1. Եւ եղեւ յամին յայնմիկ ի սկզբան թագաւորութեանն Սեդեկիայ արքայի Յուդայ. յամին չորրորդի՝ յամսեանն հինգերորդի. ասէ ցիս Անանիա որդի Ազովրայ սուտ մարգարէ ի Գաբաւովնէ, ի տան Տեառն առաջի քահանայիցն եւ ամենայն ժողովրդեանն։
2. Այսպէս ասէ Տէր զաւրութեանց Աստուած Իսրայէլի. որտակեսցի լուծ արքային բաբելացւոց
3. յետ այլ եւս երկուց ամաց աւուրց. եւ ես դարձուցից ի տեղիդ յայդ զամենայն սպաս տանն Տեառն, զոր միանգամ առ Նաբուքոդոնոսոր արքայ բաբելացւոց ի տեղւոջէդ յայդմանէ, եւ տարաւ ի Բաբելովն։
4. Եւ զՅեքոնիա որդի Յովակիմայ արքայի Յուդայ, եւ զամենայն գերութիւն Հրէաստանի որք մտին ի Բաբելոն՝ դարձուցից ես ի տեղիս յայս՝ ասէ Տէր. եւ զՅեքոնիա, եւ զգերութիւնն Յուդայ. զի խորտակեցից զլուծ արքային բաբելացւոց։
5. Եւ ասէ Երեմիա մարգարէ ցԱնանիա սուտ մարգարէ, առաջի քահանայիցն եւ առաջի ամենայն ժողովրդեանն որ կային ի տան Տեառն.
6. արդարեւ այդպէս արասցէ Տէր. Հաստատեսցէ զբանսդ քո զոր մարգարէացար, դարձուցանել զսպաս տանդ այդորիկ, եւ զամենայն գերին ի Բաբելոնէ ի տեղիս յայս։
7. Բայց լուարուք զպատգամս Տեառն՝ զոր ես ասեմ յականջս ձեր, եւ յականջս ամենայն ժողովրդեանդ։
8. Մարգարէք որ եղեն յառաջ քան զիս՝ եւ զքեզ՝ յաւիտենից, եւ մարգարէացան ի վերայ բազում աշխարհաց եւ մեծամեծ թագաւորութեանց, ի պատերազմ, եւ ի չարիս, եւ ի մահ։
9. մարգարէ որ մարգարէանայ խաղաղութիւն՝ եւ լիցի բան մարգարէին, ծանիցեն զմարգարէն զոր առաքեաց նոցա Տէր հաստատութեամբ։
10. Եւ առ Անանիա մարգարէ առաջի ամենայն ժողովրդեանն զանուրսն ի պարանոցէ Երեմիայ մարգարէի՝ եւ խորտակեաց։
11. Եւ ասէ Անանիա առաջի ամենայն ժողովրդեանն. Այսպէս ասէ Տէր. Այդպէս խորտակեցից զլուծ Նաբուքոդոնոսորայ արքայի բաբելացւոց, յետ երկուց ամաց աւուրց ի պարանոցէ ամենայն ազգաց։
12. Եւ գնաց Երեմիա մարգարէ զճանապարհս իւր։ Եւ եղեւ բան Տեառն առ Երեմիա յետ խորտակելոյն Անանիայ մարգարէի զանուրսն ի պարանոցէ Երեմիա մարգարէի, եւ ասէ.
13. Երթ խաւսեաց ընդ Անանիայ՝ եւ ասասցես. Այսպէս ասէ Տէր. Անուրս փայտեղէնս խորտակեցեր, եւ արարից ընդ այնր անուրս երկաթիս։
14. զի այսպէս ասէ Տէր զաւրութեանց Աստուած Իսրայէլի. Լուծ երկաթի եդի ի վերայ պարանոցի ամենայն ազգացդ այդոցիկ՝ հարկել Նաբուքոդոնոսորայ արքային բաբելացւոց, եւ ծառայեսցեն նմա. նա՝ եւ զգազանս անապատի ետու նմա։
15. Եւ ասէ Երեմիա մարգարէ ցԱնանիա մարգարէ. Արդ՝ լուր Անանիայ, ոչ առաքեաց զքեզ Տէր, եւ դու իզուր յուսացուցեր զժողովուրդդ զայդ ի նանրութիւնս։
16. Վասն այդորիկ այսպէս ասէ Տէր. Ահա ես արձակեցից զձեզ յերեսաց երկրիդ. եւ ի սմին տարւոջ մեռջիր դու, զի խոտորումն խաւսեցար ի Տեառնէ։
17. Եւ մեռաւ Անանիա մարգարէ յամին յայնմիկ, յամսեանն եւթներորդի։
Հաղորդում կայքում սխալի վերաբերյալ
Տվյալ հատվածում առկա է սխալ: