1. Խաւսեցաւ Տէր ընդ Մովսիսի` եւ ասէ. Յետ վախճանելոյ որդւոցն Ահարոնի` ի մատուցանել նոցա զհուրն աւտար Տեառն եւ սատակել:
2. Եւ ասէ Տէր ցՄովսէս. Խաւսեաց ընդ Ահարոնի եղբաւր քում` եւ մի մտցեն յամենայն ժամ ի սրբութիւնն ի ներքս քան զվարագոյրն յանդիման քաւութեանն, որ է ի վերայ տապանակին վկայութեան. եւ ոչ մեռանիցիք. զի ամպով երեւեցայց ի վերայ քաւութեանն:
3. Եւ ապա մտանիցէ Ահարոն ի սրբութիւնն` զուարակաւ յանդւոյ վասն մեղաց, եւ խոյիւ` յողջակէզ:
4. Եւ պատմուճան կտաւի սրբեալ զգեցցի, եւ անդրվարտէս կտաւի լինիցի յանդամս իւր. եւ գաւտի կտաւի ածեալ ընդ մէջ իւր, եւ խոյր կտաւի եդեալ ի գլուխ` զի հանդերձ սրբութեան է. եւ լուասցէ ջրով զամենայն մարմին իւր, եւ զգեցցի զնոսա:
5. Եւ ի ժողովրդենէ որդւոցն Իսրայէլի առցէ երկուս նոխազս յայծեաց վասն մեղաց, եւ խոյն մի յողջակէզ:
6. Եւ մատուսցէ Ահարոն զզուարակն` վասն մեղաց իւրոց. եւ քաւեսցէ վասն իւր եւ վասն տան իւրոյ:
7. Եւ առցէ երկուս նոխազս եւ կացուսցէ զնոսա առաջի Տեառն` առ դրան խորանին վկայութեան:
8. Եւ արկցէ Ահարոն ի վերայ երկուց նոխազացն վիճակս` վիճակ մի Տեառն եւ վիճակ մի` արձակելոյ:
9. Եւ մատուսցէ Ահարոն զնոխազն` յորոյ վերայ իցէ վիճակն արձակելոյ.
10. եւ կացուսցէ զնոսա առաջին Տեառն. քաւել նովաւ` առ յարձակելոյ զնա յարձակումն եւ թողլոյ զնա յանապատ. եւ առցէ նոխազն յինքն զանաւրէնութիւնս նոցա` յանկոխն:
11. Եւ մատուսցէ Ահարոն զզուարակն` զվասն մեղաց իւր. եւ քաւեսցէ վասն իւր եւ վասն տան իւրոյ. եւ սպանցէ զզուարակն` զվասն մեղաց զիւր.
12. եւ առցէ լի բուրուառաւ կայծակունս հրոյ ի սեղանոյ անտի, որ է առաջի Տեառն. եւ լցցէ զձեռս իւր խնկով հանդերձանանցն մանր աղացելով. եւ տարցի ի ներքս քան զվարագոյրն.
13. եւ դիցէ զխունկն ի վերայ հրոյն առաջի Տեառն. եւ ծածկեսցէ ծուխ խնկոյն զքաւութիւնն որ իցէ ի վերայ վկայութեանցն. եւ ոչ մեռանիցիք:
14. Եւ առցէ յարենէ զուարակին եւ ցանեսցէ մատամբ իւրով ի վերայ քաւութեանն` ընդ կողմն արեւելից ընդ դէմ քաւութեանն, ցանեսցէ եւթն անգամ յարենէ անտի մատամբ իւրով:
15. Եւ սպանցէ զնոխազն զվասն մեղացն, որ վասն ժողովրդեանն իցէ առաջի Տեառն. եւ տարցի յարենէ անտի ի ներքս քան զվարագոյրն. եւ արասցէ զարիւն նորա զոր աւրինակ արար զարիւն զուարակին. եւ ցանեսցէ զարիւն նորա ի վերայ սեղանւոյն` յանդիման քաւութեանն:
16. Եւ քաւեսցէ զսրբութիւնն ի պղծութեանց որդւոցն Իսրայէլի եւ յանիրաւութեանց նոցա, վասն ամենայն մեղաց նոցա: Եւ այսպէս արասցէ խորանին վկայութեան` ստացելոյ ի նոսա, ի մէջ պղծութեանց նոցա:
17. Եւ ամենեւին մարդ ոչ լինիցի ի խորանին վկայութեան` ի մտանել նորա եւ քաւել ի սրբութեանն, մինչչեւ ելանիցէ: Եւ քաւեսցէ վասն իւրոյ եւ վասն ամենայն ժողովրդեան` որդւոցն Իսրայէլի:
18. Եւ ելցէ ի սեղան նորա առաջի Տեառն եւ քաւեսցէ ի վերայ նորա. եւ առցէ յարենէ զուարակին եւ յարենէ նոխազին եւ դիցէ ի վերայ եղջերաց սեղանւոյն շուրջանակի.
19. եւ ցանեսցէ յարենէ անտի ի վերայ նորա մատամբ իւրով եւթն անգամ, եւ մաքրեսցէ զնա եւ սրբեսցէ զնա ի պղծութեանց որդւոցն Իսրայէլի.
20. եւ վախճանեսցէ առ ի քաւելոյ զսրբութիւնն եւ զխորանն վկայութեան եւ զսեղանն. եւ վասն քահանայիցն սրբեսցէ: Եւ մատուսցէ զնոխազն կենդանի.
21. եւ դիցէ զձեռս իւր Ահարոն ի վերայ գլխոյ նոխազին կենդանւոյ եւ խոստովան լինիցի ի վերայ նորա զամենայն անաւրենութիւնս որդւոցն Իսրայէլի. եւ զամենայն անիրաւութիւնս նոցա, եւ զամենայն զմեղս նոցա: Եւ դիցես զնոսա ի վերայ գլխոյ նոխազին կենդանւոյ. եւ արձակեսցէ ի ձեռն առն պատրաստելոյ` յանապատ:
22. Եւ առցէ նոխազն յանձն իւր զանաւրէնութիւնս նոցա` յերկիր անկոխ. եւ արձակեսցէ զնոխազն յանապատ:
23. Եւ մտցէ Ահարոն ի խորանն վկայութեան եւ մերկասցի զպատմուճանն կտաւի, զոր զգենոյր ի մտանելն իւր ի սրբութիւնն. եւ դիցէ զայն անդ.
24. եւ լուասցէ զմարմին իւր ջրով ի տեղւոջն սրբութեան. եւ զգեցցի զպատմուճանն իւր. եւ ելեալ արասցէ զողջակէզն իւր եւ զողջակէզս ժողովրդեանն եւ քաւեսցէ վասն իւր եւ վասն տան իւրոյ, եւ վասն ժողովրդեանն` որպէս վասն քահանայիցն.
25. եւ զճարպն որ վասն մեղացն իցէ` հանցեն ի սեղանն:
26. Եւ որ արձակիցէ զնոխազն ուխտեալ յարձակումն, ողողեսցէ զձորձս իւր եւ լուասցէ զմարմինն ջրով. եւ ապա մտցէ ի բանակն:
27. Եւ զզուարակն զվասն մեղաց եւ զնոխազն զվասն մեղաց, որոց արիւնն մածաւ քաւել ի սրբութեանն, հանցեն արտաքոյ բանակին եւ այրեսցեն զնոսա հրով. եւ զմորթս նոցա եւ զմիս նոցա եւ զապաւառ նոցա:
28. Եւ որ այրեսցէ զնոսա, ողողեսցէ զհանդերձս իւր եւ լուասցէ զմարմին իւր ջրով. եւ ապա մտցէ ի բանակն. եւ եղիցի ձեզ այն աւրէն յաւիտենական:
29. Յամսեանն եւթներորդի, ի տասն ամսւոյն լլկեսջիք զանձինս ձեր. եւ զամենայն գործ մի գործիցէք. բնակն եւ պանդուխտն` որ յեցեալ իցէ ի ձեզ:
30. յաւուր յանմիկ լինիցի քաւութիւն վասն ձեր` առ ի սրբելոյ զձեզ յամենայն մեղաց ձերոց առաջի Տեառն. եւ սրբեսջիք.
31. զի շաբաթ շաբաթուց է: Եւ եղիցի ձեզ այն ի հանգիստ. եւ լլկեսջիք զանձինս ձեր, զի աւրէն յաւիտենական է:
32. Եւ քաւեսցէ քահանայն զոր աւծանիցեն եւ զորոյ կատարեսցեն զձեռս նորա քահանայանալ յետ հաւր իւրոյ. եւ զգեցցի զպատմուճանն կտաւի սուրբ պատմուճան.
33. եւ քաւեսցէ զսրբութիւն սրբութեան եւ զխորանն վկայութեան եւ զսեղանն. եւ քաւեսցէ վասն քահանային եւ վասն ամենայն ժողովրդեանն քաւեսցէ:
34. Եւ եղիցի ձեզ այն աւրէն յաւիտենական` քաւել վասն որդւոցն Իսրայէլի յամենայն մեղաց նոցա. մի անգամ ի տարւոջ առնիցի` որպէս հրամայեաց Տէր Մովսիսի:
Հաղորդում կայքում սխալի վերաբերյալ
Տվյալ հատվածում առկա է սխալ: