1. Բանն Տեառն որ եղեւ առ Երեմիայ, ի վերայ ամենայն հրէիցն որ բնակեալ էին յերկրին Եգիպտացւոց, եւ որք նստէին ի Մագդովղ, եւ ի Տափնաս, եւ ի Մեմփիս, եւ յերկրին Պաթուրէս, եւ ասէ.
2. Այսպէս ասէ Տէր զաւրութեանց Աստուած Իսրայէլի. Դուք ինքնին իսկ գիտէք զամենայն չարիս զոր ածի ի վերայ Երուսաղէմի, եւ ի վերայ ամենայն քաղաքացն Հրեաստանի. եւ ահա կան աւերակ այսաւր ի բնակչաց,
3. յերեսաց չարեաց իւրեանց զոր արարին ի դառնացուցանել զիս։ զի գնացին խունկս արկանել եւ պաշտել զաստուածս աւտարս, զոր ոչ գիտէիք դուք եւ հարքն ձեր։
4. Եւ առաքեցի առ ձեզ զամենայն զծառայս իմ զմարգարէս ընդ առաւաւտս առաւաւտս, եւ ասէի՝ մի գործէք զիրս պղծութեանդ այդորիկ զոր ատեցի։
5. Եւ ոչ լուան ինձ, եւ ոչ խոնարհեցուցին զունկն իւրեանց դառնալ ի չարեացն իւրեանց՝ չարկանել խունկս աստուածոց աւտարաց։
6. եւ կաթեաց բարկութիւն սրտմտութեան իմոյ, եւ բորբոքեցաւ ի դրունս Յուդայ՝ եւ արտաքոյ Երուսաղէմի, եւ եղեն յաւեր եւ յանապատ որպէս եւ այսաւր։
7. Եւ արդ այսպէս ասէ Տէր Սաբաւովթ՝ Աստուած Իսրայէլի. Ընդէ՞ր առնէք դուք չարիս մեծամեծս յանձինս ձեր, սատակել զձեր զայր եւ զկին, եւ զմանուկ ստինդիացս ի միջոյ Յուդայ, առ ի չմնալոյ ումեք ի ձէնջ.
8. դառնացուցանել զիս գործովք ձեռաց ձերոց, արկանել խունկս աստուածոց աւտարաց յերկրիդ Եգիպտացւոց, յոր դուք մտէք բնակել այդր. զի սատակիցիք՝ եւ լինիցիք յանէծս եւ ի նախատինս ընդ ամենայն ազգս երկրի։
9. առ ի չմոռանալոյ ձեզ զչարիս հարցն ձերոց, եւ զչարիս թագաւորացն Յուդայ, եւ զչարիս կանանց նոցա. եւ զչարիս ձեր, եւ զչարիս կանանց ձերոց. զոր արարին յերկիրն Յուդայ եւ արտաքոյ Երուսաղէմի։
10. Եւ ոչ դադարեցին մինչեւ ցայսաւր, եւ ոչ երկեան, եւ ոչ կացին յաւրէնս իմ եւ ի հրամանս զոր ետու առաջի երեսաց ձերոց, եւ առաջի երեսաց հարցն ձերոց։
11. Վասն այնորիկ այսպէս ասէ Տէր զաւրութեանց Աստուած Իսրայէլի. Ահաւասիկ ես հաստատեմ զերեսս իմ ի վերայ ձեր ի չարիս, սատակել զամենայն զՅուդայ։
12. Եւ առցեն զմնացորդս Յուդայ՝ որ դէմ եդին մտանել յերկիրս Եգիպտացւոց բնակել աստ, կորուսանել զամենայն մնացորդս որ են յԵգիպտոս. եւ անկցին ի սուր, եւ սատակեսցին սովով, ի փոքուէ մինչեւ ցմեծամեծս՝ սրով եւ սովով մեռանիցին. եւ եղիցին ի նզովս եւ ի կորուստ՝ եւ յանէծս եւ ի նախատինս։
13. Եւ այց արարից ի վերայ նոցա որ նստին յերկրիդ Եգիպտացւոց. որպէս արարի այց Երուսաղէմի սրով եւ սովով եւ մահուամբ։
14. եւ ոչ ոք ապրեսցի ի մնացորդացդ Յուդայ, որ բնակեալ են յերկրիդ Եգիպտացւոց՝ դառնալ յերկիրն Յուդայ որում ակն ունէին յանձինս իւրեանց դառնալ բնակել անդ. եւ մի դարձցին բայց միայն ապրեալքն։
15. Եւ պատասխանի ետուն Երեմիայի ամենայն արք որք գիտէին՝ թէ արկանեն խունկս կանայք իւրեանց աստուածոց աւտարաց. եւ ամենայն կանայք որք կային անդ ժողովք մեծամեծք, եւ ամենայն ժողովուրդն որ բնակեալն էին յերկրին Եգիպտացւոց ի Պաթուրէս՝ եւ ասեն։
16. Բանիդ զոր խաւսեցար առ մեզ յանուն Տեառն՝ ոչ լուիցուք։
17. զի առնելով արասցուք զամենայն բան որ ելանէ ի բերանոյ մերմէ. արկանել խունկս տիկնոջն երկնից, եւ նուիրել նմա նուէրս, որպէս արարաք մեք եւ հարքն մեր. եւ թագաւորքն մեր, եւ իշխանքն մեր՝ ի քաղաքս Յուդայ եւ արտաքոյ Երուսաղէմի, եւ էաք հացալիցք եւ փափկացեալք. եւ չար ինչ ոչ տեսանէաք։
18. եւ իբրեւ դադարեցաք յարկանելոյ խունկս տիկնոջն երկնից, եւ նուիրելոյ նմա նուէրս, նուազեցաք յամենայնէ, եւ սրով եւ սովով սատակեցաք։
19. Եւ զի մեք արկաք խունկս տիկնոջն երկնից, եւ նուիրեցաք նմա նուէրս. միթէ առանց արա՞նց մերոց արարաք նմա հաստեայս եւ կարկանդակս, եւ նուիրեցաք նմա նուէրս։
20. Ետ պատասխանի Երեմիա ամենայն զաւրաւորաց ժողովրդեանն հանդերձ կանամբքն, եւ ամենայն ժողովրդեանն որ ետուն նմա զայն բանս պատասխանի՝ եւ ասէ.
21. Ոչ ապաքէն զխո՞ւնկսն զոր արկանէիք ի քաղաքսն Յուդայ եւ արտաքոյ Երուսաղէմի. դուք եւ հարք ձեր եւ թագաւորքն ձեր եւ իշխանքն ձեր եւ ժողովուրդ երկրին, յիշեաց Տէր՝ եւ անկաւ ի սիրտ նորա։
22. եւ ոչ կարաց Տէր համբերել յերեսաց չարաց իրաց ձերոց, եւ գարշելեացն զոր առնէիք. եւ եղեւ երկիրն ձեր յաւերակ, եւ յանապատ, եւ ի նզովս առ ի չգոյէ բնակչաց որպէս այսաւր. յերեսաց դոցա
23. որոց խունկսդ արկանէքդ՝ եւ որովք մեղանչէք Տեառն. եւ ոչ լսէք ձայնի Տեառն. եւ ըստ աւրինաց նորա եւ ըստ վկայութեանց, եւ ըստ հրամանաց նորա ոչ գնայք. վասն այնորիկ գտին զձեզ չարիքդ այդոքիկ որպէս եւ այսաւրդ։
24. Եւ ասէ Երեմիա ցամենայն ժողովուրդսն, եւ ցամենայն կանայսն. Լուարուք զպատգամս Տեառն ամենայն Յուդայ, որ էք յերկրիս Եգիպտացւոց։
25. Այսպէս ասէ Տէր զաւրութեանց Աստուած Իսրայէլի. Դուք եւ կանայք ձեր խաւսեցարուք բերանովք ձերովք, եւ ձեռաւք ձերովք վճարեցէք։ ասէք՝ առնելով արասցուք զդաւանութիւնն մեր զոր դաւանեցաք՝ արկանել խունկս տիկնոջ երկնից, եւ նուիրել նուէրս. եւ կալով կացէք ի դաւանութեանն ձերում, եւ առնելով արարէք զուխտն ձեր։
26. Վասն այդորիկ լուարուք զպատգամ Տեառն ամենայն Յուդայ որ բնակեալդ էք յերկրիդ Եգիպտացւոց։ ահաւասիկ երդուայ յանձն իմ մեծ ասէ Տէր Աստուած. եթէ կոչեսցի եւս անուն իմ ի բերանոյ ամենայն առն Յուդայ, ասել թէ կենդանի է Տէր յամենայն երկիրս Եգիպտացւոց։
27. զի ահաւասիկ ես զարթուցեալ եմ ի վերայ դոցա չարչարել զդոսա, եւ ոչ առնել բարի։ Եւ սատակեսցին ամենայն արք Յուդայ որ բնակեալ են յերկրիդ Եգիպտացւոց սրով եւ սովով, մինչեւ նուազեսցին։
28. եւ ապրեալքն ի սրոյ՝ դարձցին յերկրէս Եգիպտացւոց յերկիրն Յուդայ՝ արք սակաւք թուով։ Եւ ծանիցեն ամենայն մնացորդքն Յուդայ որ բնակեալ են յերկրիդ Եգիպտացւոց, թէ ո՞յր բան կայ, ի՞մ թէ նոցա։
29. եւ այս ձեզ նշանակ՝ ասէ Տէր, եթէ արարից ձեզ այց ի տեղւոջդ յայդմիկ. զի գիտասջիք եթէ կալով կայցեն բանք իմ ի վերայ ձեր ի չարիս։
30. Այսպէս ասէ Տէր. Ահաւասիկ ես տաց զփարաւոն Վափառ արքայ եգիպտացւոց ի ձեռս թշնամւոյ իւրոյ, եւ ի ձեռս խնդրողաց անձին իւրոյ. որպէս ետու զՍեդեկիա արքայ ի ձեռս Նաբուքոդոնոսորայ արքայի բաբելացւոց թշնամւոյ իւրոյ, եւ խնդրողի անձին նորա։
Հաղորդում կայքում սխալի վերաբերյալ
Տվյալ հատվածում առկա է սխալ: