1. Եւ եղեւ բան Տեառն առ իս՝ եւ ասէ.
2. Երթ եւ ընթերցիր յականջս որդւոցն Երուսաղէմի՝ եւ ասասցես։ Այսպէս ասէ Տէր, յիշեցի զքեզ՝ եւ զգութ մանկութեան քոյ, եւ զսէր կատարման քոյ՝ ի գալն քեզ զհետ սրբոյն Իսրայէլի։ Ասէ Տէր,
3. սուրբն Իսրայէլի. Տեառն է սկիզբն արմտեաց նորա. ամենեքեան որ ուտեն զնա զղջասցին. չարիք հասցեն ի վերայ նոցա՝ ասէ Տէր։
4. Լուարուք զբան Տեառն տունդ Յակոբայ՝ եւ ամենայն ազգ տանդ Իսրայէլի։
5. Այսպէս ասէ Տէր. Զի՞նչ վնաս գտին յիս հարքն ձեր զի հեռացան յինէն, եւ գնացին զհետ սնոտեաց եւ սնոտի եղեն։
6. եւ ոչ ասացին՝ ուր է Տէր որ եհան զմեզ յերկրէն Եգիպտացւոց, եւ առաջնորդեաց մեզ յանապատին, յանբաւ՝ եւ յանկոխ՝ եւ յանջուր՝ եւ յանպտուղ երկրին եւ ի ստուերս մահու. յերկիր՝ ընդ որ ոչ անց մարդ, եւ ոչ բնակեաց ի նմա որդի մարդոյ։
7. եւ տարաւ զմեզ ի Քերմէլ, ուտել զպտուղ նորա եւ զբարութիւնս։ եւ մտէք եւ պղծեցէք զերկիրն իմ, եւ զժառանգութիւն իմ եդիք ի պղծութիւն։
8. Եւ քահանայքն ոչ ասացին՝ ուր է Տէր. եւ վերակացուք աւրինաց իմոց ոչ ծանեան զիս, եւ հովիւքն ամպարշտեցան յիս։ եւ մարգարէքն մարգարէանային Բահաղու. եւ զկնի անշահիցն երթային։
9. Վասն այնորիկ տակաւին դատեցայց ընդ ձեզ՝ ասէ Տէր. եւ ընդ որդիս որդւոց ձերոց դատեցայց։
10. Արդ անցէք ընդ կղզիս Քետիմացւոց եւ տեսէք. եւ ի Կեդար առաքեցէք՝ եւ խելամուտ եղերուք յոյժ. եւ տեսէք եթէ եղեւ այսպիսի ինչ։
11. եթէ փոխեցին ազգքն զաստուածս իւրեանց, եւ նոքա ոչ են աստուածք. եւ ժողովուրդ իմ փոխեաց զփառս իւր, ուստի ոչ աւգտիցին։
12. Յիմարեցան երկինք վասն այսորիկ եւ սոսկացան յոյժ՝ ասէ Տէր։
13. զի երկուս չարիս գործեաց ժողովուրդ իմ. զիս թողին զաղբեւրս ջրոյ կենդանւոյ, եւ փորեցին իւրեանց գուբս ծակոտս, որք ոչ կարացին ունել ջուր։
14. Միթէ ծառա՞յ իցէ Իսրայէլ, կամ ստրո՞ւկ Յակոբ, զի եղեն յաւար.
15. ի վերայ նորա գոչեցին առեւծք, եւ ետուն զձայնս իւրեանց, որ արարին զերկիր նորա աւերակ. եւ քաղաքք նորա կործանեցան առ ի չգոյէ բնակչաց։
16. եւ որդիքն մեմփացւոց եւ տափնացւոց՝ ծանեան զքեզ եւ այպանեցին։
17. Ոչ ապաքէն թողուլն զիս արար քեզ զայդ ասէ տէր Աստուած քո. ի ժամանակի ածելոյն զքեզ ընդ անապատն։
18. Եւ արդ՝ զի՞նչ կայ քո եւ ճանապարհին եգիպտացւոց, ըմպել քեզ զջուր Գեհոնի. եւ զի՞նչ քո եւ ճանապարհին Ասորեստանեայց ըմպել զջուրն գետոց։
19. Խրատեսցէ զքեզ ապստամբութիւնդ քո, եւ չարիք քո կշտամբեսցեն զքեզ. եւ ծանիցես եւ տեսցես, թէ չար եւ դառն է քեզ թողուլն զիս՝ ասէ տէր Աստուած քո. եւ ոչ հաճեցայ ընդ քեզ՝ ասէ Տէր Աստուած քո։
20. Զի յաւիտենից խորտակեցեր զլուծն քո, եւ խզեցեր դու զկապանս քո. եւ ասացեր թէ ոչ ծառայեցից. այլ գնացից ի վերայ ամենայն բլրոց բարձանց, եւ ի ներքոյ ամենայն հովանաւոր ծառոց՝ եւ անդ շռայլեցայց ի պոռնկութիւն։
21. Եւ ես տնկեցի զքեզ որթ պտղաբեր ամենեւին ճշմարիտ. զիարդ դարձար ինձ ի դառնութիւն որթդ աւտարացեալ։
22. եթէ լուասցիս բարակաւ, եւ յաճախեսցես քեզ աճառս. սակայն ծրդեալ կաս յանիրաւութիւնս քո առաջի իմ՝ ասէ Տէր Տէր։
23. Զիա՞րդ ասիցես թէ ոչ պղծեցայ, եւ զհետ Բահաղու ոչ գնացի. տես զճանապարհս քո ի գերեզմանս, եւ ծանիր զինչ գործեցեր։
24. Ընդ երեկոյս ձայն լալոյ նորա գուժեաց ի ճանապարհս իւր. յաճախեաց ի ջուրս անապատի. ըստ ցանկութեան անձին իւրոյ այսակիր եղեւ։ Մատնեցաւ, եւ ո՞ դարձուսցէ զնա. ամենեքեան որ խնդրիցեն զնա ոչ աշխատեսցին. ի տառապանս նորա գտցես զնա։
25. Դարձո զսիրտ քո ի խիստ ճանապարհէ, եւ զկոկորդ քո ի ծարաւոյ. եւ նա ասէ. Կարաւղ եմ. քանզի սիրէր զաւտարոտիս՝ եւ երթայր զհետ նոցա։
26. Որպէս ամաչիցէ գող յորժամ ըմբռնիցի, այնպէս ամաչեսցեն որդիքն Իսրայէլի, ինքեանք եւ թագաւորք իւրեանց, եւ իշխանք իւրեանց, քահանայք իւրեանց, եւ մարգարէք իւրեանց։
27. Ցփայտն ասացին թէ հայր իմ ես դու. եւ քարին՝ թէ դու ծնար զիս. եւ դարձուցին յիս՝ զթիկունս եւ ոչ զերեսս իւրեանց։ եւ ի ժամանակի չարեացն իւրեանց ասասցեն՝ արի եւ փրկեա զմեզ։
28. Եւ ու՞ր են աստուածքն քո զոր արարեր քեզ. յարիցեն եւ փրկեսցեն զքեզ ի ժամանակի չարեաց քոց. զի ըստ թուոյ քաղաքացն քոց էին քեզ աստուածքն քո Յուդա, եւ ըստ թուոյ անցիցն Երուսաղէմի զոհէիք Բահաղու։
29. Արդ՝ ընդէ՞ր խաւսիք ընդ իս. զի ամենեքեան դուք ամպարշտեցայք, եւ ամենեքեան դուք անաւրինեցայք յիս՝ ասէ Տէր։
30. Զուր հարի զորդիսն ձեր, եւ խրատ դուք ոչ ընկալարուք, սուր եկեր զմարգարէսն ձեր. իբրեւ առեւծ սատակէր, եւ ոչ զարհուրեցարուք։
31. Լուարուք զպատգամս Տեառն. այսպէս ասէ Տէր. Միթէ անապա՞տ եղէ տանդ Իսրայէլի, կամ աւեր երկիր խոպանացեա՞լ. զի ասաց ժողովուրդ իմ, անտերունչք շրջեսցուք՝ եւ առ քեզ ոչ եկեսցուք։
32. Միթէ մոռասցի՞ հարսն զզարդ իւր, կամ կոյս զլանջագեղ կամար իւր. բայց ժողովուրդ իմ մոռացաւ զիս զաւուրս անթիւս։
33. Զի՞նչ եւս բարի հնարեսցիս ի ճանապարհս քո խնդրել զհաշտութիւն. ոչ այդպէս, այլ եւ դու իսկ անզգամեցար պղծել զճանապարհս քո։
34. եւ ի ձեռս քո գտաւ արիւն անձանց տնանկաց անմեղաց. ոչ ի վիհս գտի զնոսա, այլ առ ամենայն կաղնեաւք։
35. եւ ասացեր թէ անմեղ եմ, դարձցի սրտմտութիւն նորա յինէն։ Ահաւասիկ ես դատեցայց ընդ քեզ, զի ասացեր թէ ոչ մեղայ։
36. զի արհամարհեցեր յոյժ կրկնեալ զճանապարհս քո. եւ յԵգիպտոսէ ամաչեսցես՝ որպէս ամաչեցերն յԱսորեստանւոյն։
37. զի եւ անտի եւս ձեռս ի գլուխ ելցես. զի մերժեաց Տէր զյոյսն քո, եւ ոչ եւս աջողեսցիս ի նմա։
Հաղորդում կայքում սխալի վերաբերյալ
Տվյալ հատվածում առկա է սխալ: