Գլուխ 3

   
1. Ապա թէ զոհ փրկութեան իցէ պատարագ նորա Տեառն, եթէ յարջառոց մատուցանիցէ, եթէ արու իցէ, եւ եթէ էգ իցէ, զանարատն մատուսցէ առաջի Տեառն։

2. Եւ դիցէ զձեռս իւր ի վերայ գլխոյ պատարագին. եւ սպանցէ զնա առ դրան խորանին վկայութեան: Եւ հեղցեն որդիքն Ահարոնի քահանայք զարիւնն ի վերայ սեղանոյ ողջակիզացն շուրջանակի:

3. Եւ մատուսցէ ի զոհէն փրկութեան պտուղ Տեառն. զճարպ թաղանթ քաղրթին, եւ զամենայն ճարպ փորոտւոյն:

4. Եւ զերկուս երիկամունսն եւ զճարպն որ ի նոսա, որ առ մսանամբքն իցեն եւ զլերդաբոյթն երիկամամբքն հանդերձ կորզեսցեն:

5. Եւ հանցեն զայն որդիքն Ահարոնի քահանայք ի սեղանն յողջակէզ ի վերայ փայտին եւ հրոյն, պտուղ անուշից Տեառն:

6. Ապա թէ յաւդեաց իցէ պատարագ նորա զոհ փրկութեան Տեառն. արու կամ էգ, անարատ մատուսցէ զայն:

7. Իսկ եթէ գառն մատուցանիցէ զպատարագն իւր, մատուսցէ զնա առաջի Տեառն:

8. Եւ դիցէ զձեռն իւր ի վերայ գլխոյ պատարագին իւրոյ, եւ սպանցէ զնա առ դրան խորանին վկայութեան. եւ հեղցէն որդիքն Ահարոնի քահանայք զարիւնն շուրջ զսեղանովն:

9. Եւ մատուսցեն ի զոհէն փրկութեան պտուղ Տեառն, զճարպն եւ զմսանն անարատ,

10. հանդերձ զըստաւքն ի նմանէ. եւ զճարպ թաղանթ քաղրթին, եւ զամենայն ճարպ փորոտւոյն, եւ զերկուս երիկամունսն եւ զճարպն որ ի նոսա որ առ մսանամբքն, եւ զլերդաբոյթն հանդերձ երիկամբք

11. կորզեալ` հանցէ քահանայն ի սեղանն հոտ անուշից պտուղ Տեառն:

12. Իսկ եթէ յայծեաց իցէ պատարագն իւր, մատուսցէ առաջի Տեառն.

13. եւ դիցէ զձեռն իւր ի վերայ գլխոյ նորա. եւ սպանցեն զնա առ դրան խորանին վկայութեան առաջի Տեառն. եւ հեղցեն որդիքն Ահարոնի քահանայք զարիւնն շուրջ զսեղանովն:

14. Եւ հանցեն ի նմանէ պտուղ Տեառն զճարպն զթաղանթ քաղրթին, եւ զամենայն ճարպ փորոտւոյն.

15. եւ զերկուս երիկամունսն, եւ զճարպն ի նոսա` որ առ մսանամբքն. եւ զլերդաբոյթն երիկամամբքն հանդերձ կորզեսցէ.

16. եւ հանցէ քահանայն ի սեղանն պտուղ ի հոտ անուշից Տեառն:  Զամենայն ճարպն Տեառն`

17. աւրէն յաւիտենական յազգս ձեր, յամենայն բնակութեան ձերում. զամենայն ճարպ եւ զամենայն արիւն մի ուտիցէք: