1. Եւ եղեւ բան Տեառն առ Երեմիա երկրորդ անգամ. եւ նա՝ կայր տակաւին կապեալ ի սրահի բանտին՝ եւ ասէ.
2. Այսպէս ասէ Տէր՝ որ արար զերկիրդ եւ ստեղծ զդա՝ կանգնել զդա. Տէր անուն է նորա։
3. կարդա առ իս, եւ տաց քեզ պատասխանի, եւ պատմեցից քեզ մեծամեծս եւ զաւրաւորս՝ զոր ոչ գիտիցես։
4. Զի այսպէս ասէ Տէր Աստուած Իսրայէլի. Վասն տանց քաղաքիդ այդորիկ, եւ վասն ապարանից արքայիդ Յուդայ, քակելոց է ի մահարձանս՝ եւ ի մարտկոցս
5. եկելոցն մարտնչել ընդ քաղդէացիս. եւ լնուլ զնոսա դիակամբք մարդկան, զորս հարի բարկութեամբ իմով եւ սրտմտութեամբ, եւ դարձուցից զերեսս իմ ի նոցանէ վասն ամենայն չարութեանց նոցա։
6. Ահաւասիկ ես ածից զսպիսն ի բժշկութիւն, եւ բժշկեցից զնոսա, եւ յայտնեցից նոցա զհնչիւն խաղաղութեան եւ զհաւատս։
7. եւ դարձուցից զգերութիւնն Յուդայ եւ զգերութիւնն Երուսաղէմի. եւ շինեցից զնոսա իբրեւ զառաջինն։
8. եւ սրբեցից զնոսա յամենայն անիրաւութեանց իւրեանց՝ զոր անիրաւեցան յիս. եւ ոչ եւս յիշեցից զմեղս նոցա զոր մեղան առ իս՝ եւ ապստամբեցան յինէն։
9. Եւ եղիցին ինձ յուրախութիւն եւ յաւրհնութիւն՝ եւ ի մեծարանս առաջի ամենայն ժողովրդոց երկրի, որք լսիցեն զամենայն բարութիւնս՝ զոր ես արարից դոցա. եւ երկիցեն՝ եւ դառնայցեն ի վերայ ամենայն բարութեանցն, եւ ի վերայ ամենայն խաղաղութեանցն զոր ես արարից դոցա։
10. Այսպէս ասէ Տէր. Դարձեալ լուիցի ի տեղւոջդ յայդմիկ՝ զորմէ դուքդ ասէք թէ աւերակ է ի մարդոյ եւ յանասնոյ. ի քաղաքս Յուդայ՝ եւ արտաքոյ Երուսաղէմի յաւերակսն, առ ի չգոյէ մարդկան, եւ առ ի չգոյէ բնակչաց, եւ առ ի չգոյէ անասնոց։
11. ձայն ուրախութեան, եւ ձայն ցնծութեան. ձայն փեսայի, եւ ձայն հարսին. որք ասիցեն. Գոհացարուք զՏեառնէ ամենակալէ զի քաղցր է զի յաւիտեան է ողորմ նորա։ բերցեն պատարագս աւրհնութեան ի տուն Տեառն. զի դարձուցից զգերութիւն երկրիդ այդորիկ՝ ըստ առաջնոյն՝ ասէ Տէր։
12. Այսպէս ասէ Տէր զաւրութեանց. Դարձեալ եղիցի յաւերակ տեղւոջդ առ ի չգոյէ մարդոյ եւ անասնոյ, եւ յամենայն քաղաքս դորա վանք հովուաց, եւ մակաղատեղք խաշանց
13. ի քաղաքսլեռնականս, եւ ի քաղաքս Սեփեղայ, եւ ի քաղաքս Նագեբայ, եւ յերկրին Բենիամինի, եւ շուրջ զԵրուսաղէմաւ, եւ ի քաղաքս Յուդայ. դարձեալ անցանիցեն խաշինք ընդ ձեռն թուողի՝ ասէ Տէր։
14. Ահա աւուրք գան՝ ասէ Տէր, եւ հաստատեցից զբանս իմ բարի զոր խաւսեցայ ի վերայ տանդ Իսրայէլի, եւ ի վերայ տանդ Յուդայ։
15. Յաւուրս յայնոսիկ՝ եւ ի ժամանակին յայնմիկ ծագեցից Դաւթի ծագումն արդարութեան, որ առնիցէ իրաւունս եւ արդարութիւն յերկրի։
16. յաւուրսն յայնոսիկ փրկեսցի Յուդա, եւ Երուսաղէմ բնակեսցէ յուսով։ եւ այս է անուն՝ զոր կոչեսցէ նմա Տէր, արդարութիւն մեր։
17. Զի այսպէս ասէ Տէր. Մի պակասեսցէ Դաւթի այր՝ որ նստիցի յաթոռ տանն Իսրայէլի։
18. եւ քահանայիցն ղեւտացւոց՝ մի պակասեսցէ այր յերեսաց իմոց՝ մատուցանել ողջակէզս, եւ զոհել զոհս, եւ արկանել խունկս զամենայն աւուրս։
19. Եւ եղեւ բան Տեառն առ Երեմիա մարգարէ՝ եւ ասէ.
20. Այսպէս ասէ Տէր. Եթէ խափանիցէք զուխտ իմ զտուընջեան, եւ զուխտ իմ զգիշերոյ. զի մի լինիցի տիւ եւ գիշեր ի ժամանակի իւրեանց,
21. ապա եւ ուխտն իմ որ ընդ Դաւթի ծառայի իմոյ է՝ խափանեսցի, չլինել նմա որդի որ թագաւորեսցէ յաթոռ նորա։ եւ ի քահանայիցն ղեւտացւոց պաշտաւնէից իմոց։
22. Զոր աւրինակ ոչ թուին զաւրութիւնք երկնից, եւ ոչ չափի աւազ ծովու. նոյնպէս բազմացուցից զզաւակն Դաւթի ծառայի իմոյ, եւ զղեւտացիսն զպաշտաւնեայս իմ։
23. Եւ եղեւ բան Տեառն առ Երեմիա՝ եւ ասէ.
24 .Ո՞չ տեսանես զինչ խաւսի ժողովուրդդ՝ եւ ասեն. եթէ զազգս զերկուս զոր ընտրեաց Աստուած՝ մերժեաց զնոսա. եւ զժողովուրդն իմ այրացուցանեն չլինել միւսանգամ յազգ առաջի նոցա։
25. Այսպէս ասէ Տէր. Եթէ զուխտ իմ զտուընջեան եւ զգիշերոյ՝ եւ զերկնից եւ զերկրի հաստատութեամբ ոչ կարգեցի։
26. ապա եւ զզաւակն Յակովբայ եւ զԴաւթի ծառայի իմոյ՝ անարգեցից, չառնուլ ի զաւակէ նորա իշխան ի վերայ զաւակին Աբրահամու եւ Սահակայ եւ Յակովբայ։ զի դարձուցից զդարձ նոցա եւ գթացայց ի նոսա։
Հաղորդում կայքում սխալի վերաբերյալ
Տվյալ հատվածում առկա է սխալ: