1. Իբրեւ զի կարի լաւ է յանդիմանել քան ցասնուլ։
3. Եւ որ առնէ զդատ բռնութեամբ, այնպէս է՝
4. որպէս ներքինի ցանկայ կուսի կուսութեան։
5. Է որ ի շատխաւսութենէ ատելի լինի ամենեցուն.
6. եւ են՝ որ ոչ գոն բանք ի բերան։ Են որ լուռ են, զի գիտեն զժամանակ բանից։
7. Այր իմաստուն լռեսցէ մինչեւ ի ժամանակ, եւ որ անզգամ է եւ ամբարիշտ՝ յառաջ վարեսցի։
8. Որ յաճախէ զբան իւր՝ արհամարհեսցի, եւ որ ատելի լիցի՝ անչափ սաստկանայ։
9. Է յաջողութիւն ի վերայ չարեաց մարդոյ, եւ են գիւտք ի պակասութիւն։
10. Են տուրք՝ որ ոչ ինչ աւգնեն, եւ են տուրք՝ որ հատուցումն կրկնակի ունի։
11. Է պակասութիւն՝ որ վասն փառաց է, եւ են՝ որ վասն խոնարհութեան։ Են՝ որ գլուխ ի վեր բարձին.
12. եւ են՝ որ գնեն զմեծն փոքու, եւ են՝ որ տուժին եւս եւթնպատիկ։
13. Որ իմաստուն է բանիւք՝ զանձն սիրելի առնէ։ Շնորհք մորոսաց ամաչեսցեն։
14. Անզգամաց տուրք աւգուտ ոչ լիցի, զի աչք նոցա ընդ միոյն ի բազումս նային.
15. սակաւ ինչ տայ, եւ մեծամեծս նախատէ, եւ իբրեւ քարոզ բանայ զբերան իւր։
17. Մորոսն այսպէս ասէ՝ չիք իմ բարեկամ, եւ շնորհք բարեաց ոչ գոյ ինձ։
20. Լաւ է յոտից գայթագղել՝ քան ի լեզուէ. այսպէս չարեաց կործանումն վաղվաղակի հասցէ։
21. Առասպել տարաժամ այր անշնորհք։
22. Ի բերանոյ առն անմտի անարգին առակք. զի ոչ ասէ զնա ի ժամու։
23. Է որ ի մեղաց արգելեալ է վասն տկարութեան, եւ ի հանգստեան իւրում ոչ զղջանայ։
24. Է որ կորուսանէ զանձն վասն ամաւթոյ, եւ կորնչի յակնառութեան իւրում։
25. Է որ ամաւթ յանձն առնու վասն բարեկամի, եւ ի տարապարտուց ստացաւ զնա իւր թշնամի։
26. Չար բիծ ի մարդ ստութիւն։
27. Այլ է գողութիւն, եւ այլ է ստութիւն, եւ երկոքեան զկորուստ ժառանգեսցեն։
28. Անարգանք անձին մարդոյ՝ բանք սրտի իւրոյ, եւ ամաւթ նորին կանխեսցէ ի նոյն։ Որդեակ՝ պահեա զբանս իմ, եւ խելամուտ լեր ի դմա ի տուէ եւ ի գիշերի, զի եւ որդի հարազատ եւ ժառանգ մեծազգի որ զնախնեացն զմեծանձնութիւն ոչ նորոգէ եւ յառաջ բերէ՝ ամաւթ մեծ եւ նախատինք է նա հաւուց իւրոց, եւ անէծք նորոգ։
Բանք առակաց. երկրորդ
29. Որ բանիւք իմաստուն է՝ առաջնորդեսցէ նմա, եւ իմաստուն մարդ հաճոյ լիցի մեծամեծաց։
31. Պատարագք եւ կաշառք կուրացուցանեն զսիրտս իմաստնոց, եւ իբրեւ գայլ ի բերան հարեալ անդրէն դարձուցանէ։
32. Իմաստութիւն ծածկեալ գանձ աներեւոյթ, եւ արդ՝ յերկոցունց զի՞նչ աւգուտ։
33. Լաւ է մարդ որ ծածկէ զմորոսութիւն իւր, քան որ ծածկէ զիմաստութիւն։
Հաղորդում կայքում սխալի վերաբերյալ
Տվյալ հատվածում առկա է սխալ: