1. Եւ յամին չորրորդի Յովակիմայ որդւոյ Յովսիայ արքայի Յուդայ, եղեւ բան Տեառն առ իս՝ եւ ասէ.
2. Առ դու քեզ քարտէս մատենի, եւ գրեա ի նմա զամենայն զբանս՝ զոր հրաման ետու քեզ ի վերայ Իսրայէլի, եւ ի վերայ Յուդայ, եւ ի վերայ ամենայն ազգաց՝ յաւրէ յորմէ խաւսեցայ ես ընդ քեզ՝ յաւուրցն Յովսիայ արքայի Յուդայ եւ մինչեւ ցայսաւր.
3. թերեւս լուիցեն տունն Յուդայ զամենայն չարիս, զոր խորհեալ եմ ես առնել նոցա։ զի դարձցին իւրաքանչիւր ի ճանապարհէ իւրմէ չարէ. եւ քաւիչ եղէց անաւրէնութեանց նոցա եւ մեղաց նոցա։
4. Եւ կոչեաց Երեմիա զԲարուք որդի Ներեայ. եւ գրեաց Բարուք ի բերանոյ Երեմիայի զամենայն զբանս Տեառն՝ զոր հրաման ետ նմա ի քարտիսի մատենին։
5. Եւ պատուիրեաց Երեմիա Բարուքայ՝ եւ ասէ. Ես ի կալանս եմ, եւ ոչ կարեմ մտանել ի տուն Տեառն։
6. եւ դու մտցես եւ ընթերցցիս ի մատենէդ՝ զոր գրեցեր ի բերանոյ իմոյ զբանս Տեառն յականջս ժողովրդեանն ի տան Տեառն յաւուր պահոց. եւ յականջս ամենայն Յուդայ որ մտանեն ի քաղաքաց իւրեանց՝ ընթերցցիս։
7. Թերեւս անկցի գութ ի սիրտ նոցա առաջի Տեառն, եւ դարձցին իւրաքանչիւր ի ճանապարհաց իւրեանց չարաց. զի մեծ է սրտմտութիւն եւ բարկութիւն Տեառն, զոր խաւսեցաւ Տէր ի վերայ ժողովրդեանդ այդորիկ։
8. Եւ արար Բարուք որդի Ներեայ ըստ ամենայնի՝ զոր պատուիրեաց նմա Երեմիա մարգարէ, ընթերցանել ի մատենէն զպատգամս Տեառն ի տան Տեառն։
9. Եւ եղեւ յամին հինգերորդի Յովակիմայ որդւոյ Յովսիայ արքայի Յուդայ՝ յամսեանն իններորդի, ժողովեցաւ ի պահս առաջի Տեառն, ամենայն ժողովուրդն Երուսաղէմի, եւ ամենայն ժողովուրդն որ գային ի քաղաքացն Յուդայ յԵրուսաղէմ, եւ տունն Յուդայ։
10. Եւ ընթերցաւ Բարուք ի մատենէն զբանս Երեմիայի ի տան Տեառն, ի սրահին Գամարեայ որդւոյ Սափանեայ դպրապետի, ի մուտս նորոյ դրանն տան Տեառն՝ յականջս ամենայն ժողովրդեանն։
11. Եւ իբրեւ լուաւ Միքիա որդի Գամարեայ որդւոյ Սափանեայ զամենայն պատգամս Տեառն ի մատենէ անտի,
12. էջ ի տուն թագաւորին ի դիւան դպրապետին. եւ անդ նստէին ամենայն իշխանքն. Ելիսամա դպրապետ, եւ Գաղիա որդի Սամէի, եւ Եղնաթան որդի Աքոբովրայ, եւ Գամարիա որդի Սափանեայ, եւ Սեդեկիայ որդի Անանիայ, եւ ամենայն իշխանքն։
13. Եւ պատմեաց նոցա Միքիայ զամենայն զբանս զոր լուաւ յընթեռնուլ Բարուքայի մատենէ անտի յականջս ամենայն ժողովրդեանն։
14. Եւ առաքեցին ամենայն իշխանքն առ Բարուք զՅուդի որդի Նաթանայ որդւոյ Սելովմայ որդւոյ Քուսեայ՝ եւ ասեն. զմատեանն զոր ընթեռնուիր յականջս ժողովրդեանն, առ ի ձեռս քո եւ եկ այսր։ Եւ առ Բարուք որդի Ներեայ զմատեանն ի ձեռս իւր՝ եւ էջ առ նոսա։
15. եւ ասեն ցնա. Աղէ՝ դարձեալ ընթերցիր յականջս մեր. եւ ընթերցաւ Բարուք յականջս նոցա։
16. Եւ եղեւ իբրեւ լուան զամենայն զպատգամսն, խորհեցան իւրաքանչիւր ընդ ընկերի իւրում՝ եւ ասեն ցԲարուք. Պատմելով պատմեսցուք արքայի զամենայն զբանսդ զայդոսիկ։
17. Հարցին ցԲարուք եւ ասեն. աղէ պատմեա մեզ, ուստի՞ գրեցեր զամենայն զբանսդ զայդոսիկ՝ յո՞յր բերանոյ։
18. Եւ ասէ ցնոսա Բարուք. Ի բերանոյ Երեմիայի. նա պատմեց ինձ զամենայն զբանս զայսոսիկ, եւ ես գրեցի ի մատենիդ սեւակաւ։
19. Եւ ասեն իշխանքն ցԲարուք. Երթ թաքիր՝ դու եւ Երեմիա, եւ մի ոք գիտասցէ թէ ուր իցէք։
20. Եւ մտին առ արքայ ի սրահ անդր. եւ զմատեանն ետուն պահել ի տան Ելիսամա դպրապետի, եւ պատմեցին արքայի զամենայն զբանսն։
21. Եւ առաքեաց արքայն զՅուդի առնուլ զմատեանն. եւ առ զայն ի տանէ Ելիսամայ դպրապետի, եւ ընթերցաւ Յուդի յականջս թագաւորին, եւ յականջս ամենայն իշխանացն որ կային շուրջ զթագաւորաւն։
22. եւ թագաւորն նստէր ի ձմերատանն յամսեանն իններորդի, եւ կրակարան հրոյ առաջի նորա։
23. Եւ եղեւ իբրեւ ընթերցաւ Յուդի երիս էջս՝ կամ չորս. եւ կտրեաց զայն զՄելինաւ դպրապետին. եւ ընկէց ի կրակն որ կայր ի վերայ կրակարանին, մինչեւ սպառեցաւ ամենայն քարտէսն ի հուր կրակարանին։
24. Եւ ոչ խնդրեցին, եւ ոչ պատառեցին զպատմուճանս իւրեանց թագաւորն եւ ամենայն ծառայք իւր որք լուան զամենայն զբանսն զայնոսիկ։
25. Եւ Եղնաթան, եւ Գաղեա, եւ Գամարիա՝ եդին ի մտի արքայի՝ չայրել զքարտէսն. եւ ոչ անսաց նոցա։
26. Եւ հրաման ետ արքայ յԵրեմիէլի որդւոյ արքայի, եւ Սարեայ որդւոյ Եսրիէլի, եւ Սեմելիայ որդւոյ Աբդիելի, ունել զԲարուք դպրապետ՝ եւ զԵրեմիա մարգարէ։ եւ նոքա չոգան թաքեան։
27. Եւ եղեւ բան Տեառն առ Երեմիայ յետ այրելոյ թագաւորին զքարտէսն, եւ զամենայն բանս զոր գրեաց Բարուք ի բերանոյ Երեմիայի։
28. Եւ ասէ դարձեալ՝ առ դու այլ քարտէս՝ եւ գրեա ի նմա զամենայն զբանսն զառաջինս՝ որ էին յառաջնում քարտիսին, զոր այրեաց Յովակիմ արքայ Յուդայ։
29. Եւ ցՅովակիմ արքայ Յուդայ ասասցես. Այսպէս ասէ Տէր. Դու՝ այրեցեր զմատեանն զայն եւ ասացեր, թէ ընդէ՞ր գրեցեր ի նմա՝ եւ ասացեր, մտանելով մտցէ արքայն բաբելացւոց. եւ ջնջելով ջնջեսցէ զերկիրդ զայդ. պակաս արասցէ ի դմանէ զմարդ եւ զանասուն։
30. Վասն այսորիկ այսպէս ասէ Տէր ի վերայ Յովակիմայ արքայի Յուդայ. Մի մնասցէ նորա որ նստցի յաթոռն Դաւթի, եւ դիակունք նորա եղիցին անկեալ ի տուէ ի տաւթի, եւ գիշերի ի ցուրտ.
31. եւ այց արարից ի վերայ նորա, եւ ի վերայ ազգի նորա, եւ ի վերայ ծառայից նորա՝ ըստ անաւրէնութեանց նորա։ եւ ածից ի վերայ նոցա՝ եւ ի վերայ բնակչաց Երուսաղէմի եւ ի վերայ երկրիդ Յուդայ զամենայն չարիս զոր խաւսեցայ ի վերայ դոցա, եւ ոչ լուան։
32. Եւ առ Երեմիա այլ քարտէս՝ եւ ետ ցԲարուք որդի Ներեայ ցդպրապետ. եւ գրեաց ի նմա ի բերանոյ Երեմիայի զամենայն բանս մատենին զոր այրեաց Յովակիմ արքայ Յուդայ ի կրակի. եւ այլ եւս բանք յաւելան ի նոյն առաւել քան զայնս։
Հաղորդում կայքում սխալի վերաբերյալ
Տվյալ հատվածում առկա է սխալ: