1. Խաւսեցաւ Տէր ընդ Մովսիսի եւ ընդ Ահարոնի` եւ ասէ
2. Մարդոյ ուրուք եթէ լինիցի ի մորթ մարմնոյ իւրոյ նշան սպւոյ, կամ պալար, կամ պաղպաջ, եւ լինիցի ի մորթ մարմնոյ նորա արած բորոտութեան, եկեսցէ առ Ահարոն քահանայ. կամ առ մի յորդւոց նորա քահանայից:
3. Եւ տեսցէ քահանայն զարածն, ի մորթ մարմնոյ նորա, եւ կամ թէ մազ արածին ի սպիտակ դարձեալ իցէ, եւ տեսիլ արածին զնստագոյն իցէ քան զմորթ մարմնոյն, արած բորոտութեան է. եւ տեսցէ քահանայն եւ պղծէսցէ զնա:
4. Ապա թէ պաղպաջն սպիտակ իցէ ի մորթ մարմնոյ նորա, եւ զնստագոյն չիցէ տեսիլ նորա քան զմորթն, եւ մազն ի սպիտակ չիցէ դարձեալ, եւ ինքն շլագոյն իցէ, զատուսցէ քահանայն զարածն զեւթն աւր:
5. Եւ տեսցէ քահանայն յաւուրն եւթներորդի, եթէ կայցէ նոյնպէս արածն առաջի նորա, եւ չիցէ փոխեալ արածն ի մորթն, զատուսցէ զնա քահանայն այլ եւս աւուրս եւթն:
6. Եւ տեսցէ քահանայն յաւուրն եւթներորդի մեւս անգամ. եւ ահա շլագոյն իցէ արածն, եւ յայլ գոյն չիցէ փոխեալ մորթն, սրբեսցէ զնա քահանայն. զի նշան ինչ է այն. եւ լուասցէ զձորձս իւր եւ եղիցի սուրբ:
7. Ապա թէ շրջելով շրջեսի նշանն ի մորթն, յետ տեսանելոյ զնա քահանային եւ սրբելոյ. եւ երեւեսցի մեւս անգամ քահանային, եւ տեսցէ քահանայն. եւ ահա այլագունեալ իցէ նշանն ի մորթն
8. պղծեսցէ զնա քահանայն` զի բորոտութիւն է:
9. Եւ արած բորոտութեան եթէ լինիցի մարդոյ, եկեսցէ առ Ահարոն քահանայ,
10. եւ տեսցէ քահանայն, եւ ահա պալար սպիտակ իցէ ի մորթն. եւ մազն նորա ի սպիտակ դարձեալ իցէ, եւ յառողջ եւ ի կենդանի մարմնոյն ի պալար`
11. բորոտութիւն հնացեալ իցէ ի մորթ մարմնոյ նորա. պղծեսցէ զնա քահանայն, եւ զատուսցէ զնա` զի պիղծ է:
12. Ապա թէ սփռելով սփռեսցի բորոտութիւնն ընդ մորթն. եւ ծածկեսցէ բորոտութիւնն զամենայն մորթն իրանանցն, ի գլխոյ մինչչեւ ցոտս, ըստ ամենայն տեսոյ քահանային:
13. Եւ տեսանիցէ քահանայն, եւ ահա ծածկեաց բորոտութիւնն զամենայն մորթն ի մարմնոյն, սրբեսցէ քահանայն զարածն. քանզի ամենայն ի սպիտակ դարձաւ, սուրբ է:
14. Եւ յորում աւուր երեւեսցի ի նմա մարմին կենդանի, պղծեսցի:
15. Եւ տեսցէ քահանայն զմարմինն կենդանի. եւ պղծեսցէ զողջ մարմինն. եւ պիղծ լիցի` քանզի բորոտութիւն է:
16. Ապա թէ անդրէն հաստատեսցի մարմինն ողջ, եւ դարձցի ի սպիտակ.
17. եկեսցէ առ քահանայն. եւ տեսցէ զնա քահանայն. եւ ահա դարձեալ իցէ արածն նորա ի սպիտակ, սրբեսցէ քահանայն զարածն` քանզի սուրբ է:
18. Եւ մարդոյ եթէ լինիցի ի մորթ մարմնոյ նորա կեղ, եւ ողջասցի.
19. եւ լինիցի ի տեղի կեղոյն սպիտակ փայլուն, լսնացեալ կամ կարմրացեալ. եւ երեւեսցի քահանային:
20. Եւ տեսանիցէ քահանայն, եւ ահա խորագոյն իցէ տեղին քան զմորթն, եւ մազն սպիտակ դարձեալ իցէ, պղծեսցէ զնա քահանայ. զի բորոտութիւն է ընդ կեղոյն բորբոքեալ:
21. Իսկ եթէ տեսանիցէ քահանայն` եւ չիցէ ի նմա մազ սպիտակ. եւ ոչ խորագոյն իցէ քան զմարմինն, եւ ինքն շլագոյն իցէ. զատուսցէ զնա քահանայն զեւթն աւր:
22. Եթէ սփռեսցի ընդ մորթն, պղծեսցէ զնա քահանայն. զի արած բորոտութեան ընդ կեղոյն բորբոքեցաւ:
23. Ապա թէ ի տեղւոջն կայցցէ փայլիւնն` եւ ոչ տարածանիցի, սպի կեղոյն է. սրբեսցէ զնա քահանայն:
24. Եւ մարմնոյ եթէ լինիցի ի մորթ նորա այրեցած հրոյ, եւ լինիցի ողջացեալ մորթ նորա այրեցածէ անտի. եւ լինիցի տեղի այրեցածին փայլուն կամ պաղպաջ սպիտակ, կամ կարմրացեալ, կամ լսնացեալ:
25. Եւ տեսանիցէ զնա քահանայն, եւ ահա փոխեալ իցէ մազն սպիտակ ի փայլուն. եւ տեսիլ նորա զիջագոյն իցէ քան զմորթն, բորոտութիւն է ընդ այրեցածին բորբոքեալ. պղծեսցէ զնա քահանայն` զի արած բորոտութեան է:
26. Եւ եթէ տեսանիցէ քահանայն, եւ ահա` չիցէ ի նմա փայլիւն ինչ` կամ մազ սպիտակ, եւ ոչ զնստագոյն քան զմորթն, բայց շլագոյն իցէ. զատուսցէ զնա քահանայն զեւթն աւր:
27. Եւ տեսցէ զնա քահանայն յաւուրն եւթներորդի, եթէ սփռելով սփռեալ իցէ արածն ընդ մորթն, պղծեսցէ զնա քահանայն. զի արած բորոտութեան է ընդ այրեցածին բորբոքեալ:
28. Եւ եթէ ի նմին տեղւոջ կացցէ փայլիւնն, եւ ոչ սփռեսցի ընդ մորթն. եւ ինքն շլագոյն իցէ, սպի այրեցածոյն է. սրբեսցէ զնա քահանայն` զի դրոշմն այրեցածոյ է:
29. Եւ առն կամ կնոջ, եթէ լինիցի արած բորոտութեան ի գլուխ` կամ ի մաւրուս, եւ տեսանիցէ քահանայն զարածն,
30. եւ ահա տեսիլ նորա զնստագոյն իցէ քան զմորթն. եւ ի նմա մազ աղուամազ խարտեշացեալ, պղծեսցէ զնա քահանայն. քանզի հարած է, բորոտութիւն գլխոյ է, կամ բորոտութիւն մաւրուաց:
31. Եւ եթէ տեսանիցէ քահանայն զարած հարածոյն. եւ ահա չիցէ զնստագոյն քան զմորթն, եւ ոչ մազ խարտեշացեալ ի նմա. զատուսցէ քահանայն զարած հարածին զեւթն աւր:
32. Եւ տեսանիցէ քահանայն զարածն յաւուրն եւթներորդի. եւ ահա չիցէ տարածեալ հարածն ընդ մորթն. եւ մազ խարտեշացեալ չիցէ ի նմա, եւ ոչ տեսիլ հարածոյն զնստագոյն իցէ քան զմորթն`
33. գերծցէ զնա. բայց զհարածն մի գերծցէ. եւ զատուսցէ քահանայն զարածն զեւթն աւր կրկին անգամ:
34. Եւ տեսանիցէ քահանայն զարածն յաւուրն եւթներորդի. եւ ահա չիցէ սփռեալ արածն ընդ մորթն յետ գերծանելոյն զնա. եւ տեսիլ հարածոյն չիցէ զնստագոյն քան զմմրթն, սրբեսցէ զնա քահանայն. եւ լուացեալ զձորձս իւր` եղիցի սուրբ:
35. Ապա թէ սփռելով սփռեսցի հարածն ընդ մորթն յետ գերծելոյ զնա եւ տեսանիցէ քահանայն, եւ ահա սփռեալ իցէ հարածն ընդ մորթն.
36. մի դարմանեսցէ զնա քահանայն վասն խարտեաշ մազոյն զի պիղծ է:
37. Իսկ եթէ կացցէ ի տեղւոջ հարածն ի մորթն, եւ մազ թուխ եկեսցէ ի նմա, ողջացաւ հարածն սուրբ է. եւ սրբեսցէ զնա քահանայն:
38. Եւ առն կամ կնոջ եթէ լինիցի ի մորթ մարմնոյ փայլուն ինչ` փայլածիւն լսնացեալ,
39. եւ տեսանիցէ քահանայն. եւ ահա ի մորթ մարմնոյ նորա փայլիւն փայլածուն` լսնացեալ. թեփուկ է տարածեալ ի մորթ մարմնոյ նորա. սուրբ է:
40. Եւ եթէ մաշտեսցի գլուխ ուրուք` կունտ է, սուրբ է:
41. Եւ եթէ յերեսաց կողմանէ մաշտիցի գլուխ նորա, ճեղ է` սուրբ է:
42. Ապա թէ լինիցի ի կնտութեան նորա կամ ի ճեղութեան արած սպիտակ կամ կարմրացեալ, բորոտութիւն թաքուցեալ է ի կնտութեան նորա կամ ի ճեղութեան:
43. Եւ տեսանիցէ զայն քահանայն, եւ ահա տեսիլ արածին սպիտակ իցէ, կամ կարմրագոյն ի կնդութեան նորա, կամ ի ճեղութեան, իբրեւ զտեսիլ բորոտութեան ի մորթ մարմնոյ նորա. այր բորոտեալ է` պիղծ է, պղծելով պղծեսցէ զնա քահանայն. զի ի գլուխ իւրում է արածն իւր:
44. Եւ բորոտ յորում իցէ արած,
45. հանդերձ նորա քակեալ լիցի, եւ գլուխ նորա մերկ, եւ զբերան իւր պատեսցէ. եւ պիղծ կոչեսցի
46. զամենայն աւուրս որչափ իցէ ի նմա արածն, պիղծ եղիցի. եւ պիղծ է, մեկնեալ նստցի, եւ արտաքոյ բանակին եղիցի բնակութիւն նորա:
47. Եւ ձորձ յորում լինիցի արած բորոտութեան եթէ ի ձորձ ասուի, եթէ ի ձորձ կտաւի,
48. եթէ յառէջ, եթէ ի թեղան, եթէ ի կտաւիս, եւ եթէ յասուիս. եթէ ի մորթ, եւ եթէ յամենայն մաշկ գործոյ:
49. Եւ լինիցի արած կանաջացեալ կամ կարմրացեալ` ի մորթ կամ ի հանդերձ. կամ յառէջ կամ ի թեզան, կամ յամենայն մորթ գործոյ, կամ յանաւթ ինչ. արած բորոտութեան իցէ. եւ ցուցցէ քահանային:
50. Եւ տեսցէ քահանայն զարածն, եւ զատուսցէ քահանայն զարածն զեւթն աւր:
51. Եւ տեսցէ քահանայն զարածն յաւուրն եւթներորդի. եթէ սփռեալ իցէ արածն ընդ ձորձն, կամ ընդ առէջ, կամ ընդ թեղան, կամ ընդ կտաւիս, կամ ընդ ասուիս, կամ ընդ մորթ. ըստ ամենայնի որպէս եւ գործիցի մորթ ի գործ, բնակ բորոտութեան է արածն: Պիղծ է.
52. եւ այրեսցէ զձորձն եթէ առէջ իցէ` եթէ թեզան, յասուեաց կամ ի կտաւեաց, կամ յամենայն մաշկեղէն նիւթոյ, յորում իցէ արածն. քանզի բնակ բորոտութեան է` հրով այրեսցի:
53. Ապա թէ տեսանիցէ քահանայն` եւ ահա չիցէ սփռեալ հարածն ընդ հանդերձն, կամ ընդ առէջն, կամ ընդ թեզանն, կամ ընդ ասրն, կամ ընդ կտաւն, կամ ընդ ամենայն անաւթ մաշկեղէն:
54. Հրաման տացէ քահանայն, եւ լուասցեն յորում իցէ արածն. եւ զատուսցէ քահանայն զարածն զեւթն աւր երկիցս անգամ:
55. Եւ տեսցէ քահանայն յետ լուանալոյ զարածն. եթէ չիցէ ինչ փոխեալ տեսիլ արածին. եւ ոչ սփռեալ իցէ արածն, պիղծ է, հրով այրեսցի. զի հաստատեալ է ի հանդերձն, կամ յառէջն, կամ ի թեզան:
56. Եւ եթէ տեսանիցէ քահանայն` եւ շլագոյն իցէ հարածն յետ լուանալոյ զնա, պատառեսցէ զայն ի հանդերձէ անտի, կամ ի մորթոյ, կամ յառիջէ, կամ ի թեզանոյ:
57. Ապա թէ դարձեալ երեւեսցի ի հանդերձին, կամ յառէջ, կամ ի թեզան, կամ յամենայն անաւթ մաշկեղէն, բորոտութիւն բորբոքեալ է. հրով այրեսցի յորում իցէ արածն, եթէ հանդերձ իցէ, եւ եթէ առէջ, եթէ թեզան,
58. եւ եթէ ամենայն անաւթ մաշկեղէն: Որ լուանայցի` եւ ելանիցէ ի նմանէ արածն, կրկին լուասցի` եւ սուրբ լիցի:
59. Այս աւրէն իցէ արածի բորոտութեան ասուեայ հանդերձի, կամ կտաւոյ, կամ առիջոյ, կամ թեզանոյ, կամ ամենայն մաշկեղէն անաւթոյ, ի սրբել կամ ի պղծել զնա:
Հաղորդում կայքում սխալի վերաբերյալ
Տվյալ հատվածում առկա է սխալ: