Գլուխ 18

   
1. Խաւսեցաւ Տէր ընդ Մովսիսի` եւ ասէ.

2. Խաւսեաց ընդ որդիսն Իսրայէլի եւ ասասցես ցնոսա. Ես եմ Տէր Աստուած ձեր.

3. ըստ ամենայն գնացից յերկրին եգիպտացւոց, յորում պանդխտեցարուք` մի առնիցէք. եւ ըստ գնասցից երկրին Քահանացւոց, յորս տարայց զձեզ` մի առնիցէք. եւ ըստ աւրինաց նոցա մի գնայցէք:

4. Զիրաւունս իմ արասջիք եւ զհրամանս իմ պահեսջիք` գնալ ի նոսա: Ես եմ Տէր Աստուած ձեր.

5. եւ պահեսջիք զամենայն հրամանս իմ եւ զամենայն զիրաւունս իմ. եւ արասջիք զնոսա` զոր արարեալ մարդոյ կեցցէ նոքաւք. ես եմ Տէր Աստուած ձեր:

6. Մարդ ոք մարդ` առ ամենայն ընդանութիւն մարմնոյ իւրոյ մի մերձեսցի` յայտնել զառականս. զի ես եմ Տէր:

7. Զառականս հաւր քո եւ զառականս մաւր քո մի յայտնեսցես, զի մայր քո է. եւ մի յայտնեսցես զառականս նորա:

8. Զառականս կնոջ հաւր քո մի յայտնեսցես, զի առականք հաւր քո են:

9. Զառականս քեռ քո` թէ առ ի հաւրէ իցէ, թէ առ ի մաւրէ` ի տան ծնեալ կամ արտաքոյ, մի յայտնեսցես զառականս նորա:

10. Զառականս դստեր ուստեր քո, կամ դստեր քո` մի յայտնեսցես զառականս նոցա. զի առականք քո են:

11. Զառականս դստեր կնոջ հաւր քո մի յայտնեսցես, զի համհաւրեայ քոյր քո է. մի յայտնեսցես զառականս նորա:

12. Զառականս հաւրաքեռ քո մի յայտնեսցես. զի ընդանի հաւր քո է:

13. Զառականս մաւրաքեռ քո մի յայտնեսցես. զի ընդանի մաւր քո է:

14. Զառականս հաւրեղբաւր քում մի յայտնեսցես եւ առ կին նորա մի մտանիցես. զի ազգական քո է:

15. Զառականս նուոյ քո մի յայտնեսցես. զի կին որդւոյ քո է. մի յայտնեսցես զառականս նորա: Եւ զդուստր ուստեր նորա կամ զդուստր դստեր նորա` մի առնուցուս յայտնել զառականս նոցա, զի ընդանի են քո. ամպարշտութիւն է:

16. Զառականս կնոջ եղբաւր քո մի յայտնեսցես. զի առականք եղբաւր քում են:

17. Զառականս կնոջ եւ դստեր իւրոյ մի յայտնեսցես: Զուստր դստեր նորա եւ զդուստր դստեր նորա` մի առնուցուս յայտնել զառականս նոցա. զի ընդանի քո են. ամպարշտութիւն է:

18. Կին առ քերբ իւրով մի առնուցուս նախանձ ընդդէմ` յայտնել զառականս նորա, առ նովաւ կենդանւոյն:

19. Եւ առ կին դաշտանի ի պղծութեան իւրոյ մի մտանիցես` յայտնել զառականս նորա:

20. Եւ ի կին ընկերի քո մի տայցես զարութիւն սերման քո` առ ի պղծելոյ ընդ նմա:

21. Եւ ի սերմանէ քումմէ մի տայցես ծառայել իշխանին, եւ մի պղծեսցես զանուն իմ սուրբ. զի ես եմ Տէր:

22. Եւ ընդ նուի մի մտանիցես զմուտ կանանցի, զի պղծութիւն է այն:

23. Եւ յամենայն անասուն ոչ տացես զարութիւն սերման քո` առ ի պղծելոյ ընդ նմա: Եւ կին մի կայցէ առաջի ամենայն անասնոյ` մտաբերել ի նա. զի գարշելի է այն:

24. Եւ մի պղծիցիք այնու ամենայնիւ. զի այնու ամենայնիւ պղծեցան ազգքն, զոր ես մերժեցից յերեսաց ձերոց:

25. Եւ եղեւ գարշելի երկիրն, եւ հանդէս արարի անաւրէնութեան նորա ի նմանէ. եւ տաղտակացաւ երկիրն ի բնակչաց իւրոց:

26. Եւ պահեցէք զաւրէնս իմ եւ զամենայն հրամանս իմ. եւ մի առնիցէք յամենայն պղծութեանցն այնոցիկ` բնակն եւ եկն եւ պանդուխտն, որ ի ձեզ իցէ:

27. Զի զայն ամենայն պղծութիւնս արարին մարդիկ երկրին, որ էին անդ յառաջ քան զձեզ. եւ պղծեցաւ երկիրն.

28. զի մի տաղտկանայցէ եւ ձեզ երկիրն` ի պղծել ձեր զնա. որպէս տաղտկացաւ առ ազգաւքն` որ էին յառաջ քան զձեզ. եւ պղծեցաւ երկիրն.

29. Զի ամենայն մարդ` որ արասցէ յամենայն պղծութեանցն այնոցիկ, սատակեսցին անձինքն` որ առնիցեն զայն ի միջոյ ժողովրդեան իւրեանց:

30. Եւ պահեսջիք զպահպանութիւնս իմ, զի մի առնիցէք յամենայն պղծութեանցն աւրինացն` որ գործեցան յառաջ քան զձեզ. եւ մի պղծիցիք նոքաւք, զի ես եմ Տէր Աստուած ձեր: