1. Բան որ եղեւ առ Երեմիա ի Տեառնէ. յորժամ առաքեաց առ նա Սեդեկիա զՊասքովր որդի Մելքեայ, եւ զՍոփոնիա որդի Մասերայ զքահանայ՝ եւ ասէ.
2. Հարց վասն մեր զՏէր. զի Նաբուքոդոնոսոր արքայ բաբելացւոց եհաս ի վերայ մեր՝ թերեւս արասցէ Տէր ի վերայ մեր՝ ըստ ամենայն իւրոցն սքանչելեաց, եւ դարձուսցէ ի մէնջ։
3. Եւ ասէ ցնոսա Երեմիայ. Այսպէս ասացէք ցՍեդեկիա։
4. Այսպէս ասէ Տէր Աստուած Իսրայէլի. Ահաւադիկ ես դարձուցանեմ զզէնս ձեր ի պատերազմի՝ զոր ունիք ի ձեռս ձեր, որով դուք պատերազմիք ընդ արքային բաբելացւոց՝ եւ ընդ քաղդեացիս որք պաշարեցին զձեզ արտաքոյ պարսպացդ։ եւ ժողովեցից զնոսա ի մէջ քաղաքիդ այդորիկ։
5. Եւ տաց պատերազմ ես իսկ ընդ ձեզ՝ վերացեալ ձեռամբ՝ եւ բարձրացեալ բազկաւ, սրտմտութեամբ եւ բարկութեամբ եւ մեծաւ ցասմամբ.
6. եւ հարից զամենայն բնակիչս քաղաքիդ այդորիկ, զմարդ եւ զանասուն մեծաւ մահուամբ՝ եւ մեռցին։
7. Եւ յետ այնորիկ՝ այսպէս ասէ Տէր. մատնեցից զՍեդեկիա արքայ Յուդայ՝ եւ զծառայս իւր եւ զժողովուրդ՝ որ մնացեալ իցէ ի քաղաքիդ յայդմիկ, ի մահուանէ, եւ ի սրոյ, եւ ի սովոյ, ի ձեռս Նաբուքոդոնոսորայ արքայի բաբելացւոց, եւ ի ձեռս թշնամեաց իւրեանց, եւ ի ձեռս որ խնդրէին զանձինս դոցա. եւ կոտորեսցեն զդոսա ի բերան սրոյ, եւ ոչ խնայեցից ի դոսա, եւ ոչ ողորմեցայց դոցա, եւ ոչ գթացայց ի դոսա։
8. Եւ ցժողովուրդն ասասցես. Այսպէս ասէ Տէր. Ահաւադիկ ես եդի առաջի երեսաց ձերոց զճանապարհս կենաց, եւ զճանապարհ մահու։
9. Որ նստցի ի քաղաքիդ յայդմիկ՝ սրով եւ սովով եւ մահու մեռցի. եւ որ ելանէ՝ կացցէ առաջի քաղդէացւոցն, որոց պաշարեալն է զձեզ՝ կեցցէ. անձն իւր ինքեան պարգեւ լիցի եւ կեցցէ։
10. Զի հաստատեցի զերեսս իմ ի վերայ քաղաքիդ այդորիկ ի չարիս՝ եւ ոչ ի բարիս՝ ասէ Տէր. ի ձեռս թագաւորին բաբելացւոց մատնեսցի, եւ այրեսցէ զդա հրով։
11. Տուն արքայիդ Յուդայ
12. եւ տուն Դաւթի, լուարուք զպատգամ Տեառն. Այսպէս ասէ Տէր. Դատեցարուք ընդ առաւաւտս դատաստան, եւ իրաւացուցէք իրաւունս. փրկեցէք զյափշտակեալն ի ձեռաց զրկողին իւրոյ, զի մի բորբոքեսցի իբրեւ զհուր բարկութիւն իմ. վառեսցի՝ եւ ոչ ոք իցէ որ շիջուցանիցէ յերեսաց անիրաւութեան գնացից ձերոց։
13. Ահաւադիկ ես ի վերայ քո որ բնակեալդ ես ի ծործորս դաշտականս Տիւրոսի՝ ասէ Տէր։ որք ասէին՝ ո՞ զարհուրեցուսցէ զմեզ, կամ ո՞ մտանիցէ ի բնակութիւնս մեր։
14. Եւ արարից այցելութիւն ի վերայ ձեր, ըստ չարութեան գնացից ձերոց՝ ասէ Տէր. եւ վառեցից զհուր յանտառս նորա եւ կերիցէ շուրջ զնովաւ զամենայն։
Հաղորդում կայքում սխալի վերաբերյալ
Տվյալ հատվածում առկա է սխալ: