1. Եւ եղեւ յաւուրն ութերորդի. կոչեաց Մովսէս զԱհարոն եւ զորդիս նորա եւ զծերակոյտն Իսրայէլի. եւ ասէ Մովսէս ցԱհարոն.
2. Առ դու քեզ զուարակ մի յանդւոյ վասն մեղաց. եւ խոյ յողջակէզ անարատ. եւ մատո զնոսա առաջի Տեառն:
3. Եւ ընդ ծերակոյտ որդւոցն Իսրայէլի խաւսեսցիս եւ ասասցես. Առէք դուք ձեզ նոխազ մի յայծեաց վասն մեղաց. եւ խոյ, եւ զուարակ, եւ գառն տարեւոր, յողջակէզ անարատ:
4. Եւ զուարակ եւ խոյ, յողջակէզ փրկութեան առաջի Տեառն. եւ զոհ նաշիհ զանգեալ իւղով, զի այսաւր երեւեսցի Տէր ի միջի մերում:
5. Եւ առին որպէս եւ հրամայեաց Մովսէս առաջի խորանին վկայութեան: Եւ մատեան ամենայն ժողովուրդքն, եւ կացին առաջի Տեառն:
6. Եւ ասէ Մովսէս. Այս բան է` զոր ասաց Տէր առնել, եւ երեւեսցին ի ձեզ փառք Տեառն:
7. Եւ ասէ Մովսէս ցԱհարոն. Մատիր առ սեղանն, եւ արա զվասն մեղացն քո, եւ զողջակէզն քո. եւ քաւեա վասն քո եւ տան քո: Եւ արա զպատարագս ժողովրդեան քոյ, եւ քաւեա վասն նոցա. որպէս պատուիրեաց Տէր Մովսիսի:
8. Եւ մատեաւ Ահարոն առ սեղանն, եւ սպան զզուարակն զվասն մեղացն իւրոց:
9. Եւ մատուցին որդիքն Ահարոնի զարիւնն առ նա. եւ եթաց զմատն յարեանն. եւ եդ ի վերայ եղջերաց սեղանոյն. եւ զարիւնն եհեղ առ յատակաւ սեղանոյն:
10. Եւ զճարպն եւ զերիկամունսն, եւ զլերդաբոյթն, զվասն մեղացայոյն եհան ի սեղանն, որպէս պատուիրեաց Տէր Մովսիսի:
11. Եւ զմիսն եւ զկաշին այրեցին հրով արտաքոյ բանակին:
12. Եւ սպան զողջակէզն. եւ մատուցին որդիքն Ահարոնի զարիւնն առ նա. եւ եհեղ շուրջ զսեղանովն:
13. Եւ զողջակէզն մատուցին առ նա անդամ անդամ, եւ զգլուխն. եւ եդ ի վերայ սեղանոյն:
14. Եւ լուաց զքաղիրթն եւ զոտսն ջրով, եւ եդ ի վերայ ողջակիզին ի սեղանն:
15. Եւ մատուցին զպատարագ ժողովրդեանն. եւ առ զնոխազն զվասն մեղաց ժողովրդեանն. եւ սպան զնա իբրեւ զառաջինն:
16. Եւ մատոյց զողջակէզն,
17. եւ արար զնա որպէս եւ աւրէն էր. եւ մատոյց զզոհն, եւ ելից զձեռս ի նմանէն, եւ եդ ի վերայ սեղանոյն` ուրոյն յառաւաւտին ողջակիզէն:
18. Եւ սպան զզուարակն եւ զխոյն զոհին փրկութեան ժողովրդեանն. եւ մատուցին որդիքն Ահարոնի զարիւնն առ նա. եւ եհեղ զայն շուրջ զսեղանովն:
19. Եւ զճարպն որ ի զուարակէն եւ ի խոյէն, եւ զմկանն. եւ զճարպ թաղանթ քաղրթին. եւ զերկոսին երիկամունսն ճարպովին, եւ զլերդաբոյթն եւ զերբուծն:
20. Եւ եդին զճարպն ի վերայ երբծոցն. եւ հանին զճարպն հանդերձ երբծովքն. եւ եդին զճարպն ի վերայ սեղանոյն:
21. Եւ զերբուծսն եւ զերին զաջոյ նուիրեաց նուէր առաջի Տեառն, որպէս պատուիրեաց Տէր Մովսիսի:
22. Եւ ամբարձեալ Ահարոնի զձեռս իւր ի վերայ ժողովրդեանն` աւրհնեաց զնոսա: Եւ էջ արար զվասն մեղացն, եւ զողջակէզսն եւ զփրկութեանն:
23. Եւ մտին Մովսէս եւ Ահարոն ի խորանն վկայութեան, եւ ելեալ անտի աւրհնեցին զամենայն ժողովուրդն: Եւ երեւեցաւ փառք Տեառն ամենայն ժողովրդեանն:
24. Եւ ել հուր ի Տեառնէ, եւ եկեր զամենայն որ ինչ կայր ի վերայ սեղանոյն. զողջակէզն, եւ զճարպն: Եւ ետես ամենայն ժողովուրդն, եւ զարհուրեցան անկան ի վերայ երեսաց իւրեանց:
Հաղորդում կայքում սխալի վերաբերյալ
Տվյալ հատվածում առկա է սխալ: