1. Բանն որ եղեւ առ Երեմիա ի Տեառնէ։ ել Նաբուքոդոնոսոր արքայ բաբելացւոց. եւ ամենայն զաւրականն, եւ ամենայն երկիր որ ընդ իշխանութեամբ ձեռին նորա, եւ ամենայն ազգք, մարտնչէին ընդ Երուսաղէմի, եւ ընդ ամենայն քաղաքսն Յուդայ։ Եւ ասէ.
2. Այսպէս ասէ Տէր Աստուած Իսրայէլի. Երթ առ Սեդեկիա արքայ Յուդայ, եւ ասասցես ցնա. Այսպէս ասէ Տէր. Մատնելով մատնեսցի քաղաքդ ի ձեռս արքային բաբելացւոց. եւ առցէ զդա, եւ այրեսցէ զդա հրով։
3. եւ դու՝ ոչ ապրեսցիս ի ձեռաց նորա. այլ ըմբռնելով ըմբռնեսցիս, եւ ի ձեռս նորա մատնեսցիս, եւ աչք քո զաչս նորա տեսցեն, եւ բերան ի բերան խաւսեսցիս ընդ նմա. եւ ի Բաբելովն երթիցես։
4. Արդ լուր զպատգամս Տեառն՝ Սեդեկիա արքայ Յուդայ. այսպէս ասէ Տէր վասն քո. ոչ մեռցիս սրով,
5. այլ խաղաղութեամբ մեռանիցիս։ եւ որպէս լացին զհարսն քո զթագաւորսն առաջինս, որ եղեն յառաջ քան զձեզ, նոյնպէս լացցեն եւ զքեզ, թէ վայ վայ Տէր, եւ կոծեսցին զքեզ. զի մեծամեծս խաւսեցայ՝ ասէ Տէր։
6. Եւ խաւսեցաւ Երեմիա մարգարէ առ Սեդեկիա արքայ Յուդայ զամենայն զբանս զայսոսիկ յԵրուսաղէմ։
7 . Եւ զաւր թագաւորին բաբելացւոց մարտնչէր ընդ Երուսաղէմի, եւ ընդ ամենայն քաղաքսն Յուդայ ընդ մնացեալսն, ընդ Լաքիսայ՝ եւ ընդ Ազեկայ. զի նոքա մնացեալ էին ի քաղաքացն՝ Յուդայ քաղաքք ամուրք։
8. Բանն որ եղեւ առ Երեմիա ի Տեառնէ, յետ կատարելոյ Սեդեկիայ արքայի զուխտն ընդ ամենայն ժողովրդեանն որ յԵրուսաղէմ. կոչել նոցա թողութիւն,
9. արձակել իւրաքանչիւր ումեք զծառայ իւր, եւ իւրաքանչիւր զաղախին, զայր եբրայեցի, եւ զկին եբրայեցի ազատս. եւ մի ծառայել ամենայն առն յազգէ Յուդայ՝ եղբաւր իւրում։
10. Եւ դարձան ամենայն մեծամեծք՝ եւ ամենայն ժողովուրդն որ մտեալ էին յուխտ՝ արձակել իւրաքանչիւր զծառայ իւր, եւ իւրաքանչիւր զաղախին իւր, զայր եբրայեցի եւ զկին եբրայեցի ազատս, եւ ոչ եւս ծառայել նոցա։ Լուան եւ արձակեցին։
11. եւ յետոյ դարձան, եւ դարձուցին անդրէն զծառայս եւ զաղախնայս, զորս արձակեցին ազատս. եւ կալան զնոսա ի ծառայս եւ յաղախնայս։
12. Եւ եղեւ բան Տեառն առ Երեմիա ի Տեառնէ՝ եւ ասէ.
13. Այսպէս ասէ Տէր Աստուած Իսրայէլի. Ես եդի ուխտ ընդ հարսն ձեր՝ յաւուր յորում փրկեցի զնոսա յերկրէն Եգիպտացւոց՝ ի տանէ ծառայութեան, եւ ասեմ.
14. Թէ յորժամ վեց ամ լցցի, արձակեսցես զեղբայրն քո զեբրայեցի՝ որ վաճառեսցի քեզ. եւ գործեսցէ քեզ զվեց ամ, եւ արձակեսցես զնա ազատս ի քէն. եւ ոչ լուան ինձ հարքն ձեր, եւ ոչ խոնարհեցուցին զունկն իւրեանց։
15. Եւ դարձան այսաւր առնել զհաճոյսա առաջիաչաց իմոց, կոչել իւրաքանչիւր թողութիւն ընկերի իւրում. եւ կատարեցին զուխտն առաջի իմ ի տանն յորոյ վերայ կոչեալ է անուն իմ։
16. Եւ շրջեցէք եւ պղծեցէք զանուն իմ, դառնալ իւրաքանչիւր ի ծառայ իւր, եւ իւրաքանչիւր յաղախին իւր, զորս արձակեցէք ազատս ոգւոց ձերոց. եւ դարձուցէք զնոսա լինել ձեզ ի ծառայս եւ յաղախնայս։
17 .Վասն այդորիկ այսպէս ասէ Տէր. Դուք ոչ լուարուք ինձ կոչել արձակուրդ իւրաքանչիւր եղբաւր իւրում, եւ իւրաքանչիւր մերձաւորի իւրում. ահաւասիկ ես կոչեցից ձեզ արձակուրդ՝ ասէ Տէր, ի սուր՝ եւ ի սով՝ եւ ի մահ։
18. եւ տաց զձեզ ի ցրումն ընդ ամենայն թագաւորութիւնս երկրի. եւ տաց զարսդ որ անցին զուխտիւ իմով, եւ ոչ կացին ի բանս ուխտի իմոյ զոր արարին առաջի իմ. զորթն զոր կտրեցին, եւ անցին ընդ մէջ յաւշուածոյն նորա՝ զիշխանս Յուդայ
19. եւ զիշխանս Երուսաղէմի, եւ զներքինիս, եւ զքահանայս. եւ զամենայն ժողովուրդ երկրին՝ որ անցին ընդ մէջ յաւշուածոյ որթուն։
20. Տաց զնոսա ի ձեռս թշնամեաց նոցա, եւ ի ձեռս խնդրողաց անձանց նոցա. եւ արկից զդիակունս նոցա կերակուր թռչնոց երկնից՝ եւ գազանաց երկրի։
21. Եւ զՍեդեկիա արքայ Հրէաստանի՝ եւ զիշխանս նորա տաց ի ձեռս թշնամեաց իւրեանց, եւ ի ձեռս խնդրողաց անձանց նոցա, եւ ի ձեռս զաւրու արքային բաբելացւոց, որ եկեալ հասեալ են ի վերայ նոցա։
22. Ահաւասիկ ես հրաման տաց՝ ասէ Տէր, եւ դարձուցից զնոսա այդրէն ի քաղաքդ. մարտիցեն ընդ դմա, եւ առցեն զդա, եւ այրեսցեն զդա հրով. եւ զքաղաքսն Յուդայ տաց յանապատ ի բնակչաց իւրեանց։
Հաղորդում կայքում սխալի վերաբերյալ
Տվյալ հատվածում առկա է սխալ: