1. Այսպէս ասէ Տէր. Ահաւասիկ ես յարուցից ի վերայ Բաբելոնի՝ եւ ի վերայ բնակչաց նորա զսիրտ յարուցելոց, եւ հողմ խորշակի սատակիչ։
2. Եւ առաքեցից ի Բաբելովն դսրովիչս եւ դսրովեսցեն զնա, եւ ապականեսցեն զերկիր նորա. զի վայ ի վերայ Բաբելոնի շուրջանակի յաւուր չարչարանց իւրոց։
3. Լարեսցէ որ լարելոցն իցէ զաղեղն իւր, եւ առցէ զանձամբ ոյր իցէ զէն։ մի խնայէք յերիտասարդս նորա, եւ ապականեցէք զամենայն զաւրութիւն նորա։
4. Եւ անկցին վիրաւորք յերկրին Քաղդեացւոց, եւ խոցոտեալք շուրջ զնովաւ։
5. զի ոչ եղեւ այրի Իսրայէլ եւ Յուդայ յԱստուծոյ իւրեանց եւ ի Տեառնէ ամենակալէ. զի երկիր նոցա լցաւ անաւրէնութեամբ ի սրբութեանցն Իսրայէլի։
6. Փախերուք ի միջոյ Բաբելոնի, եւ ապրեցուցէք իւրաքանչիւր զանձն իւր, եւ մի կործանիցիք յանիրաւութեանց նորա. զի ժամանակ վրէժխնդրութեան է նորա ի Տեառնէ. զհատուցումն նորա ինքն հատուսցէ։
7. Բաժակ ոսկի Բաբելովն ի ձեռին Տեառն, որ արբուցանէ զամենայն երկիր ի գինւոյ իւրմէ. արբին հեթանոսք, վասն այնորիկ շարժեցան ազգք։
8. եւ յանկարծակի կործանեցաւ Բաբելովն, եւ խորտակեցաւ։ Ողբ առէք ի վերայ դորա. առէք դեղ ի վիրաց դորա, թերեւս բժշկեսցի։
9. Բժշկեցաք զԲաբելոն, եւ նա ոչ բժշկեցաւ. թողցուք զնա եւ գնասցուք իւրաքանչիւր յերկիր իւր. զի մերձեցան մինչեւ յերկինս դատաստանք նորա. ամբարձան մինչեւ ցաստեղս։
10. եւ ած Տէր դատաստան ի վերայ նորա. եկայք՝ եւ պատմեսցուք ի Սիոն զգործս Տեառն Աստուծոյ մերոյ։
11. Կազմեցէք աղեղունս, լցէք զկապարճս. զի զարթոյց Տէր զոգի թագաւորին Մարաց. զի բարկութիւն նորա ի վերայ Բաբելոնի, եւ ջնջեսցէ զնա. զի վրէժխնդրութիւն Տեառն է, վրէժխնդրութիւն տաճարի նորա։
12. Ի վերայ պարսպացն Բաբելոնի կանգնեցէք նշան. կացուցէք պահապանս. զարթուցէք զառաջապահս. պատրաստեցէք զզէնս. զի ձեռն ի գործ արար. եւ արասցէ Տէր զոր ինչ խաւսեցաւ ի վերայ բնակչացն Բաբելոնի,
13. բնակելոց առ ջուրբքն բազմաւք. ի վերայ բազմութեան գանձուց նորա. հասեալ է վախճան քո. արդարեւ ստոյգ ի փոր քո եմուտ։
14. Զի երդուաւ Տէր զաւրութեանց ի բազուկ իւր, թէ լցից զքեզ զաւրաւք իբրեւ մարախով, եւ բարբառեսցին ի վերայ քո որ իջանեն ի քեզ։
15. Որ արար զերկինս զաւրութեամբ իւրով. պատրաստեաց զտիեզերս իմաստութեամբ իւրով. ձգեաց զերկինս հանճարով իւրով։
16. եդ ի բարբառ զբազմութիւն ջուրց շառաչմանց յերկինս, եւ հանէ զամպս ի ծագաց երկրէ, եւ զփայլատակունս յանձրեւս արար. եհան զլոյս յըշտեմարանց իւրոց։
17. Յիմարեցաւ ամենայն մարդ ի գիտութենէ. յամաւթ եղեւ ամենայն ոսկերիչ ի դրաւշելոց իւրոց, զի սուտ ձուլեցին, չիք ոգի ի նոսա։
18. սնոտի են գործքն ձաղանաց. ի ժամանակի այցելութեան իւրեանց կորիցեն։
19. Ոչ այնպէս ինչ իցէ բաժինն Յակովբայ. զի որ ստեղծ զամենայն՝ նա է բաժին նորա, եւ գաւազան ժառանգութեան նորա. Տէր զաւրութեանց է անուն նորա։
20. Ցրուեսցես դու ինձ զանաւթդ պատերազմիդ, եւ ցրուեցից ես ի քեզ զազգս. եւ բարձից ի միջոյ քումմէ զթագաւորս,
21. եւ ցրուեցից ի քեզ զայրուձի նորա. եւ ցրուեցից ի վերայ քո զկառս եւ զհեծեալս նորա։
22. Եւ ցրուեցից ի քեզ զայր եւ զկին. եւ ցրուեցից ի քեզ զծերն եւ զերիտասարդն. եւ ցրուեցից ի քեզ զընտիրն եւ զկոյսն։
23. եւ ցրուեցից ի քեզ զհովիւն եւ զհաւտ իւր. եւ ցրուեցից ի քեզ զհողագործն եւ զհողագործութիւն իւր. եւ ցրուեցից ի քեզ զզաւրավարս եւ զզաւրագլուխս քո։
24 Եւ հատուցից Բաբելոնի եւ բնակչաց քաղդեացւոցն ըստ ամենայնի չարեացն նոցա զոր արարին ընդ Սիոն, առաջի աչաց ձերոց՝ ասէ Տէր։
25. Ահաւասիկ ես ի վերայ քո լեառնդ ապականիչ՝ ասէ Տէր, որ ապականէիր զամենայն երկիր։ եւ ձգեցից զձեռն իմ ի վերայ քո, եւ թաւալեցուցից զքեզ ի վիմացդ. եւ տաց զքեզ ի լեառն այրեցեալ։
26. եւ ոչ եւս առնուցուն ի քէն վէմ անկեան՝ եւ վէմ հիման. զի յապականութիւն յաւիտենից եղիցես՝ ասէ Տէր։
27. Առէք նշան ի վերայ երկրիդ. փող հարէք ընդ ազգս ամենայն, հրաւիրեցէք ի վերայ դորա գունդս։ Պատուէր տուք յինէն Այրարատեան թագաւորութեանցն եւ Ազքանազեան գնդին. կանգնեցէք զնովաւ նետակալս. ելէք ի վերայ. շարժեցաւ՝ եւ չարչարեցաւ, զի եկն եհաս ի վերայ Բաբելոնի խորհուրդ Տեառն. երիվարք իբրեւ զբազմութիւն մարախոյ։
28. Հրաւիրեցէք ի վերայ նորա զազգս՝ եւ զթագաւորն Մարաց. զզաւրավարս նորա, եւ զամենայն զաւրագլուխս նոցա անդր. եւ զամենայն երկրի զիշխանութիւնս։
29. դնել զերկիրն Բաբելացւոց յապականութիւն. զի մի լինիցի ի նմա բնակութիւն։
30. Կասիցին նահատակքն Բաբելոնի ի պատերազմէ. նստցին ի պաշարման. բեկաւ զաւրութիւն նոցա, եւ եղեն իբրեւ զկանայս։ հրձիգ եղեն յարկք նոցա. խորտակեցան նիգք նոցա։
31. Փախստեայ փախստէի պատահեսցէ. եւ գուժկան գուժկանի դիպեսցի, գոյժ առնել թագաւորին բաբելացւոց, թէ առաւ քաղաքն նորա. ի ծագաց ելից իւրոց
32. ըմբռնեցան, եւ ժողովք նոցա ի հուր այրեցան. եւ արք պատերազմաւղք ի դրունս դիմեցին։
33. Զի այսպէս ասէ Տէր զաւրութեանց Աստուած Իսրայէլի. Տուն բաբելացւոց իբրեւ զաւրան վականակ կասցի. սակաւիկ մեւս եւս՝ եւ հասցեն հունձք նորա։
34. Եկեր զիս՝ եհաս ի վերայ իմ, բաժանեաց զիս Նաբուքոդոնոսոր արքայ բաբելացւոց. կացոյց զիս իբրեւ զաման մի ունայն. եկուլ զիս իբրեւ զվիշապ. ելից զկուշտ իւր ի փափկութենէ իմմէ։ մերժեցան վաստակք իմ,
35. եւ տառապանք իմ ի Բաբելոն գնացին. ասասցէ բնակիչն Սիովնի. եւ արիւն իմ ի վերայ բնակչացն քաղդէացւոց. ասասցէ Երուսաղէմ։
36. Վասն այդորիկ այսպէս ասէ Տէր. Ահաւասիկ ես դատեցայց զոսոխն քո, եւ խնդրեցից զվրէժ քո, եւ աւերեցից զծով նորա, եւ ցամաքեցուցից զաղբեւրս նորա։
37. Եւ եղիցի Բաբելոն ի բլուրս՝ բնակութիւն վիշապաց, յապականութիւն եւ ի շչիւն, եւ մի բնակեսցի
38. համաւրէն իբրեւ առիւծունք պատրաստեցան որդիք նոցա. եւ իբրեւ զկորիւնս առիւծուց։
39. ի ջերմն խշտեաց իւրեանց տաց նոցա արհաւիրս, եւ արբուցից զնոսա. զի թմբրեսցին եւ ննջեսցեն քուն յաւիտենից։ եւ մի զարթիցեն՝ ասէ Տէր։
40. Իջո զնոսա իբրեւ զոչխարս ի սպանումն, եւ իբրեւ զխոյս այծեաւք հանդերձ։
41. Զիա՞րդ ի պարտութիւն՝ մատնեցար Սիսակ, եւ անկար յորս պարծանքդ ամենայն երկրի։ Զիա՞րդ եղեւ Բաբելոն յապականութիւն ի մէջ ամենայն ազգաց։
42. Ել ի վերայ Բաբելոնի ծովն գոչմամբ ալեաց իւրոց, եւ ծածկեցաւ։
43. եղեն քաղաքք նորա յապականութիւն յերկիր անջուր եւ յանապատ. եւ մի ոք իցէ որ բնակիցէ ի նմա, եւ մի հանգիցէ ի նմա որդի մարդոյ։
44. Եւ խնդրեցից զվրէժ ի Բելայ ի Բաբելոն, եւ հանից զոր եկուլն ի բերանոյ նորա, եւ մի եւս ժողովեսցին առ նա ազգք. նաեւ պարիսպքն բաբելացւոց անկան։
45. Ելէք ի միջոյ նոցա ժողովուրդ իմ, եւ ապրեցուցէք իւրաքանչիւր զանձինս ձեր ի սրտմտութենէ բարկութեան Տեառն։
46. Մի երբէք զանգիտիցեն սիրտք ձեր. եւ մի երկնչիք ի համբաւաց զոր լսիցէք յերկրին. զի ի նմին տարւոջ մտցէ լուրն, եւ յետ այնր տարւոյ՝ այլ լուր, եւ անիրաւութիւն յերկրին. առակ ի վերայ առակի։
47. Վասն այդորիկ ահա աւուրք գան՝ ասէ Տէր, եւ արարից հանդէս ի վերայ դրաւշելոցն բաբելացւոց, եւ ամենայն երկիր նորա ամաչեսցէ, եւ ամենայն վիրաւորք նորա անկցին ի միջի նորա։
48. եւ ցնծասցեն ի վերայ Բաբելոնի երկինք եւ երկիր եւ ամենայն որ ի նոսա. զի ի հիւսւսոյ եկեսցեն թշուառացուցիչք նորա՝ ասէ Տէր։
49. եւ ի Բաբելոն անկցին վիրաւորք ամենայն երկրին։
50. Ելէք ապրեալք յերկրէդ. մի կայք. յիշեցէք զՏէր հեռաւորքդ, եւ Երուսաղէմ անկցի ի սիրտ ձեր։
51. Յամաւթ եղաք՝ զի լուաք զնախատինս մեր. ծածկեցին անարգանք զերեսս մեր. մտին այլազգիք ի սրբութիւնս մեր ի տան Տեառն։
52. Վասն այդորիկ ահա աւուրք գան՝ ասէ Տէր, եւ խնդրեցից զվրէժ ի դրաւշելոց նորա, եւ յամենայն երկրի անկանիցին վիրաւորք։
53. Եւ եթէ բարձրասցի Բաբելոն իբրեւ զերկինս, եւ եթէ ամրացուսցէ զբարձրութիւն զաւրութեան իւրոյ. յինէն եկեսցեն նմա սատակիչք՝ ասէ Տէր։
54. Ձայն գուժի ի Բաբելոն, եւ բեկումն մեծ յերկրին Քաղդեացւոց։
55. զի սատակեաց տէր զԲաբելոն, եւ կորոյս ի նմանէն զձայն մեծ՝ զգոչիւն ալեաց իւրոց։ իբրեւ ջուրք բազումք ետուն զբարբառ սատակման նորա։
56. Զի եկն ի վերայ Բաբելոնի թշուառութիւն. ըմբռնեցան սպառազէնքն նորա. զարհուրեցան աղեղնաւորքն նորա։ Զի Աստուած հատուցիչ է. ինքն Տէր հատուցանէ նմա զհատուցումն։
57. եւ արբեցուսցէ արբեցութեամբ զզաւրավարս նորա, եւ զիմաստունս նորա. զիշխանս նորա՝ եւ զզաւրագլուխս նորա, եւ զզաւրաւորս նորա։ եւ ննջեսցեն ի քուն յաւիտենից, եւ մի զարթիցեն։ ասէ արքայ՝ Տէր ամենակալ անուն է նորա։
58. Այսպէս ասէ Տէր զաւրութեանց. Պարիսպն Բաբելոնի լայնեցաւ. կործանելով կործանեսցի, եւ դրունք նորա բարձունք հրով այրեսցին. եւ ջանասցին ժողովուրդք ընդ այն, եւ ազգ ի սկզբան սատակեսցին։
59. Բանն զոր պատուիրեաց Տէր Երեմիայի մարգարէի ասել ցՍարեա որդի Ներեայ՝ որդւոյ Մաասայ, յորժամ երթայր ի Սեդեկիայ արքայէ Յուդայ ի Բաբելոն, յամին չորրորդի թագաւորութեան նորա. եւ Սարեա էր պարգեւապետ նորա։
60. Եւ գրեաց Երեմիա զամենայն չարիս որ գալոց էին ի վերայ Բաբելոնի ի մատենի միում. զամենայն զբանս զայսոսիկ գրեալս ի վերայ Բաբելոնի։
61. Եւ ասէ Երեմիա ցՍարեա. Յորժամ երթայցես ի Բաբելոն, եւ տեսցես՝ եւ ընթեռնուցուս զամենայն զբանսդ զայդոսիկ։
62. եւ ասասցես. Տէր՝ դու խաւսեցար ի վերայ տեղւոյս այսորիկ սատակել զսա. մի եւս լինել ի սմա բնակիչ ի մարդոյ մինչեւ յանասուն. զի յապականութիւն յաւիտենից եղիցի։
63. Եւ եղիցի յորժամ դադարեսցես յընթեռնլոյ զմատեանդ զայդ, կապեսցես ի դմա քար եւ ընկեսցես ի մէջ Եփրատայ.
64. եւ ասասցես՝ այսպէս ընկղմեսցի Բաբելոն, եւ մի կանգնեսցի ի չարեացն զոր ես ածից ի վերայ դորա։ Եւ կացին մինչեւ ցայս վայր բանք Երեմիայ մարգարէի։ Ի թագաւորութենէն է այս բանքս Կատարումն գրոցս։
Հաղորդում կայքում սխալի վերաբերյալ
Տվյալ հատվածում առկա է սխալ: