1. Խաւսեցաւ Տէր ընդ Մովսիսի եւ ասէ.
2. Խաւսեաց ընդ որդիսն Իսրայէլի եւ ասասցես ցնոսա. Տաւնս Տեառն զոր առնիցէք, կոչեցեալք եւ սուրբք` իցեն այնք իմ տաւնք:
3. Զվեց աւր գործեսցես զգործ, յաւուրն եւթներորդի շաբաթ է` հանգիստ անուանեալ սուրբ Տեառն. զամենայն գործ մի գործիցէք, զի շաբաթ Տեառն է յամենայն բնակութեան նոցա.
4. զի այնք են տաւնք Տեառն, եւ նոքա են անուանեալք սուրբք, զոր անուանիցէք ի տաւնս ձեր:
5. Յառաջնում ամսեանն ի տասն եւ ի չորս ամսոյն, ի մէջ երեկորեայցն զատիկ Տեառն է.
6. եւ յաւուրն հնգետասաներորդի նորին ամսոյ` տաւն բաղարջակերաց Տեառն. զեւթն աւր բաղարջակերիք:
7. Եւ աւրն առաջին անուանեալ սուրբ` եղիցի ձեզ սուրբ. զամենայն գործ սպասաւորութեան մի առնիցէք:
8. Եւ մատուսջիք ողջակէզ Տեառն` զեւթն աւր. եւ աւրն եւթներորդ կոչեցեալ սուրբ լիցի ձեզ. զամենայն գործ սպասաւորութեան մի գործիցէք:
9. Խաւսեցաւ Տէր ընդ Մովսիսի եւ ասէ.
10. Խաւսեաց ընդ որդիսն Իսրայէլի եւ ասասցես ցնոսա. Յորժամ մտանիցէք յերկիրն զոր ես տամ ձեզ. եւ հնձիցէք զհունձս նորա, բերիցէք զորա զպտուղ հնձոց ձերոց առ քահանայն.
11. եւ հանցէ զորայն առաջի Տեառն յընդունելութիւն առ ի ձէնջ: Եւ ի վաղիւ անդր աւուրն առաջնոյ հանցէ զայն քահանայն.
12. եւ արասցէ յաւուրն յորում իցէ զորայն, ոչխար անարատ տարեւոր յողջակէզ Տեառն.
13. եւ զոհն իւր երկուս տասանորդս ի նաշհոյ զանգեալ իւղով` զոհ Տեառն ի հոտ անուշից Տեառն. եւ նուէր նորա չորրորդ մասն դորակի գինւոյ.
14. եւ պան մի: Եւ ամենայն մուրկ փխրեալ մի ուտիցէք մինչչեւ յաւրն յորում մատուցանիցէք պատարագս Աստուծոյ ձերոյ` աւրէն յաւիտենական յազգս ձեր, յամենայն բնակութեան ձերում:
15. Եւ համարեսջիք ձեզ ի վաղուէ շաբաթուն յաւրէ յորմէ մատուցանիցէք զորայ ուխտին, եւթն եւթներորդ բովանդակս թուեսցես
16. մինչչեւ ցվաղիւն յետին եւթներորդին թուեցէք. Յսուն աւր, եւ մատուցանիցէք զոհ նոր Տեառն.
17. ի բնակութենէ ձերմէ մատուցանիցէք պանս նուիրի. երկուս պանս յերկուց տասներորդաց լինիցի պան մի. խմորեալք եփիցին յառաջնոց արդեանց Տեառն:
18. Եւ մատուցանիցէք ընդ հացիցն եւթն աւրւոջ անարատ տարեւոր, եւ զուարակ մի յանդւոյ, եւ խոյս երկուս անարատս. եւ եղիցին ողջակէզ Տեառն. եւ զոհք նոցա եւ նուէրք նոցա` զոհ ի հոտ անոշից Տեառն:
19. Եւ առնիցէք նոխազ մի յայծեաց վասն մեղաց. եւ երկուս գառինս տարեւորս ի զոհ խաղաղականաց`
20. ընդ պանից առաջնոց արմտեաց: Եւ նուիրեսցէ զայն քահանայն նուէր ընդ պանից առաջնոց արմտեաց յանդիման Տեառն. հանդերձ երկու գառամբք սրբեսցին Տեառն. քահանային որ մատուցանիցէ զնոսա` եղիցին:
21. Եւ կոչեսջիք զաւրն զայն անուանեալ կոչեցեալ` սուրբ եղիցի ձեզ. զամենայն գործ սպասաւորութեան մի գործիցէք ի նմա. աւրէն յաւիտենական եղիցի յազգս ձեր յամենայն բնակութեան ձերում:
22. Եւ յորժամ հնձիցէք զհունձս երկրի ձերոյ, մի առ հասարակ զնշխարն հնձոցն անդւոյ քո ի հնձելն քում ամփոփիցես. եւ զանկեալն ի հնձոց քոց մի ժողովիցես. այլ աղքատին եւ պանդխտին թողուցուս զայն, զի ես եմ Տէր Աստուած ձեր:
23. Խաւսեցաւ Տէր ընդ Մովսիսի եւ ասէ.
24. Խաւսեաց ընդ որդիսն Իսրայէլի եւ ասասցես. Յամսեանն եւթներորդի` որ աւր մի իցէ ամսւոյն, եղիցի ձեզ հանգիստ. Յիշատակ փողոց` կոչեցեալ սուրբ Տեառն.
25. զամենայն գործ սպասաւորութեան մի գործիցէք եւ մատուցանիցէք ողջակէզ Տեառն:
26. Խաւսեցաւ Տէր ընդ Մովսիսի եւ ասէ.
27. Ի տասներորդում ամսւոյն եւթներորդի` որ աւրն քաւութեան է, կոչեցեալ սուրբ եղիցի ձեզ. եւ խոնարհեցուսջիք զանձինս ձեր յիններորդ ամսեանն յերեկորեայ. եւ մատուսջիք ողջակէզ Տեառն:
28. Զամենայն գործ մի գործիցէք յաւուր յանմիկ, զի աւր քաւութեան է ձեզ. քաւել վասն ձեր առաջի Տեառն Աստուծոյ ձերոյ:
29. Ամենայն անձն որ ոչ խոնարհեսցի յաւուր յայնմիկ, սատակեսցի ի ժողովրդենէ իւրմէ:
30. Եւ ամենայն անձն որ գործիցէ յաւուր յայնմիկ, կորիցէ անձնն այն ի ժողովրդենէ իւրմէ.
31. զամենայն գործ մի գործիցէք. աւրէն յաւիտենական եղիցի յազգս ձեր` յամենայն բնակութիւնս ձեր:
32. Շաբաթ շաբաթուց եղիցի ձեզ. եւ խոնարհեցուսջիք զանձինս ձեր յիններորդ ամսւոյն յերեկորեայ եւ մինչչեւ յերեկոյն. շաբաթացուսջիք զշաբաթս ձեր:
33. Խաւսեցաւ Տէր ընդ Մովսիսի եւ ասէ.
34. Խաւսեաց ընդ որդիսն Իսրայէլի եւ ասասցես. Ի հնգետասաներորդի աւուր ամսեանն եւթներորդի տաւն տաղաւարահարաց եւթն աւր Տեառն.
35. եւ աւրն առաջին կոչեցեալ սուրբ. զամենայն գործ սպասաւորութեան մի գործիցէք:
36. Զեւթն աւր մատուցանիցէք ողջակէզ Տեառն.աււրն եւթներորդ կոչեցեալ սուրբ եղիցի ձեզ. եւ մատուցանիցէք ողջակէզս Տեառն, քանզի ելք են. զամենայն գործ սպասաւորութեան մի գործիցէք:
37. Այս են տաւնք` զորս կոչիցէք կոչեցեալ սուրբս` առ ի մատուցանելոյ ընծայ Տեառն` զողջակէզս եւ զոհս իւրեանց եւ նուէրսաււր ըստ աւրէ.
38. առանց շաբաթու Տեառն. եւ առանց ընձայիցն ձերոց, եւ առանց ամենայն ուխտիցն ձերոց, եւ առանց կամականացն ձերոց` զոր տայցէք Տեառն:
39. Եւ ի հնգետասաներորդում աւուր ամսոյն եւթներորդի` յորժամ բովանդակիցէք զարդիւնս երկրին, տաւնեսջիք Տեառն զեւթն աւր. յաւուրն առաջնում հանգիստ, եւ յաւուրն եւթներորդի հանգիստ:
40. Եւ առնուցուք ձեզ յաւուրն առաջնում պտուղ զգեղեցիկ ծառոց եւ կողերս յարմաւենեաց, եւ ոստս ի տերեւախիտ ծառոց եւ յուռեաց, եւ զոստս ի հագնեաց ի ձերոց. ուրախ լինել առաջի Տեառն զեւթն աւր:
41. Եւ տաւնեսջիք զնա տաւն Տեառն զեւթն աւր տարւոյն. աւրէն յաւիտենական յազգս ձեր. յամսեանն եւթներորդի տաւնեսջիք զնա:
42. Ի տաղաւարս բնակեսջիք զեւթն աւր. ամենայն բնակքն Իսրայէլի բնակեսցեն ի տաղաւարս.
43. զի գիտասցեն ազգք ձեր, թէ ի տաղաւարս բնակեցուցի զորդիսն Իսրայէլի` ի հանել ինձ զնոսա յերկրէն Եգիպտացւոց. Ես եմ Տէր Աստուած ձեր:
44. Եւ պատմեաց Մովսէս զտաւնսն Տեառն որդւոցն Իսրայէլի:
Հաղորդում կայքում սխալի վերաբերյալ
Տվյալ հատվածում առկա է սխալ: