1. Տէր յերկրէ ստեղծ զմարդն.
2. թիւ աւուրց եւ չափ ժամանակաց ետ նոցա.
3. ըստ կարի եւ ըստ զաւրութեան նոցա զգեցոյց զնոսա։
4. Զահ եւ զերկիւղ նոցա եդ ի վերայ ամենայն մսեղեաց, տիրել ամենայն գազանաց երկրի՝ եւ թռչնոց երկնից։
5. Կատարեալ զգայարանաւք՝ եւ բանաւորութեամբ զարդարեաց զնոսա։
6. Զբարի եւ զչար ծանոյց նոցա,
7. եւ եցոյց զմեծութիւն գործոց իւրոց.
8. զի պատմեսցեն զփառս նորա, եւ աւրհնեսցեն զանուն սուրբ նորա։
9. Յաւել ի նոսա զհանճար արուեստից,
10. եւ ուխտ յաւիտենից կացոյց ընդ նոսա։
11. Զսքանչելիս փառաց տեսին աչք նոցա, եւ զզարհուրելի խաւսս նորա լուան ականջք նոցա։
12. Եւ պատուէր ետ նոցա զգոյշ լինել յամենայն չարէ, եւ պահել զպատուիրանն ըղձալի։ Չարն զչարութիւն ուսոյց նոցա, եւ զԱստուած եւ զսէրն արարչական ետ արհամարհել նոցա։ Եւ զեւթնեակ շնորհսն հան ի նոցանէ, եւ եւթն յանցանաւք ելից զնոսա. եւ յերկրէ ուստի առան՝ զնոյն անիծից երկիր ժառանգեցին. եւ յետ այնորիկ մեղս ազգի ազգի ուսոյց նոցա, մինչեւ ջրով ջնջել զյիշատակ նոցա։ Եւ որդւովն Քանանու դարձեալ դարձան ի չարութիւն միաշուրթն լեզուաւ մինչեւ յաշտարակն վաղափուլ.
13. եւ Տէր բաժանեաց լեզուս եւ ազգս,
14. եւ իւրաքանչիւր ազգի կացոյց առաջնորդս։
15. Եւ յետ բազմահաւաք ամաց՝ առ բաժին իւր զԻսրայէլ,
16. եւ աչք նորա պահէր զճանապարհս նոցա,
17. եւ անաւրէնութիւնք նոցա ոչ ծածկեցաւ ի նմանէ, զի եւ մեղք ամենայն մարդոյ գրեալ է առաջի նորա.
18. եւ արդարութիւն մարդոյ եւ շնորհք կնքեալ է առաջի նորա։
19. Սակայն մեղաւորաց դարձ ապաշխարութեան շնորհեաց.
20. եւ յանկարծ իբրեւ զբիբ ական
21. զարթիցէ, եւ հատուսցէ զհատուցումն։ Որդեակ՝ այր անզգամ մոլորեալ մտաւք՝ մոլորութիւն խաւսի։
22. Արա զդարձ քո առ բարձրեալն՝ եւ թողու զմեղս քո.
23. եւ յանիրաւութենէ դարձիր՝ եւ ատեա զպղծութիւն։
24. Փոխանակ կենդանեաց զբարձրեալն ի դժոխս ո՞վ աւրհնեսցէ։
25. Որ հանիցէ նմա խոստովանութիւն,
26. ի մեղաւք մեռելոյն, իբրեւ ի չեղելոյ կորեաւ խոստովանութիւնն։
27. Կենդանիք եւ ողջք յամենայն ժամ աւրհնեսցեն զՏէր.
29. զի ոչ է մարթ ամենայն լաւութիւն լինել ի մարդ, զի չէ անմահ որդի մարդոյ՝
30. այլ հող եւ մոխիր։
31. Զի՞նչ լուսաւորագոյն քան զարեգակն, սակայն եւ նա նուաղի։
Հաղորդում կայքում սխալի վերաբերյալ
Տվյալ հատվածում առկա է սխալ: