1. Բանն որ եղեւ առ Երեմիա՝ ի Տեառնէ եւ ասէ։
2. Լուարուք զբան ուխտիս այսորիկ, եւ խաւսեցարուք ընդ արսդ Յուդայ՝ եւ ընդ բնակիչսդ Երուսաղէմի։
3. Եւ ասասցես ցնոսա. Այսպէս ասէ Տէր Աստուած Իսրայէլի. Անիծեալ լիցի մարդն որ ոչ լուիցէ բանից ուխտիս այսորիկ։
4 զոր պատուիրեցի հարցն ձերոց, յաւուր յորում հանի զնոսա յերկրէն Եգիպտացւոց՝ ի հնոցէ երկաթոյն. եւ ասեմ. Լուարուք ձայնի իմում, եւ արարէք զայդ ըստ ամենայնի զոր ինչ պատուիրեմ ձեզ. եւ եղիջիք ինձ ի ժողովուրդ, եւ ես եղէց ձեզ յԱստուած։
5. Եւ հաստատեցից զերդումն իմ զոր երդուայ հարցն ձերոց, տալ նոցա զերկիրն որ բղխէ զմեղր եւ զկաթն. որպէս եւ այսաւր։ Պատասխանի ետու՝ եւ ասեմ. Այո Տէր՝ եղիցի։
6. Եւ ասէ ցիս Տէր. Ընթերցիր զամենայն զբանսդ զայդոսիկ ի քաղաքսդ Յուդայ՝ եւ արտաքոյ Երուսաղէմի, եւ ասասցես. Լուարուք զպատգամ ուխտիդ այդորիկ, եւ արարէք զդոսա։
7. Զի վկայութեամբ եդի զվկայութիւն հարցն ձերոց՝ յաւուրն հանելոյ իմոյ զնոսա յերկրէն Եգիպտացւոց, եւ մինչեւ ցայսաւր. կանխել ընդ առաւաւտս՝ եւ դնել վկայութիւն՝ եւ ասել, լուարուք ձայնի իմում, եւ ոչ լուան։
8. Եւ խոտորեցուցին զլսելիս իւրեանց, եւ գնացին այր ըստ յաւժարութեան սրտից իւրեանց ի չարիս։ եւ ածից ի վերայ նոցա զամենայն բանս ուխտիս այսորիկ՝ զոր պատուիրեցի նոցա առնել՝ եւ ոչ արարին։
9. Եւ ասէ ցիս Տէր. Գտաւ կնճիռն յարսդ յայդոսիկ՝ եւ ի բնակիչսդ Երուսաղէմի։
10. Դարձան յանիրաւութիւնս հարցն իւրեանց առաջնոց, որք ոչ կամեցան լսել բանից իմոց. եւ ահաւադիկ երթան զհետ աստուածոց աւտարաց ծառայել նոցա։ եւ ցրեցին տունն Իսրայէլի եւ տունն Յուդայ զուխտն իմ, զոր ուխտեցի ընդ հարս նոցա։
11. Վասն այնորիկ այսպէս ասէ Տէր. Ահաւադիկ ես ածից ի վերայ դոցա չարիս, յորոց ոչ կարասցեն ելանել. եւ աղաղակեսցեն առ իս՝ եւ ոչ լուայց նոցա։
12. Եւ գնասցեն քաղաքք Յուդայ՝ եւ բնակիչք Երուսաղէմի, եւ աղաղակեսցեն առ դիսն իւրեանց որոց արկանէին խունկս. եւ փրկելով ոչ փրկեսցեն զնոսա ի ժամանակի չարեաց իւրեանց։
13. Զի ըստ թուոյ քաղաքացն քոց էին դիքն քո Յուդայ, եւ ըստ թուոյ անցիցն Երուսաղէմի կարգեցէք բագինս եւ սեղանս ամաւթոյ, արկանել խունկս Բահաղու։
14. Եւ դու՝ մի կար յաղաւթս վասն ժողովրդեանդ այդորիկ, եւ մի աղաչեր վասն դոցա խնդրուածովք, եւ պաղատիր. զի ոչ լսեմ ի ժամանակի յորում կարդասցեն առ իս՝ ի ժամանակի չարեաց իւրեանց։
15. Զի ընդ սիրելին ասեմ՝ զի ի ներքս ի տաճարին իմում արար գարշելիս. միթէ աղա՞ւթք, եւ միս նուիրեալ՝ անցուցանիցեն ի քէն զչարիս քո. կամ թէ այնպիսեա՞ւք ապրիցիս։
16. Ձիթենի գեղեցիկ վարսաւոր տեսլեամբ կոչեաց Տէր զանուն քո. ի ձայնէ թլփատութեան նոցա. մեծ է նեղութիւն ի վերայ քոյ, անպիտանացան ոստք քո։
17. Եւ տէր Աստուած զաւրութեանց որ տնկեաց զքեզ՝ խաւսեցաւ ի վերայ քո չարիս փոխանակ չարեաց տանն Իսրայէլի, եւ տանն Յուդայ։ զի արարին անձամբ անձանց ի բարկացուցանել զիս, յարկանել նոցա խունկս Բահաղու։
18. Տէր ծանո ինձ եւ ծանեայց. յայնժամ տեսի զգործս նոցա։
19. Ես իբրեւ զգառն անմեղ վարեալ ի սպանդ. ոչ գիտացի թէ զինէն խորհեցան խորհուրդ չար, եւ ասեն. Եկայք արկցուք փայտ ի հաց նորա, եւ ջնջեսցուք զնա յերկրէն կենդանեաց. եւ անուն նորա մի եւս յիշեսցի։
20. Տէր զաւրութեանց որ ընտրես զիրաւունս, եւ քննես զերիկամունս եւ զսիրտս, տեսից առ ի քէն զվրէժխնդրութիւն առ ի նոսա. զի քեզ յայտնեցի զիրաւունս իմ։
21. Վասն այնորիկ այսպէս ասէ Տէր. Ի վերայ արանցն Անաթովթայ որ խնդրեն զանձն քո, եւ ասեն. Մի մարգարէանար վասն մեր, ապա թէ ոչ՝ մեռանիս ի ձեռաց մերոց։
22. Վասն այդորիկ այսպէս ասէ Տէր զաւրութեանց. Ահաւասիկ ես այց արարից ի վերայ նոցա. երիտասարդք նոցա սրով մեռցին, եւ ուստերք եւ դստերք նոցա սովով վախճանեսցին։
23. Եւ մնացորդք ոչ եղիցի նոցա. զի ածից չարիս ի վերայ բնակչացն Անաթովթայ յամի այցելութեան նոցա։
Հաղորդում կայքում սխալի վերաբերյալ
Տվյալ հատվածում առկա է սխալ: