1. Եւ եղեւ իբրեւ դադարեաց Երեմիա ի խաւսելոյ ընդ ամենայն ժողովրդեանն զամենայն բանս Տեառն Աստուծոյ նոցա, զորս առաքեաց Տէր Աստուած նոցա առ նոսա։
2. Եւ ասեն՝ Յեզոնիա որդի Ովսէի, եւ Յովնան որդի Կարէի, եւ ամենայն արք ամբարտաւանք՝ ցԵրեմիա. Սուտ խաւսիս դու, ոչ առաքեաց զքեզ Տէր Աստուած մեր առ մեզ՝ ասել, թէ մի մտանէք յԵգիպտոս բնակել անդ։
3. այլ Բարուք որդի Ներեայ գրգռէ զքեզ ընդ մեզ, զի տացես զմեզ ի ձեռս քաղդէացւոց կոտորել՝ եւ տանել զմեզ գերի ի Բաբելովն։
4. Եւ ոչ լուան Յովնան որդի Կարէի եւ ամենայն զաւրավարք զաւրացն եւ ամենայն ժողովուրդն՝ ձայնի Տեառն բնակել յերկրին Յուդայ։
5. Եւ առ Յովնան որդի Կարէի՝ եւ ամենայն զաւրավարք զաւրացն զամենայն մնացորդս Յուդայ՝ որ դարձեալ էին յամենայն ազգաց՝ ուր ցրուեալ էին անդր, բնակել յերկրին Յուդա։
6. զարս եւ զկանայս եւ զմանկտիս, եւ զդստերս թագաւորին, եւ զանձինս որ մնացեալ էին ի Նաբուզարդանայ դահճապետէ առ Գոդողիա որդի Աքիկամայ որդւոյ Սափանայ. եւ զԵրեմիա մարգարէ, եւ զԲարուք որդի Ներեայ։
7. եւ գնացին յերկիրն Եգիպտացւոց, վասն չլսելոյ ձայնի Տեառն. եւ չոգան ի Տափնաս։
8. Եւ եղեւ բան Տեառն առ Երեմիա ի Տափնաս՝ եւ ասէ։
9. Առ դու քեզ քարինս մեծամեծս, եւ թաղեա զնոսա յաղիւսադրանն թաքըստեան, ի մուտս ապարանիցն փարաւոնի ի Տափնաս առաջի արանցդ Յուդայ,
10. եւ ասասցես ցնոսա. Այսպէս ասէ Տէր զաւրութեանց Աստուած Իսրայէլի. Ահաւասիկ ես առաքեմ՝ եւ ածեմ զՆաբուքոդոնոսոր արքայ բաբելացւոց զծառայ իմ, եւ արկցէ զաթոռ իւր ի վերայ քարանցդ այդոցիկ զորս ծածկեցեր. եւ առցէ զզէն իւր զինքեամբ ի վերայ դոցա։
11. եւ մտցէ հարցէ զերկիրդ Եգիպտացւոց, զոր ի մահ՝ ի մահ, եւ զոր ի գերութիւն՝ ի գերութիւն, եւ զոր ի սուր՝ ի սուր։
12. Եւ արկցէ հուր ի տուն աստուածոց նոցա՝ եւ այրեսցէ զնոսա, եւ տարցի գերի։ եւ որոնեսցէ զերկիրդ Եգիպտացւոց. որպէս որոնեսցէ հովիւ զհանդերձս իւր, եւ ելցէ այտի խաղաղութեամբ։
13. եւ խորտակեսցէ զսիւնս Արեգ քաղաքի, որ է յերկրիդ Եգիպտացւոց, եւ զմեհեանս դից նոցա այրեսցէ հրով։
Հաղորդում կայքում սխալի վերաբերյալ
Տվյալ հատվածում առկա է սխալ: