1. Եւ առեալ երկուց որդւոցն Ահարոնի, Նաբադայ եւ Աբիուդայ զիւրաքանչիւր բուրուառ` եդին ի նոսա հուր, եւ արկին խունկս, եւ մատուցին առաջի Տեառն հուր աւտար. զոր ոչ հրամայեաց նոցա Տէր:
2. Եւ ել հուր ի Տեառնէ եւ եկեր զնոսա. եւ մեռան առաջի Տեառն:
3. Եւ ասէ Մովսէս ցԱհարոն. Այս է զոր ասաց Տէր. ասէ. Ի մերձաւորս իմ սրբեցայց, եւ առաջի ամենայն ժողովրդեան իմոյ փառաւորեցայց: Եւ ստրջացաւ Ահարոն:
4. Եւ կոչեաց Մովսես զՄիսադայի եւ զԵղիսափան զորդիս Եզիելի, զորդիս հաւրեղբաւր Ահարոն, եւ ասէ ցնոսա. Մատիք եւ բարձէք զեղբարս ձեր, հանդերձ պատմուճանաւքն իւրեանց յերեսաց սրբութեանցդ` արտաքոյ քան զբանակն:
5. Մատեան եւ բարձին զնոսա` հանդերձ պատմուճանաւքն իւրեանց արտաքոյ բանակին. զորաւրինակ ասաց Մովսէս
6. Ահարոն, եւ ցԵղիազար, եւ ցԻթամար զորդիսն նորա մնացեալս: Զգլուխս ձեր մի ապախուրէք, եւ զհանդերձս ձեր մի պատառէք, զի մի մեռանիցիք. եւ ի վերայ ժողովրդեանդ լինիցի բարկութիւն: Բայց եղբարք ձեր եւ ամենայն տունդ Իսրայէլի` լացցեն զհրայրեացսն որ այրեցան ի Տեառնէ:
7. Եւ ի դրանէ խորանիդ վկայութեան մի ելանիցէք, զի մի մեռանիցիք. զի եւղն աւծութեան որ ի Տեառնէ` ի վերայ ձեր է: Եւ արարին ըստ բանին Մովսիսի:
8. Խաւսեցաւ Տէր ընդ Ահարոնի` եւ ասէ.
9. Գինի` եւ ցքի` մի ըմպիցէք դու եւ որդիք քո ընդ քեզ` յորժամ մտանիցէք ի խորանն վկայութեան, կամ յորժամ մերձենայցէք ի սեղանն. զի մի մեռանիցիք: 0րէն յաւիտենական յազգս ձեր.
10. զատել ի մէջ սրբոց եւ պղծոց, եւ ի մէջ պարկեշտից եւ անպարկեշտից:
11. Եւ իմացուցանել Իսրայէլի զամենայն զաւրէնս` զոր խաւսեցաւ ընդ նոսա Տէր ի ձեռն Մովսիսի:
12. Եւ ասէ Մովսէս ցԱհարոն, եւ ցԵղիազար եւ ցԻթամար ցորդիս նորա ցմնացեալս. Առէք զզոհն մնացեալ ի պտղոց անտի Տեառն, եւ կերայք բաղարջ առաջի սեղանոյն. զի սրբութիւն սրբութեանց է:
13. Եւ կերիջիք զայն ի սուրբ տեղւոջ. զի աւրէն քեզ լինիցի այն, եւ աւրէն որդւոց քոց ի պտղոցն Տեառն. զի
այնպէս հրամայեալ է ինձ Տեառն:
14. Եւ զերբուծ նուիրին, եւ զերի հասին կերիջիք ի սուրբ տեղւոջ դու` եւ որդիք քո եւ տուն քո ընդ քեզ. զի աւրէն քեզ է այն, եւ աւրէն որդւոց քոց տուաւ` ի զոհիցն փրկութեան որդւոցն Իսրայէլի:
15. Զերին հասի` եւ զերբուծ նուիրի ի վերայ ընծայից ճարպոյն, մատուսցեն նուէր նուիրեալ առաջի Տեառն: Եւ եղիցի քեզ եւ որդւոց քոց եւ դստերաց քոց ընդ քեզ` աւրէն յաւիտենական. զոր աւրինակ հրամայեաց Տէր Մովսիսի:
16. Եւ զնոխազն զվասն մեղաց խնդրելով խնդրեաց Մովսէս. եւ այն` էր այրեցեալ: Եւ բարկացաւ Մովսէս Եղիազարու եւ Իթամարայ որդւոցն Ահարոնի մնացելոց`
17. եւ ասէ. Ընդ է՞ր ոչ կերայք զայն ի սուրբ տեղւոջ. զի սրբութիւն սրբութեանց է. եւ զայն ետ ձեզ ուտել, զի բառնայցէք զմեղս ժողովրդեանն. եւ առնիցէք քաւութիւն վասն նոցա առաջի Տեառն.
18. քանզի ոչ եմուտ յարենէ նորա ի սրբութիւնն յանդիման երեսացն ի ներքս: Արդ` կերայք զնա ի սուրբ տեղւոջ` զոր աւրինակ հրամայեցաւ ինձ:
19. Խաւսեցաւ Ահարոն ընդ Մովսիսի` եւ ասէ. Զի թէ այսաւր մատուցին զվասն մեղացն իւրեանց պատարագ, եւ զողջակէզս իւրեանց առաջի Տեառն. եւ այսպիսի անցք անցին ընդ իս, եւ ուտիցե՞մ այսաւր զվասն մեղացն. գուցէ չլինիցի հաճոյ առաջի Տեառն:
20. Եւ լուաւ Մովսէս` եւ հաճոյ թուեցաւ նմա:
Հաղորդում կայքում սխալի վերաբերյալ
Տվյալ հատվածում առկա է սխալ: