1. Բանն որ եղեւ առ Երեմիա վասն ժողովրդեանն Յուդայ, յամին չորրորդի Յովակիմայ որդւոյ Յովսիայ արքայի Յուդայ. այն ամ առաջին էր Նաբուքոդոնոսորայ արքային բաբելացւոց։
2. Զբանն զոր խաւսեցաւ Երեմիա մարգարէ առ ամենայն ժողովուրդն Յուդայ, եւ առ բնակիչս Երուսաղէմի՝ եւ ասէ.
3. Յերեքտասաներորդէ ամէ Յովսիայ որդւոյ Ամովնայ արքայի Յուդայ մինչեւ ցայսաւր. այս քսան եւ երեք ամք, զի եղեւ բան Տեառն առ իս, եւ խաւսեցայ ընդ ձեզ կանխեալ ընդ առաւաւտս եւ ասէի, եւ ոչ լուարուք։
4. Եւ առաքեցի առ ձեզ զծառայս իմ զմարգարէս ընդ առաւաւտս արձակեալ, եւ ոչ լուարուք, եւ ոչ անսացէք ակընջաւք ձերովք լսել։
5. Ասէի՝ դարձարուք իւրաքանչիւր ի ճանապարհէ իւրմէ չարէ, եւ ի գնացից ձերոց չարաց. եւ բնակեսջիք յերկիրդ զոր ետու ձեզ՝ եւ հարց ձերոց յաւիտենից մինչեւ ցյաւիտեանս։
6. եւ մի երթայք զհետ աստուածոց աւտարաց ծառայել նոցա՝ եւ երկիր պագանել։ եւ մի բարկացուցանէք զիս գործովք ձեռաց ձերոց չարչարել զձեզ։
7. Եւ ոչ լուարուք ինձ՝ ասէ Տէր. զի բարկացուցանիցէք զիս գործովք ձեռաց ձերոց չարչարել զձեզ։
8. Վասն այդորիկ այսպէս ասէ Տէր զաւրութեանց. Զի ոչ հաւատացէք բանից իմոց,
9. ահաւասիկ ես առաքեմ, եւ առից զամենայն ազգս հիւսւսոյ՝ ասէ Տէր. եւ զՆաբուքոդոնոսոր արքայ բաբելացւոց զծառայ իմ. եւ ածից զնոսա ի վերայ երկրիդ այդորիկ՝ եւ ի վերայ բնակչաց դորա, եւ ի վերայ ամենայն ազգաց որ շուրջ զդովաւ. եւ աւերեցից զդոսա. եւ տաց զդոսա յապականութիւն եւ ի շչիւն՝ եւ ի նախատինս յաւիտենից։
10. եւ կորուսից ի դոցանէ զձայն ուրախութեան եւ զձայն ցնծութեան, եւ զձայն փեսայի եւ զձայն հարսին. զձայն երկանի եւ զլոյս ճրագի։
11. Եւ եղիցի ամենայն երկիրդ այդ յաւերակ եւ յապականութիւն. եւ ծառայեսցեն ազգացն այնոցիկ՝ եւ արքային բաբելացւոց զեւթանասուն ամ։
12. եւ ի կատարել ամացն իւթանասնից, խնդրեցից զվրէժս ի թագաւորէն բաբելացւոց. եւ յազգէն յայնմանէ՝ ասէ Տէր, ըստ անաւրէնութեանց նոցա, եւ յերկրէն Քաղդեացւոց. եւ եդից զնոսա յապականութիւն յաւիտենական։
13. Եւ ածից ի վերայ ամենայն երկրին այնորիկ զամենայն բանս իմ զոր խաւսեցայ վասն նորա՝ ըստ ամենայն գրելոցս ի գիրս յայսմիկ։ Զոր մարգարէացաւ Երեմիա ի վերայ ամենայն ազգաց,
14. զի ծառայեցին ի մէջ նոցա։ քանզի եւ նոքա ազգք բազումք՝ եւ թագաւորութիւնք մեծամեծք են. եւ հատուցից նոցա ըստ անաւրէնութեանն նոցա, եւ ըստ գործոց ձեռաց նոցա։
15. Զի այսպէս ասէ ցիս Տէր Աստուած Իսրայէլի. Առ զբաժակ գինւոյս անապակիս այսորիկ ի ձեռաց իմոց, եւ արբուսցես զդա ամենայն ազգաց առ որս առաքեմ զքեզ։
16. արբցեն՝ եւ քամեսցեն՝ եւ մոլեսցին յերեսաց սրոյն, զոր ես առաքեցից ի մէջ դոցա։
17. Եւ առի զբաժակն ի ձեռանէ Տեառն, եւ արբուցի ամենայն ազգաց առ որս առաքեաց զիս Տէր։
18. Երուսաղէմի, եւ քաղաքացն Յուդայ, եւ թագաւորաց նորա, եւ իշխանաց նորա. դնել զնոսա յաւերակ՝ եւ յանապատ՝ եւ ի շչիւն, եւ յանէծս ըստ աւուրս ըստ այսմիկ։
19. Եւ փարաւոնի արքայի եգիպտացւոց, եւ ծառայից նորա, եւ մեծամեծաց նորա, եւ ամենայն ազգի նորա.
20. եւ ամենայն խառնիճաղանճ զաւրաց նորա, եւ ամենայն թագաւորաց կղզւոյն, եւ ամենայն թագաւորաց երկրին այլազգեաց՝ Ասկաղոնի եւ Գազայ, եւ Ակկարովնի, եւ մնացորդացն Ազովտայ.
21. եւ Եդոմայ, եւ մովաբացւոցն, եւ որդւոցն Ամովնայ։
22. Եւ ամենայն թագաւորացն Տիւրոսի, եւ ամենայն թագաւորացն սիդովնացւոց. եւ թագաւորաց կղզւոյն որ յայն կոյս ծովուն.
23. եւ Դեդանայ, եւ Թեմանայ, եւ Բովկայ. եւ ամենայն յապաւելոցն զերեսաւք։
24. Եւ ամենայն թագաւորացն արաբացւոց, եւ ամենայն թագաւորաց խառնաղանճից. աւթագելոցն յանապատին։
25. եւ ամենայն թագաւորացն Զամբրեայ, եւ ամենայն թագաւորացն Ելամայ, եւ ամենայն թագաւորացն Պարսից։
26. Եւ ամենայն թագաւորացն հիւսւսոյ Արեւելից. մերձաւորաց եւ հեռաւորաց իւրաքանչիւր առ եղբաւր իւրում եւ ամենայն թագաւորաց երկրի, որ ի վերայ երեսաց երկրի։ եւ թագաւորն Սիսակ արբցէ յետ ամենեցուն։
27. Եւ ասասցես ցնոսա. Այսպէս ասէ Տէր ամենակալ Աստուած Իսրայէլի. Արբէք եւ արբեցարուք, յիմարեցարուք, եւ կործանեցարուք. եւ մի կանգնեսջիք յերեսաց սրոյն զոր եսն առաքեցից ի մէջ ձեր։
28. Եւ եղիցի յորժամ ոչ կամիցին ընդունել զբաժակն ի ձեռանէ քումմէ ըմպել, ասասցես ցնոսա. Այսպէս ասէ Տէր զաւրութեանց՝ ըմպելով արբջիք։
29. զի ահա ի քաղաքէն յորում կոչեցեալ է անուն իմ, ի նմա արարից սկիզբն չարչարելոյ. եւ դուք սրբելով սրբիցի՞ք. ոչ սրբեսջիք. զի սուր կոչեցի ես ի վերայ ամենեցուն որ բնակեալ են յերկրի, ասէ Տէր զաւրութեանց։
30. Եւ դու մարգարէասցիս ի վերայ նոցա զամենայն զպատգամս զայսոսիկ, եւ ասասցես ցնոսա. Տէր ի բարձանց ի սրբութենէ իւրմէ տացէ հրաման. տացէ զձայն իւր. զբան հրամանի ի տեղւոջէ իւրմէ։ եւ նոքա իբրեւ կթաւղք տացեն պատասխանի ի վերայ ամենայն բնակչաց երկրին,
31. թէ եկն սատակումն ի կողմանէ երկրին. զի դատաստան Տեառն է ի մէջ ազգաց, եւ դատեսցի ինքն զամենայն մարմին. եւ ամպարիշտք տուան ի սուր՝ ասէ Տէր։
32. Այսպէս ասէ Տէր զաւրութեանց. Ահաւադիկ չարիք գան յազգէ ի վերայ ազգի, եւ մրրիկ մեծ ելցէ ի ծագաց երկրէ։
33. եւ եղիցին վիրաւորք ի Տեառնէ յաւուր Տեառն. ի կողմանէ մինչեւ ցկողմ երկրին. մի կոծեսցին եւ մի ժողովեսցին, ընդ երեսս դաշտին իբրեւ զաղբ ընկեսցին։
34. Գուժեցէք հովիւք եւ աղաղակեցէք, եւ կոծեցարուք խոյք մաքեաց. զի կատարեցան աւուրք ձեր ի սպանումն, եւ ի ցրումն ձեր. կործանեսջիք իբրեւ խոյք ընտիրք։
35. եւ կորիցէ փախուստ ի հովուաց. եւ փրկութիւն ի խոյոցն մաքեաց։
36. Ձայն գուժի հովուաց, եւ աղաղակ խոյոցն մաքեաց. զի սպառեաց Տէր զարաւտս նոցա։
37. Եւ դադարեսցէ գեղեցկութիւն խաղաղութեանն յերեսաց բարկութեան սրտմտութեան Տեառն։
38. Թողին իբրեւ առեւծ զմորի իւր. եւ եղեւ երկիր նոցա յանապատ, յերեսաց բարկութեան սրտմտութեան սրոյն մեծի, եւ յերեսաց բարկութեան սրտմտութեան նորա։
Հաղորդում կայքում սխալի վերաբերյալ
Տվյալ հատվածում առկա է սխալ: