Գլուխ 6

 

1․ Զաւրացարուք որդիք Բենիամինի ի մէջ Երուսաղէմի. փող հարէք ի Թեկուէ, եւ ի վերայ Բեթաքարմայ առէք նշան. զի չարիք կարկառեալ գան ի հիւսւսոյ, եւ բեկումն մեծ

2․ եղիցի գեղեցկին եւ փափկացելոյն։ եւ բարձցի բարձրութիւն քո դուստր Սիովնի։

3․ Եկեսցեն ի նա հովիւք եւ խաշինք իւրեանց, եւ կանգնեսցեն շուրջ զնովաւ զխորանս իւրեանց. եւ հովուեսցեն իւրաքանչիւր ձեռամբ։

4․ Պատրաստեցարուք ի վերայ նոցա ի պատերազմ. արիք եւ ելցուք ի վերայ նորա ի միջաւրէի։ վայ մեզ՝ զի տիւն կարճատեաց, եւ հասին մեզ ստուերք երեկորւոյ։

5․ Արիք եւ ելցուք գիշերի, եւ ապականեսցուք զհիմունս նորա։

6․ զի այսպէս ասէ Տէր զաւրութեանց. Ջարդեցէք զփայտակերտս նորա, արկէք ի վերայ Երուսաղէմի զաւր. զի նա է քաղաք ամենեւին սուտ. բռնութիւն ի մէջ նորա։

7․ Զոր աւրինակ ցրտացուցանէ գուբ զջուր իւր, այնպէս եւ նա ցրտացուցանէ զչարիս իւր։ ամպարշտութիւն՝ եւ չարութիւն լուիցի ի միջի նորա, յանդիման իւր հանապազ։ Ցաւովք եւ տանջանաւք

8․ խրատեսցիս Երուսաղէմ, գուցէ երբէք վերասցի անձն իմ ի քէն. գուցէ երբէք արարից զքեզ անապատ երկիր՝ ուր ոչ ոք երբէք բնակեցաւ։

9․ Զի այսպէս ասէ Տէր զաւրութեանց. Կթեցէք՝ կթեցէք. ճռաքաղ արարէք զմնացորդսդ Իսրայէլի, եւ անդրէն կրկնեսջիք որպէս կթաւղ յոճ իւր։

10․ Արդ՝ ընդ ու՞մ խաւսեցայց, եւ ո՞ւմ եդից վկայութիւն՝ եւ լուիցէ. ահաւադիկ անթլփատ են ականջք նոցա, եւ ոչ կարեն լսել։ ահա բան Տեառն եղեւ նոցա ի նախատինս, եւ ոչ եւս ախորժեսցեն զնա։

11․ Եւ ես զբարկութիւն իմ լցի եւ արգելի, եւ ոչ վախճանեցի զնոսա։ հեղից ի վերայ տղայոց արտաքուստ. եւ ի ժողովս երիտասարդաց ի միասին. զի այր եւ կին առհասարակ ըմբռնեսցին. ծեր՝ հանդերձ կատարելովն աւուրբք ընկրկեսցին։

12․ Եւ ըմբռնեսցին տունք նոցա ի ձեռս աւտարաց, անդք եւ կանայք նոցա ի միասին։ զի ձգեցից զձեռն իմ ի վերայ բնակչաց երկրին այնորիկ՝ ասէ Տէր։

13․ Զի ի փոքունց նոցա մինչեւ ցմեծամեծս, ամենեքեան կատարեցին զանաւրէնութիւնս. ի քահանայէ մինչեւ ի սուտ մարգարէ, ամենեքեան արարին ստութիւն։

14․ Եւ բժշկեցին զհարուածս դստեր ժողովրդեան իմոյ ընդ արհամարհանս. եւ ասէին. Խաղաղութիւն, խաղաղութիւն. եւ ու՞ր է խաղաղութիւն։

15․ Յամաւթ եղեն զի պակասեցան. եւ ոչ որպէս ամաչեցեալք ամաչեցին, եւ զանարգանս իւրեանց ոչ առին ի միտ։ վասն այնորիկ անկցին ի կործանումն իւրեանց. եւ ի ժամանակի այցելութեան իւրեանց սատակեսցին, ասէ Տէր։

16․ Այսպէս ասէ Տէր. Կացէք ի ճանապարհս եւ դիտեցէք, եւ հարցէք զյաւիտենական շաւղաց Տեառն. եւ տեսէք ո՞ր է ճանապարհ բարի, եւ գնացէք ընդ նա, եւ գտջիք սրբութիւն անձանց ձերոց։ եւ ասացին թէ ոչ երթիցուք։

17․ կացուցի ի վերայ ձեր դէտս, լուարուք բարբառոյ փողոյն. եւ ասեն, ոչ լուիցուք։

18․ վասն այնորիկ լուան ազգք, եւ որ հովուէին զհաւտս ի նոսա։

19․ Լուր երկիր, ահաւադիկ ես ածից ի վերայ ժողովրդեանդ այդորիկ չարիս, ըստ պտղոյ ապստամբութեան իւրեանց. զի բանից իմոց ոչ անսացին, եւ զաւրէնս իմ մերժեցին։

20․ Ընդէ՞ր է այդ զի բերես ինձ խունկս ի Սաբայ, եւ կինամոմոն յերկրէ հեռաստանէ։ Ողջակէզքն ձեր՝ չեն ընդունելի, եւ զոհք ձեր ինձ ոչ քաղցրացան։

21․ Վասն այդորիկ այսպէս ասէ Տէր. Ահաւադիկ ես տաց ի վերայ ժողովրդեանդ այդորիկ ախտ, եւ ախտասցին ի նմին, հարք եւ որդիք ի միասին. դրացին եւ ընկեր իւր կորիցեն։

22․ Այսպէս ասէ Տէր. Ահաւադիկ զաւր գայ ի հիւսւսոյ, ազգ մեծ. թագաւորք բազումք զարթիցեն ի ծագաց երկրէ,

23․ աղեղնաւորք եւ տիգաւորք. ազգ ժպիրհ եւ անողորմ. ձայն նորա իբրեւ զձայն ծովու յարուցելոյ. կառաւք եւ երիվարաւք ճակատեսցի, եւ լաստեսցի իբրեւ զհուր ի պատերազմ ի վերայ քո դուստր Սիովնի։

24․ լուաք զլուր նոցա՝ եւ լքան ձեռք մեր. նեղութիւնք կալան զմեզ իբրեւ երկունք ծննդականի։

25․ Մի ելանէք յանդս, եւ ընդ ճանապարհս մի գնայք. զի սուր թշնամեաց շուրջ պատեալ է։

26․ Դուստր ժողովրդեան իմոյ քուրձ զգեցիր, մոխիր տարածեա. առ զսուգ սիրելւոյ եւ կոծեա կոծ ողորմ. զի յանկարծակի եկեսցէ թշուառութիւն ի վերայ քո։

27․ Փորձիչ ետու զքեզ ժողովրդոց պաշարելոց, եւ գիտասջիր ի փորձել ինձ զճանապարհս դոցա։

28․ ամենեքեան անհնազանդք գնան կամակարութեամբ. իբրեւ զպղինձ եւ զերկաթ՝ ամենեքեան ապականեալք։

29․ Պակասեցին փուքք ի հրոյ. պակասեաց կապար. զուր աշխատի արծաթագործն, եւ նոցա չարիքն ոչ հալեցան։

30․ արծաթ խոտան կոչեցէք զնոսա, զի խոտեաց զնոսա Տէր։ լուարուք զպատգամս Տեառն ամենայն Հրէաստան։