածեալ զթեւս իւր ընկալաւ զնոսա. եւ բարձեալ զնոսա ի վերայ միջնողաց իւրոց:
12․ Տէր միայն ածեր զնոսա, եւ ոչ գոյր ընդ նոսա աստուածս աւտարս:
13․ եհան զնոսա ի զաւրութիւնս երկրի. կերակրեաց զնոսա արդեամբք անդաստանաց: դիեցոյց մեղր ի վիմէ, եւ եւղ յապառաժ վիմէ:
14․ Կոգի կովուց եւ կաթն մաքեաց, հանդերձ ճարպով գառանց խոյւոց որդւոց եւ ցլուց եւ նոխազանց: ընդ ճարպւոյ երիկամանց ցորենւոյ, եւ զարիւն խաղողոյ ըմպէին գինի:
15․ Եկեր Յակովբ` եւ յագեցաւ, յուրացաւ եւ անգոշեաց սիրելին: գիրացաւ եւ ստուարացաւ լայնացաւ, էթող զԱստուած
զարարիչ իւր. եւ ապստամբեաց յԱստուծոյ փրկչէ իւրմէ:
16․ Բարկացուցին զիս աւտարոտիւք, եւ գարշելեաւք իւրեանց դառնացուցին զիս:
17․ զոհեցին դիւաց եւ ոչ Աստուծոյ. դիցն` զորս ոչ գիտէին, որք եւ առժամայնք եկեալ, զորս ոչ գիտէին հարք նոցա:
18․ Թողեր զԱստուած` որ ծնաւ զքեզ, մոռացար զԱստուած որ կերակրեաց զքեզ:
19․ ետես Տէր` եւ նախանձեցաւ, եւ սրտմտեցաւ վասն բարկութեան ուստերաց եւ դստերաց նոցա.
20․ եւ ասաց. Դարձուցից զերեսս իմ ի նոցանէ, եւ ցուցից նոցա զինչ լինելոց իցէ ի վախճանի աւուրց: զի ազգ թիւր են, որդիք` յորս ոչ գոյն հաւատք:
21․ Նախանձեցուցին զիս չաստուածովք, եւ բարկացուցին զիս կռաւք իւրեանց: եւ ես նախանձեցուցից զնոսա չազգաւ, եւ ազգամբ անմտաւ զկծեցուցից զնոսա:
22․ Զի հուր բորբոքեալ է ի բարկութենէ իմմէ. այրեսցէ մինչ ի դժոխս ներքինս: կերիցէ զերկիր եւ զարմտիս նորա. բորբոքեսցէ զհիմունս լերանց:
23․ Կուտեցից ի նոսա զչարիս եւ զնետս իմ սպառեցից ի նոսա:
24․ մաշեալք սովով եւ կերակրովք թռչնոց. լարս առանց բժշկութեան, եւ ժանիս գազանաց
առաքեցից ի նոսա, սրտմտութեամբ քարշել զնոսա ընդ երկիր:
25․ Արտաքուստ անզաւակեսցէ զնոսա սուր, եւ ի շտեմարանաց երկիւղ: զերիտասարդս հանդերձ կուսիւն. եւ ստնդիաց հանդերձ հաստատելով ծերովն:
26․ Ասացի բա ցրեցից զնոսա. եւ դադարեցից ի մարդկանէ զյիշատակս նոցա:
27․ թէ ոչ վասն բարկութեան թշնամեաց, զի մի երկայնակեացք լինիցին. զի մի բարձրասցին հակառակորդքն, եւ ասիցեն. թէ Ձեռն ի մեր բարձր` եւ ոչ Տէր արար զայս ամենայն:
28․ Զի ազգ խորհրդակորոյս է. եւ ոչ գոյ ի նոսա իմաստութիւն.
29․ եւ ոչ խորհեցան ի միտ առնուլ զայս: ընկալցին յապա ժամանակս:
30․ Զիա՞րդ հալածիցէ մի զհազարս, եւ երկու շարժիցեն զբիւրս. եթէ ոչ Աստուած վաճառեաց զնոսա եւ Տէր մատնեաց
զնոսա:
31․ Զի ոչ էին իբրեւ զԱստուած մեր աստուածք նոցա. եւ թշնամիք մեր վատախորհուրդք:
32․ զի յորթւոյ Սոդոմացւոց է որթ նոցա, եւ ուռ նոցա ի Գոմրոյ: Խաղող նոցա խաղող ղեղի, եւ ողկոյզ նոցա
դառնութիւն:
33․ սրտմտութիւն վիշապաց գինի նոցա. եւ սրտմտութիւն իժից առանց բժշկութեան:
34․ Ո՞չ ապաքէն այս ամենայն ժողովեալ էր առ իս, եւ կնքեալ կայ ի գանձի իմում:
35․ յաւուր վրիժուց հատուցից, ի ժամանակի յորժամ սխալեսցէ ոտն նոցա. զի մերձ է աւր կորստեան նոցա, եւ հասեալ պատրաստ կայ ձեզ:
36․ Զի դատեսցի Տէր զժողովուրդ իւր. եւ ի ծառայս իւր մխիթարի: զի ետես զնոսա լքեալս լուծեալս մատնեալս ի գերութիւնս:
37․ Եւ ասէ Տէր. Ո՞ւր են աստուածք նոցա, յորս յուսացեալ էին ի նոսա.
38․ զորոց ճարպ զոհից նոցա ուտէիք, եւ ըմպէիք զգինի նուիրաց նոցա. յարիցեն աւգնեսցեն, եւ եղիցի ձեր թիկունք:
39․ Տեսէք տեսէք զի ես եմ Աստուած, եւ չիք այլ ոք բայց յինէն: ես սպանանեմ եւ ես կեցուցանեմ, հարկանեմ եւ ես բժշկեմ. եւ ոչ ոք իցէ որ հանիցէ ի ձեռաց իմոց:
40․ Զի ամբարձից յերկինս զձեռս իմ, երդուա յաջ իմ, եւ ասացի. Կենդանի եմ ես յաւիտեան:
41․ սրեցից իբրեւ զփայլակն զսուսեր իմ, եւ կալցի զդատաստանաց ձեռն իմ, եւ հատուցից զվրէժս թշնամեաց իմոց. եւ ատելեաց իմոց հատուցից:
42․ արբեցուցից զնետս իմ յարենէ, եւ սուր իմ կերիցէ միս յարենէ վիրաւորաց եւ գերութեան ի գլխոյ իշխանաց թշնամեաց: ուրախ լերուք երկինք հանդերձ նովաւ, եւ երկիր պագցեն նմա ամենայն որդիք Աստուծոյ:
43․ Ուրախ լերուք ազգ ընդ ժողովրդեան նորա, եւ զաւրացուսցեն զնա ամենայն հրեշտակք Աստուծոյ: զի խնդրի վրէժ արեան որդւոց նոցա. եւ խնդրեսցէ վրէժ` եւ հատուսցէ դատաստան թշնամեաց. եւ սրբեսցէ Տէր զերկիր ժողովրդեան իւրոյ: Եւ գրեաց Մովսէս զաւրհնութիւնս զայս յաւուր յայնմիկ, եւ ուսոյց զսա որդւոցն Իսրայէղի:
44․ Եւ եմուտ Մովսէս ի ժողովուրդն, եւ խաւսեցաւ զամենայն բանս աւրինացս այսոցիկ յականջս ժողովրդեանն, ինքն եւ Յեսու որդի Նաւեայ:
45․ Եւ կատարեաց Մովսէս խաւսել ընդ ամենայն Իսրայէղի.
46․ եւ ասէ ցնոսա. Զգուշ լերուք սրտիւք ամենայն բանիցս այսոցիկ, որոց ես դնեմ վկայութիւն ընդ ձեզ այսաւր. զոր պատուիրիցէք որդւոց ձերոց, պահել եւ առնել զամենայն բանս աւրինացս այսոցիկ:
47․ զի ոչ էթէ բան ինչ ընդունայն իցէ ձեզ. զի սա է կեանք ձեր. եւ վասն այսր բանի երկայնաւրեայք լինիցիք ի վերայ երկրին` յոր դուք անցանալոց էք ընդ Յորդանան ժառանգել զնա:
48․ Եւ խաւսեցաւ Տէր ընդ Մովսէսի ի նմին աւուր` եւ ասէ.
49․ Ել դու ի լեառն Նաբարին ի լեառն Նաբաւ, որ է յերկրին Մովաբու յանդիման Երեքովի. եւ տես զերկիրն զոր ես տաց որդւոցն Իսրայէղի ի կալուած:
50․ Եւ վախճանեաց անդէն ի լերինն յոր ելանիցես, եւ յաւելիր ի ժողովուրդ քո, զոր աւրինակ մեռաւ Ահարովն եղբայր քո ի Հովր լերին, եւ յաւելաւ առ ժողովուրդ իւր.
51․ փոխանակ զի հեստեցէք բանին իմում ի մէջ որդւոցն Իսրայէղի ի վերայ ջուրցն հակառակութեան ի Կադէս` յանապատին Սինա. զի ոչ սրբեցէք զիս ի մէջ որդւոցն Իսրայէղի:
52․ Յանդիման տեսցես զերկիրն` եւ անդր մի մտանիցես:
Հաղորդում կայքում սխալի վերաբերյալ
Տվյալ հատվածում առկա է սխալ: