1. Խաւսեցաւ Տէր ընդ Մովսիսի եւ ընդ Ահարոնի` եւ ասէ.
2. Խաւսեաց ընդ որդիսն Իսրայէլի եւ ասասցես ցնոսա. Առն ուրուք առն` որոյ լինիցի ի մարմնի իւրում, ծորումն իւր պիղծ է:
3. Եւ այս աւրէն լիցի սրբութեան նորա, որոյ ծորիցէ սերմն ի մարմնոյ իւրմէ. կամ թէ հալիցի մարմին նորա ի ծորելոյն. պղծութիւն իւր ի նմա է զամենայն աւուրս ծորելոյն մարմնոյ իւրոյ, կամ թէ հալիցի մարմին իւր ի ծորելոյ անտի. պղծութիւն մարմնոյ է այն:
4. Ամենայն անկողին յորում ննջիցէ սերմնակաթն` պիղծ եղիցի. եւ ամենայն յորոյ վերայ նստիցի` պիղծ լիցի:
5. Եւ մարդ որ մերձեսցի յանկողին նորա` ողողեսցէ զհանդերձս իւր. եւ լուասցէ ջրով. եւ պիղծ լիցի մինչչեւ ցերեկոյ:
6. Եւ որ նստիցի ի վերայ անաւթոյ` յորում նստեալ իցէ սերմնակաթն, ողողեսցէ զհանդերձ իւր եւ լուասցէ ջրով. եւ պիղծ լիցի մինչչեւ ցերեկոյ:
7. Եւ որ մերձեսցի ի մարմին սերմանակաթին, ողողեսցէ զհանդերձս իւր. եւ լուասցէ ջրով. եւ պիղծ լիցի մինչչեւ ցերեկոյ:
8. Եւ եթէ թուք սերմանակաթին հասանիցէ ի սուրբն, ողողեսցէ զհանդերձս իւր եւ լուասցէ ջրով. եւ պիղծ լիցի մինչչեւ ցերեկոյ:
9. Եւ ամենայն համէտ իշոյ` յորոյ վերայ նստիցի սերմանակաթն, պիղծ լիցի մինչչեւ ցերեկոյ:
10. Եւ ամենայն` որ մերձեսցի յամենայն ինչ որ ի ներքոյ նորա իցէ, պիղծ լիցի մինչչեւ ցերեկոյ:
11. Եւ յոր ինչ մերձեսցի սերմանակաթն` եւ զձեռս իւր ոչ լուասցէ ջրով, ողողեսցէ զհանդերձս իւր եւ լուասցէ զմարմին իւր ջրով. եւ պիղծ լիցի մինչչեւ ցերեկոյ:
12. Եւ անաւթ խեցեղէն` յոր մերձեսցի սերմանակաթն, փշրեսցի. եւ ամենայն անաւթ փայտեղէն լուասցի ջրով. եւ եղիցի սուրբ:
13. Եւ եթէ սրբեսցի սերմանկաթն ի բղխմանէն իւրմէ, համարեսցի իւր եւթն աւր ի սրբութիւն իւր. եւ ողողեսցէ զհանդերձս իւր, եւ լուասցէ զմարմին իւր ջրով կենդանեաւ. եւ եղիցի սուրբ:
14. Եւ յաւուրն ութերորդի առցէ իւր երկուս տատրակս կամ երկուս ձագս աղաւնեաց. եւ տարցի զայն առաջի Տեառն ի դուռն խորանին վկայութեան. եւ տացէ ցքահանայն:
15. Եւ արասցէ քահանայն զմին վասն մեղացն եւ զմին` յողջակէզ. եւ քաւեսցէ վասն նորա քահանայն առաջի Տեառն ի բղխմանէ անտի նորա:
16. Եւ այր ոք` յորմէ ելանիցէ արութիւն սերման, լուասցէ զամենայն մարմին իւր ջրով. եւ պիղծ լիցի մինչչեւ ցերեկոյ:
17. Եւ ամենայն հանդերձ եւ մաշկ, յորոյ վերայ հասանիցէ արութիւն սերման, լուասցի ջրով. եւ պիղծ լիցի մինչչեւ ցերեկոյ:
18. Եւ կին` ընդ որում հարկանիցի այր արութեամբ սերման, լուասցին ջրով. եւ պիղծ լիցին մինչչեւ ցերեկոյ:
19. Եւ կին` որ բղխիցէ արիւն. եւ լինիցի բղխումն արեան նորա ի մարմնի իւրում, զեւթն աւր եղիցի ի դաշտանի իւրում.
20. ամենայն որ հարկանիցի ընդ նմա, պիղծ լիցի մինչչեւ ցերեկոյ:
21. Եւ ամենայն յորոյ վերայ ննջիցէ ի դաշտանի իւրում. եւ ամենայն յորոյ վերայ նստիցի` պիղծ լիցի.
22. եւ ամենայն որ մերձենայցէ յանկողին նորա, ողողեսցէ զհանդերձս իւր եւ լուասցէ զմարմին իւր ջրով. եւ պիղծ լիցի մինչչեւ ցերեկոյ:
23. Եւ ամենայն որ մերձանայցէ յամենայն անաւթ յորոյ վերայ նստիցի նա, ողողեսցէ զհանդերձս իւր, եւ լուասցի ջրով. եւ պիղծ լիցի մինչչեւ ցերեկոյ:
24. Եւ թէ տակաւին յանկողնի իւրում իցէ եւ կամ թէ ի վերայ անաւթոյ իրիք` յորոյ վերայ նստեալ իցէ, մերձանալոյ ուրուք առ նա` պիղծ լիցի մինչչեւ ցերեկոյ: Եւ եթէ ննջելով ոք ննջեսցէ ընդ նմա, եւ պղծութիւն նորա ի նմա իցէ, պիղծ լիցի զեւթն աւր. ամենայն անկողին յորոյ ննջիցէ` պիղծ լիցի մինչչեւ ցերեկոյ:
25. Եւ կին` որ բղխիցէ բղխումն արեան զաւուրս բազումս` ոչ ի ժամանակի դաշտանի իւրում. եւ թէ բղխիցէ յետ դաշտանի իւրոյ, ամենայն աւուրք բղխման պղծութեան իւրոյ այնպէս իցեն` իբրեւ զաւուրս դաշտանի իւրոյ. եւ եղիցի պիղծ:
26. Եւ ամենայն անկողին` յորոյ վերայ ննջիցէ զամենայն աւուրս բղխման իւրոյ, ըստ անկողնի դաշտանի իւրոյ լինիցի անսուրբ: Եւ ամենայն անաւթ` յորոյ վերայ նստիցի, պիղծ լիցի ըստ պղծութեան աւուրց դաշտանի իւրոյ:
27. Ամենայն` որ մերձեսցի ի նա, պիղծ լիցի. եւ որ ողողեսցէ զձորձս իւր եւ լուասցի զմարմին իւր ջրով. եւ պիղծ լիցի մինչչեւ ցերեկոյ:
28. Ապա թէ սրբիցի ի բղխմանէ անտի, համարեսցի իւր աւուրս եւթն, եւ ապա սրբեսցի:
29. Եւ յաւուրն ութերորդի առցէ իւր երկուս տատրակս կամ երկուս ձագս աղաւնեաց եւ տարցի զայն առ քահանայն` ի դուռն խորանին վկայութեան.
30. եւ արասցէ քահանայն զմին վասն մեղաց եւ զմին` յողջակէզ. եւ քաւեսցէ վասն նորա քահանայն առաջի Տեառն` ի բղխմանէ պղծութեան նորա:
31. Եւ զգուշագոյնս առնիցէք զորդիսն Իսրայէլի ի պղծութեանց իւրեանց. եւ ոչ մեռանիցին վասն անսրբութեան իւրեանց, առ ի պղծելոյ նոցա զխորանն իմ` որ է ի նոսա:
32. Այս աւրէն իցէ սերմանակաթին. եւ եթէ ելանիցէ յումեքէ արութիւն սերման` առ ի պղծելոյ նովաւ.
33. եւ տեռատեսի` ի դաշտանի իւրում. եւ սերմնակաթին` ի բղխման իւրում. արուին եւ իգին. եւ առն` որ ննջիցի ի դաշտանին:
Հաղորդում կայքում սխալի վերաբերյալ
Տվյալ հատվածում առկա է սխալ: