1. Եւ եղեւ յամսեանն եւթներորդի՝ եկն Իսմայէլ որդի Նաթանայ, որդւոյ Ելիսամայ յազգէ թագաւորին, եւ ծառայք թագաւորին, եւ տասն այր ընդ նմա առ Գոդողիա որդի Աքիկամայ ի Մասեփա. եւ կերան հաց ի միասին ի Մասեփա։
2. Եւ յարեաւ Իսմայէլ որդի Նաթանայ, եւ տասնեքին արքն որ ընդ նմա, եւ եհար զԳոդողիա որդի Աքիկամայ որդւոյ Սափանայ սրով՝ եւ սպան զնա. զոր կացուցեալ էր արքային
բաբելացւոց ի վերայ երկրին։
3. եւ զամենայն հրէայսն որ էին ընդ Գոդողիա ի Մասեփա, եւ զամենայն քաղդեացիս որ անդ գտան զարս պատերազմաւղս, կոտորեաց Իսմայէլ։
4. Եւ եղեւ յերկրորդում աւուր սպանանելոյ անդ զԳոդողիա. եւ ոչ ոք գիտէր։
5. Եկին արք ի Սիւքիմայ, եւ ի Սաղեմայ, եւ ի Շամրնէ, արք ութսուն. գերծեալ զմաւրուս եւ պատառեալ զհանդերձս՝ կոծելով, եւ մաննա եւ կնդրուկ ի ձեռս նոցա տանել ի տուն Տեառն։
6. Եւ ել Իսմայէլ որդի Նաթանայ ընդ առաջ նոցա ի Մասեփա, երթալով երթայր եւ լայր։ եւ եղեւ իբրեւ մերձեցաւ ի նոսա՝ ասէ ցնոսա. Մտէք առ Գոդողիա որդի Աքիկամայ։
7. եւ եղեւ իբրեւ մտին ի մէջ քաղաքին, կոտորեաց զնոսա Իսմայէլ որդի Նաթանայ ի մէջ քաղաքին, եւ ամաց ի ջրհոր՝ ինքն եւ արքն որ ընդ նմա։
8. Եւ արք տասն գտան անդ, եւ ասեն ցԻսմայէլ. Մի սպանաներ զմեզ, զի գոն մեզ գանձք ի բացի, ցորեան եւ գարի՝ մեղր եւ եւղ. եւ զանց արար եւ ոչ սպան զնոսա ի մէջ եղբարց իւրեանց։
9. Եւ ջրհորն յոր ամաց Իսմայէլ զամենայն մարմինս արանցն զոր կոտորեաց վասն Գոդողիա, ջրհոր մեծ էր՝ զոր արար արքայ Ասա յերեսաց Բաասայ արքայի Իսրայէլի. զայն ելից Իսմայէլ որդի Նաթանայ վիրաւորաւք։
10. Եւ դարձոյց Իսմայէլ զամենայն ժողովուրդն որ մնացեալ էր ի Մասեփա. եւ զդստերս թագաւորին հանդերձ ամենայն սինլքորաւք ժողովրդեանն որ էին ի Մասեփա. զորս յանձնարարեալ էր Նաբուզարդանայ դահճապետի Գոդողիայ որդւոյ Աքիկամայ։ եւ կանխեաց Իսմայէլ որդի Նաթանայ ընդ առաւաւտս, եւ գնաց յայն կոյս առ որդիսն Ամովնայ։
11. Եւ լուաւ Յովնան որդի Կարէի՝ եւ ամենայն զաւրավարք զաւրացն որ ընդ նմա էին՝ զամենայն չարիսն զոր գործեաց Իսմայէլ որդի Նաթանայ։
12. ժողովեցին զամենայն զաւրականն իւրեանց, եւ խաղացին երթալ տալ պատերազմ ընդ Իսմայելի որդւոյ Նաթանայ. եւ գտին զնա ի վերայ ջուրցն բազմաց որ էին ի Գաբաւոն։
13. Եւ եղեւ իբրեւ տեսին ամենայն ժողովուրդն որ էին ընդ Իսմայելի, զՅովնան որդի Կարէի, եւ զամենայն զաւրավարս զաւրացն որ էին ընդ նմա՝ ուրախ եղեն։
14. Եւ դարձան առ նոսա ամենայն ժողովուրդն զոր գերեաց Իսմայէլ ի Մասեփա, եւ եկին առ Յովնան որդի Կարէի։
15. Բայց Իսմայէլ որդի Նաթանայ՝ ապրեցաւ ութ արամբք յերեսացն Յովնանայ, եւ անկաւ առ որդիսն Ամովնայ։
16. Եւ առ Յովնան որդի Կարէի, եւ ամենայն զաւրավարք զաւրացն որ էին ընդ նմա, զամենայն մնացորդս
ժողովրդեանն զորս թափեաց յԻսմայելէ յորդւոյ Նաթանայ ի Մասեփա։ յետ սպանանելոյն զԳոդողիա որդի Աքիկամայ զարս հզաւրս պատերազմաւղս, եւ զկանայս, եւ զայլս, եւ զներքինիս, զոր առ յերկրէն Գաբաւոնացւոց,
17. եւ գնաց։ եւ նստան յերկրին Բերութքամայ հանդէպ Բեթղահէմի, երթալ մտանել յերկիրն Եգիպտացւոց։
18. յերեսաց քաղդեացւոցն։ քանզի զահի հարան յերեսաց նոցա. զի սպան Իսմայէլ զԳոդողիա որդի Աքիկամայ՝ զոր կացոյց արքայն բաբելացւոց ի վերայ երկրին։
Հաղորդում կայքում սխալի վերաբերյալ
Տվյալ հատվածում առկա է սխալ: