1. Ի սկզբան թագաւորութեանն Յովակիմայ որդւոյ Յովսիայ՝ արքայի Յուդայ. եղեւ բանս այս առ Երեմիայ ի Տեառնէ՝ եւ ասէ.
2. Այսպէս ասէ Տէր ցիս. Արա դու քեզ կապանս եւ անուրս՝ եւ արկ ընդ պարանոց քո։
3. եւ առաքես զայն առ թագաւորն եդովմայեցւոց, եւ առ թագաւորն մովաբացւոց, եւ առ թագաւոր որդւոցն Ամովնայ, եւ առ թագաւորն Տիւրոսի, եւ առ թագաւորն սիդոնացւոց, ի ձեռն հրեշտակաց նոցա որ գան յԵրուսաղէմ առ Սեդեկիա արքայ Յուդայ։
4. եւ պատուիրեսցես նոցա ասել ցտեարս իւրեանց. Այսպէս ասէ Տէր զաւրութեանց Աստուած Իսրայէլի. Այսպէս ասասջիք ցտեարսն ձեր։
5. ես արարի զերկիր, եւ զմարդիկ, եւ զանասուն, եւ որ ինչ ի վերայ երեսաց երկրի, զաւրութեամբ իմով մեծաւ, եւ բազկաւ իւրով բարձու. եւ տաց զնա՝ ում եւ կամ իցէ առաջի աչաց իմոց։
6. Եւ արդ՝ ես եմ որ ետու զամենայն երկիր ի ձեռս Նաբուքոդոնոսորայ արքային բաբելացւոց ծառայի իմոյ. նաեւ զգազանս անապատի ի գործ արկանել, եւ ետու նմա ի ծառայութիւն։
7. ծառայեսցեն նմա ամենայն ազգք, եւ որդւոց նորա, եւ որդւոց որդւոց նորա, մինչեւ եկեսցէ ժամանակ բարկութեան երկրի նորա, եւ նորա. եւ ծառայեսցեն նմա ազգ բազումք եւ թագաւորք մեծամեծք։
8. Եւ եղիցի՝ ազգ եւ թագաւորութիւն որ ոչ ծառայեսցեն Նաբուքոդոնոսորայ արքայի բաբելացւոց, եւ որք միանգամ ոչ մուծցեն զպարանոցս իւրեանց ընդ լծով արքային բաբելացւոց. սրով եւ սովով եւ մահուամբ արարից այցելութիւն ի վերայազգին այնմիկ՝ ասէ Տէր. մինչեւ սատակեսցին ի ձեռաց նորա։
9. Եւ դուք մի լսէք մարգարէից ձերոց, եւըղձութեանց ձերոց, եւ երազոց ձերոց, եւ կիւսից ձերոց, եւ հաւահմայից ձերոց, եւ կախարդաց ձերոց. որք ասեն ձեզ թէ ոչ հարկիցէք արքային բաբելացւոց.
10. զի սուտ մարգարէանան դոքա ձեզ՝ առ ի հեռացուցանելոյ զձեզ յերկրէդ ձերմէ. եւ ցրուեցից զձեզ եւ կորիջիք։
11. Եւ ազգ որ մուծանիցէ զպարանոց իւր ընդ լծով արքային բաբելացւոց, եւ կայցեն նմա ի հարկի՝ թողից զնա յերկրի իւրում՝ ասէ Տէր. գործեսցէ զնա, եւ բնակեսցէ ի նմա։
12. Եւ առ Սեդեկիա արքայ Յուդայ խաւսեցայ ըստ ամենայն բանիցս այսոցիկ, եւ ասեմ. մուծէք զպարանոցս ձեր ընդ լծով արքային բաբելացւոց, եւ ծառայեցէք նմա եւ ազգի նորա՝ եւ կեցջիք։
13. Եւ ընդէ՞ր մեռանիք դուք, եւ ժողովուրդ քո, սրով եւ սովով եւ մահուամբ. որպէս եւ խաւսեցաւ Տէր առ ազգ՝ որ ոչ ծառայիցէ արքային բաբելացւոց։
14. Մի լսէք բանից մարգարէիցն որ ասեն ձեզ՝ թէ մի հարկիք արքային բաբելացւոց. զուր մարգարէանան նոքա ձեզ։
15. Զի ոչ առաքեցի զնոսա՝ ասէ Տէր։ եւ նոքա մարգարէանան յանուն իմ սուտ, առ ի կորուսանելոյ զձեզ. եւ կորիցէք դուք եւ մարգարէքդ՝ որ մարգարէանան ձեզ տարապարտուց ստութեամբ։
16. Եւ ցքահանայս եւ ցամենայն ժողովուրդն՝ զոր խաւսեցայ ասասցես. Այսպէս ասէ Տէր. Մի լսէք բանից մարգարէիցն որ մարգարէանան ձեզ՝ եւ ասեն. Ահա սպաս տան Տեառն դարձցի ի Բաբելոնէ այժմ ընդ հուպ։ զուր մարգարէանան ձեզ, եւ ես ոչ առաքեցի զնոսա։
17. Մի լսէք նոցա. այլ ծառայեցէք արքային բաբելացւոց՝ եւ կեցջիք։ եւ ընդէ՞ր լինիցի քաղաքդ աւերակ։
18. Եթէ մարգարէք իցեն, եւ իցէ բան Տեառն առ նոսա, եկեսցեն եւ յանդիման լիցին ինձ։ Զի այսպէս ասէ Տէր. Եւ մնացեալ սպասն զոր ոչ առ արքայն բաբելացւոց՝ յորժամ գերեաց զՅեքոնիա յԵրուսաղէմէ, ի Բաբելոն երթիցէ՝ ասէ Տէր զաւրութեանց։ Այլ վասն չերթալոյ սպասուցն մնացելոց ի տան Տեառն եւ ի տան թագաւորին Յուդայ յԵրուսաղէմէ ի Բաբելոն։
19. Այսպէս ասէ Տէր զաւրութեանց վասն սեանցն, եւ վասն ծովուն, եւ վասն մեքենովթիցն, եւ մնացորդաց սպասուցն՝ որ մնացին ի քաղաքիդ յայդմիկ.
20. զոր ոչ առ Նաբուքոդոնոսոր արքայ բաբելացւոց, ի գերելն իւրում զՅեքոնիա որդի Յովակիմայ արքայի Յուդայ յԵրուսաղէմէ ի Բաբելովն, եւ զամենայն ազատսն Յուդայ եւ զԵրուսաղէմի։
21. Այսպէս ասէ Տէր զաւրութեանց՝ Աստուած Իսրայէլի. Վասն սպասուցն մնացելոց ի տան Տեառն, եւ ի տան թագաւորին Յուդայ՝ եւ յԵրուսաղէմ։
22. Ի Բաբելովն երթիցեն, եւ անդ եղիցին՝ մինչեւ յաւրն յորում այց արարից նոցա։ այսպէս ասէ Տէր. Հանից զնոսա, եւ դարձուցից ի տեղիդ յայդ։
Հաղորդում կայքում սխալի վերաբերյալ
Տվյալ հատվածում առկա է սխալ: