Գլուխ 7

   
1. Եւ այս աւրէն իցէ խոյին` որ վասն յանցանացն իցէ: Զի սրբութիւն սրբութեանց է:

2. Ի տեղւոջ ուր սպանանիցեն զողջակէզսն, սպանցեն եւ զխոյն յանցանաց առաջի Տեառն. եւ զարիւնն հեղցէ առ յատակաւ սեղանոյն ողջակիզաց շուրջանակի:

3. Եւ զամենայն ճարպ նորա առցէ, եւ զմկանն. եւ զճարպ թաղանթ քաղրթին. եւ զամենայն ճարպ փորոտւոյն.

4. եւ զերիկամունսն զերկոսին. եւ զճարպն որ ի վերայ նոցա առ մսանամբքն. եւ զլերդաբոյթն երիկամամքն հանդերձ կորզեսցէ:

5. Եւ հանցէ զայն քահանայն ի սեղանն պտուղ Տեառն` զի վասն յանցանաց է:

6. Ամենայն արու քահանային կերիցեն զայն. ի սուրբ տեղւոջ կերիցեն զայն, քանզի սրբութիւն սրբութեանց է:

7. Որպէս զվասն մեղացն` նոյնպէս զվասն յանցանացն: 0րէն` մի եւ նոյն կացցէ նոցա. եւ քահանայն որ քաւիցէ նովաւ` նմա լիցի:

8. Եւ քահանայն` որ մատուցանիցէ զողջակէզս ինչ մարդոյ, մորթ ողջակիզին զոր մատուցանիցէ` նմա լիցի:

9. Եւ զամենայն զոհ որ գործիցի ի թոնրի. եւ ամենայն որ գործիցի ի կասկարայս` կամ ի տապակի, քահանայինն որ մատուցանիցէ զայն` եղիցի:

10. Եւ ամնայն զոհ զանգեալ իւղով` եւ որ ոչ չիցէ զանգեալ, ամենեցուն որդւոցն Ահարոնի իւրաքանչիւր ումեք եղիցի հասարակաց:

11. Այս աւրէն է զոհիցն փրկութեան` զոր մատուցանիցեն Տեառն:

12. Իսկ եթէ վասն գոհութեան մատուցանիցէ զայն, մատուսցէ վասն զոհի գոհութեանն պանս բաղարջս ի նաշհւոյ զանգեալ իւղով, եւ քաքարս բաղարջս աւծեալ իւղով, եւ նաշիհ զանգեալ իւղով. շաւթիւք բաղարջ

13. հացիւ մատուսցէ զպատարագն իւր, ի վերայ զոհին գոհութեան եւ փրկութեան. եւ մատուսցէ մի ինչ յամենայն պատարագաց իւրոց նուէր Տեառն:

14. Եւ այն քահանային որ հեղուցու զարիւնն` փրկութեան եղիցի. եւ միս զոհին գոհութեան եւ փրկութեան` նորին լինիցի:

15. Յորում աւուր պատարագիցի` կերիցի. եւ մի թողուցուն ի նմանէ յայգ:

16. Եւ եթէ կամաւ քո ուխտս մատուցանիցէ Տեառն զպատարագն իւր. յաւուր յորում մատուցանիցի զոհն` կերիցէ, եւ ի վաղիւն: Եւ մնացեալն ի մսոյ զոհին

17. մինչչեւ յաւրն երրորդ` հրով այրեսցի:

18. Ապա թէ ուտելով ուտիցի ի մսոյ զոհին փրկութեան իւրոյ յաւուրն երրորդի. մի լինիցի ընդունելի մատուցանելեացն, եւ մի համարեսցի նմա այն. քանզի ապախտ եւ պղծութիւն է. եւ անձն` որ կերիցէ ի նմանէ, մեղս առնիցէ:

19. Եւ միս` որ մերձեսցի յամենայն պղծութիւնս, մի կերիցի, այլ հրով այրեսցի. ամենայն սուրբ կերիցէ զմիսն:

20. Եւ անձն` որ կերիցէ ի զոհէ փրկութեանն որ իցէ Տեառն: Եւ պծութիւն նորա ի նմա իցէ, կորիցէ անձն այն ի ժողովրդենէ իւրմէ:

21. Եւ անձն` որ մերձեսցի յամենայն իրս պղծութեան. ի պղծութիւնս մարդոյ` կամ յանասնոց պղծոց, կամ յամենայն գարշելի պղծոց, եւ կերիցէ ի մսոյ զոհին փրկութեան որ իցէ Տեառն, կորիցէ ի ժողորդենէ իւրմէ:

22. Խաւսեցաւ Տէր ընդ Մովսիսի` եւ ասէ.

23. Խաւսեաց ընդ որդիսդ Իսրայէլի եւ ասասցես. Զամենայն ճարպ զարջառոյ եւ զոչխարի եւ զայծեաց մի ուտիցէք:

24. Եւ ճարպ մեռելոտւոյ եւ գազանաբեկաց` լինիցի յամենայն գործ. բայց ի կերակուր` մի ուտիցի:

25. Եւ ամենայն որ ուտիցէ ի ճարպոյ անասնոց. զոր մատուցանիցէք պտուղ Տեառն, կորիցէ անձն այն ի ժողովուրդենէ իւրմէ:

26. Զամենայն արիւն մի ուտիցէք յամենայն բնակութիւնս ձեր, ի թռչնոց եւ յամենայն անասնոց:

27. Ամենայն անձն որ կերիցէ արիւն` կորիցէ ի ժողովրդենէ իւրմէ:

28. Խաւսեցաւ Տէր ընդ Մովսիսի` եւ ասէ.

29. Խաւսեաց ընդ որդիսդ Իսրայէլի` եւ ասասցես. Որ մատուցանիցէ զոհ փրկութեան Տեառն, ածցէ զպատարագն իւր Տեառն ի զոհէ փրկութեան իւրոյ:

30. Ձեռք նորա մատուսցեն պտուղ Տեառն. զճարպ երբծոյն, եւ զլերդաբոյթն երիկամամբքն հանդերձ մատուսցէ դնել առաջի Տեառն.

31. եւ հանցէ զայն քահանայն ի սեղանն: Եւ եղիցի երբուծն Ահարոնի եւ որդւոց նորա.

32. եւ զերին եւ զաջոյ` տացէք հաս քահանային ի զոհից փրկութեան ձերոյ:

33. Որ մատուցանիցէ զարիւնն փրկութեան եւ զճարպն առ ի յորդւոցն Ահարովնի, նորա լիցի երին աջոյ ի մասն:

34. Զի զերբուծն վերադրաց եւ զերին նուիրաց` առի ես յորդւոցն Իսրայէլի ի զոհիցն փրկութեանն ձերոյ. եւ ետու զայն Ահարոնի քահանայի եւ որդւոց նորա. աւրէն յաւիտենական յորդւոցն Իսրայէլի:

35. Այս աւծումն է Ահարոնի եւ որդւոց նորա ի պտղոցն Տեառն. յաւուր յորում մատուցանէր զնոսա Տեառն. որպէս պատուիրեաց Տէր տալ նոցա,

36. յաւուր յորում աւծ զնոսա յորդւոցն Իսրայէլի. աւրէն յաւիտենական յազգս նոցա:

37. Այս աւրէն է ողջակիզացն, եւ զոհից, եւ վասն մեղացն, եւ վասն յանցանաց, եւ վասն կատարմանն, եւ զոհին փրկութեանն:

38. Որպէս պատուիրեաց Տէր Մովսիսի ի լերինն Սինայ. յաւուր յորում պատուիրեաց Տէր որդւոցն Իսրայէլի, մատուցանել զպատարագս իւրեանց առաջի Տեառն յանապատին Սինայ: