1. Բանն որ եղեւ ի Տեառնէ առ Երեմիա, յամին տասներորդի Սեդեկիայ արքայի Յուդայ. այն ամ ութուտասն էր Նաբուքոդոնոսորայ արքայի բաբելացւոց։
2. Եւ յայնժամ զաւր արքային բաբելացւոց պաշարեաց զԵրուսաղէմ։ եւ Երեմիա մարգարէ կայր ի կալանս ի սրահի բանտին՝ որ էր յապարանս թագաւորին Յուդայ։
3. յոր արգելն զնա Սեդեկիա՝ եւ ասէ. Ընդէ՞ր դու մարգարէանաս եւ ասես. Այսպէս ասէ Տէր. Ահաւասիկ ես տամ զքաղաքդ զայդ ի ձեռս թագաւորին բաբելացւոց՝ եւ առցէ զդա։
4. եւ Սեդեկիա արքայ Յուդայ մի ապրեսցի ի ձեռաց քաղդեացւոցն. զի մատնելով մատնեսցի ի ձեռս թագաւորին բաբելացւոց. եւ խաւսեսցի բերան ի բերան ընդ նմա, եւ աչք դորա զաչս նորա տեսցեն։
5. եւ ի Բաբելովն մտցէ Սեդեկիա, եւ անդ նստցի մինչեւ այց արարից դմա՝ ասէ Տէր։ զի՞ մարտնչիք ընդ քաղդէացիսն՝ ուստի ոչ ինչ յաջողիցիք։
6. Եւ եղեւ բան Տեառն առ Երեմիա՝ եւ ասէ. Ահաւադիկ Անամայէլ որդի Սելովմայ հաւրեղբաւր քոյ գայ առ քեզ՝ եւ ասէ. Ստացիր դու քեզ զագարակն իմ, որ է յԱնաթովթ. զի քեզ իսկ է անկ ըստ մերձաւորութեան առնուլ ի ստացուած։
7. -
8. Եւ եկն առ իս Անամայէլ որդի Սելովմայ հաւր եղբաւր իմոյ, ըստ բանի Տեառն ի սրահ բանտին՝ եւ ասէ ցիս. Ստացիր զագարակն իմ որ է յԱնաթովթ յերկրին Բենիամինի. զի քեզ պարտ է ստանալ զժառանգութիւնն. եւ դու իսկ երիցագոյն ես։ Եւ գիտացի՝ թէ բան Տեառն է։
9. եւ ստացայ զագարակն յԱնամայելայ որդւոյ հաւր եղբաւր իմոյ՝ որ է յԱնաթովթ. եւ կշռեցի նմա արծաթ եւթն սիկղ եւ տասն արծաթոյ.
10. եւ գրեցի մուրհակս եւ կնքեցի. եւ կացուցի վկայս, եւ կշռեցի զարծաթն ի կշիռս։
11. Եւ առի զմուրհակ ստացուածոյն զկնքեալն՝ ըստ հրամանի եւ ըստ իրաւանց՝ եւ զարձակն։
12. եւ ետու զմուրհակ ստացուածոցն ցԲարուք որդի Ներեայ որդւոյ Մաասայ առաջի Անամայելի որդւոյ հաւրեղբաւր իմոյ, եւ առաջի այնոցիկ որ կային անդ. եւ գրեցին ի մուրհակի ստացուածոցն առաջի ամենայն հրէից՝ որ նստէին ի սրահի բանտին։
13. Եւ պատուիրեցի Բարուքայ առաջի նոցա եւ ասեմ։
14. Այսպէս ասէ Տէր ամենակալ Աստուած Իսրայէլի. Առ զմուրհակդ զայդ զմուրհակ ստացուածոց զկնքեալն, եւ զմուրհակն արձակ, եւ դիցես ի խեցեղէն ամանի, զի կացցէ աւուրս բազումս։
15. Զի այսպէս ասէ Տէր ամենակալ Աստուած Իսրայէլի. Դարձեալ ստասցին տունս եւ ագարակս՝ եւ այգիս յերկրիդ յայդմիկ։
16. Եւ կացի յաղաւթս առ Տէր, յետ տալոյն զմուրհակ ստացուածոյն ցԲարուք որդի Ներեայ. եւ ասեմ։
17. Որ եսդ Տէր Տէր. դու արարեր զերկինս եւ զերկիր զաւրութեամբ քո մեծաւ՝ եւ բազկաւ քով բարձու։ զի ոչ ինչ է բան որ ծածկիցի ի քէն։
18. առնես զողորմութիւն ի հազար դար. եւ հատուցանես զմեղս հարց ի ծոց որդւոց իւրեանց յետ նոցա։ Աստուած մեծ եւ հզաւր. Տէր զաւրութեանց անուն նորա.
19. մեծդ խորհրդովք՝ եւ զաւրաւոր գործովք։ Ամենակալ մեծ անունդ Տէր. աչք քո բաց են յամենայն ճանապարհս որդւոց մարդկան, տալ իւրաքանչիւր ըստ ճանապարհի իւրում, եւ ըստ պտղոյ գնացից իւրեանց։
20. Որ արարեր նշանս եւ արուեստս յերկրին Եգիպտացւոց՝ մինչեւ ցայսաւր ի մէջ Իսրայէլի, եւ ի մէջ ծննդոց երկրի, եւ արարեր քեզ անուն իբրեւ յաւուր յայսմիկ։
21. եւ հաներ զժողովուրդ քո զԻսրայէլ յերկրէն Եգիպտացւոց՝ նշանաւք եւ արուեստիւք, հզաւր ձեռամբ՝ եւ բարձր բազկաւ, եւ մեծամեծ տեսլեամբք։
22. Եւ ետուր նոցա զերկիրս զայս զոր երդուար հարցն նոցա՝ տալ նոցա զերկիր որ բղխէ զկաթն եւ զմեղր։
23. եւ մտին եւ ժառանգեցին զնա։ եւ ոչ լուան ձայնի քում, եւ ըստ հրամանաց քոց ոչ գնացին. ըստ ամենայնի զոր պատուիրեցեր նոցա առնել, եւ ոչ արարին։ եւ արարին ի պատահել իւրեանց ամենայն չարեացս այսոցիկ։
24. Եւ արդ՝ ահա հասեալ է զաւր ի քաղաքս առնուլ զսա. եւ մատնեցաւ քաղաքս ի ձեռս քաղդեացւոցն որ տան ընդ սմա պատերազմ յերեսաց սրոյ եւ սովոյ եւ մահու. որպէս եւ խաւսեցար նոյնպէս եւ եղեւ՝ զոր դու իսկ տեսանես։
25. Եւ դու Տէր ասես ցիս. Ստացիր քեզ ագարակ արծաթոյ. եւ գրեցի մուրհակ եւ կնքեցի, եւ կացուցի վկայս. եւ քաղաքս մատնեցաւ ի ձեռս քաղդեացւոցն։
26. Եւ եղեւ բան Տեառն առ իս՝ եւ ասէ.
27. Ահա ես Տէր Աստուած ամենայն մսեղեաց. միթէ թաքչիցի՞ ամենայն բան յինէն։
28. Վասն այսորիկ այսպէս ասէ Տէր. Մատնելով մատնեսցի քաղաքդ ի ձեռս քաղդեացւոցն, եւ ի ձեռս Նաբուքոդոնոսորայ արքային բաբելացւոց, եւ առցէ զդա։
29. Եւ եկեսցեն քաղդեացիքն պատերազմել ընդ քաղաքիդ, եւ այրեսցեն զդա հրով. եւ հրձիգ արասցեն զտունս յորս արկանէին խունկս ի վերայ տանեաց նոցա Բահաղու, եւ զոհէին զոհս աստուածոց աւտարաց վասն զիս դառնացուցանելոյ։
30. որդիքն Իսրայէլի՝ եւ որդիքն Յուդայ միայն գործէին զչարիս առաջի աչաց իմոց ի մանկութենէ իւրեանց։ Բայց որդիքն Իսրայէլի բարկացուցին զիս գործովք ձեռաց իւրեանց՝ ասէ Տէր։
31. Ի բարկութիւն եւ ի սրտմտութիւն էր ինձ քաղաքդ այդ, յորմէ աւրէ շինեցի զդա մինչեւ ցայսաւր. ջնջել զդա յերեսաց իմոց
32. վասն ամենայն չարեաց որդւոցն Իսրայէլի եւ որդւոցն Յուդայ՝ զոր արարին ի դառնացուցանել զիս, ինքեանք եւ թագաւորք իւրեանց, եւ մեծամեծք իւրեանց, եւ քահանայք իւրեանց, եւ մարգարէք իւրեանց, արք Յուդայ եւ բնակիչք Երուսաղէմի։
33. Դարձուցին յիս զթիկունս եւ ոչ զերեսս. եւ ուսուցի զնոսա ընդ առաւաւտս. ուսուցի, եւ ոչ անսացին ընդունել զխրատ։
34. եւ եդին զպղծութիւնս իւրեանց ի տան՝ յորոյ վերայ կոչեցեալ է անուն իմ։
35. Եւ առ պղծութեան իւրեանց շինեցին բագինս Բահաղու ի ձոր որդւոցն Ենովմայ, մատուցանել զուստերս եւ զդստերս իւրեանց Մողոքայ. զոր ոչ պատուիրեցի նոցա։ եւ ոչ անկաւ ի սիրտ իմ առնել նոցա զպղծութիւնն զայն առ ի յանցուցանելոյ զՅուդայ։
36. Եւ արդ՝ այսպէս ասէ Տէր Աստուած Իսրայէլի. Վասն քաղաքիդ այդորիկ՝ զորմէ դու ասացեր թէ մատնեցաւ ի ձեռս Նաբուքոդոնոսորայ արքային բաբելացւոց, ի սուր՝ եւ ի սով՝ եւ ի գերութիւն։
37. Ահա ես ժողովեցից զնոսա յամենայն երկրէ, ուր ցրուեցից զնոսա անդր բարկութեամբ եւ սրտմտութեամբ իմով, եւ ցասմամբ մեծաւ։ եւ դարձուցից զնոսա ի տեղիս յայս, եւ նստուցից զնոսա յուսով։
38. եւ եղիցին ինձ ի ժողովուրդ, եւ ես եղէց նոցա յԱստուած։
39. եւ տաց նոցա սիրտ այլ, եւ ճանապարհ մի՝ երկնչել յինէն զամենայն աւուրս ի բարութիւն իւրեանց, եւ որդւոց իւրեանց յետ նոցա։
40. Եւ ուխտեցից նոցա ուխտ յաւիտենական, զոր ոչ դարձուցից յետս առնել նոցա բարի. եւ զերկեւղ իմ տաց ի սիրտս նոցա առ ի չապստամբելոյ նոցա յինէն։
41. եւ այց արարից բարի առնել նոցա. եւ տնկեցից զնոսա յերկրիս յայսմիկ հաւատովք, ամենայն սրտիւ իմով՝ եւ ամենայն անձամբ իմով։
42. Զի այսպէս ասէ Տէր. Որպէս ածի ի վերայ ժողովրդեանդ այդորիկ զամենայն չարիս մեծամեծս. նոյնպէս ածից ի վերայ դոցա բարիս՝ զոր խաւսեցայ ի վերայ դոցա։
43. Եւ ստասցին միւսանգամ ագարակս յերկրիս յայսմիկ, զորմէ դուդ ասացեր թէ անապատ է ի մարդոյ եւ յանասնոյ, եւ մատնեցան ի ձեռս քաղդեացւոցն։
44. եւ ստասցին ագարակս արծաթոյ։ եւ գրեսցեն մուրհակս. եւ կնքեսցես, եւ կացուսցես վկայս յերկրին Բենիամինի՝ եւ շուրջ զԵրուսաղէմաւ. եւ ի քաղաքս Յուդայ, եւ ի քաղաքս լերինն, եւ ի քաղաքս Սեփելայ, եւ ի քաղաքս Նագեբայ. զի դարձուցից զգերութիւնս նոցա՝ ասէ Տէր։
Հաղորդում կայքում սխալի վերաբերյալ
Տվյալ հատվածում առկա է սխալ: