1. Խաւսեցաւ Տէր ընդ Մովսեսի եւ ասէ.
2. Խաւսեա ընդ որդիսն Իսրայէղի եւ ասասցես ցնոսա. Որ ոք ուխտիցէ ուխտս` տալ զգինս անձին իւրոյ Տեառն.
3. եղիցին գինք արուի` ի քսանամենից մինչչեւ ցվաթսնամեանս, եղիցին գինք նորա յսուն երկդրամեան արծաթոյ ըստ սրբութեան սկեղն.
4. եւ ի գին` լինիցին գինք երեսուն երկդրամեան:
5. Ապա թէ ի հինգամենից մինչչեւ ցքսանամեանս լինիցին, գինք արուին` քսան երկդրամեան, եւ ի գին` տասն երկդրամեան:
6. Եւ յամսաւրէէն մինչչեւ ցհինգեմեանն` եղիցի արուին հինգ երկդրամեան արծաթոյ, եւ իգին` երեք երկդրամեանք արծաթոյ:
7. Ապա թէ ի վաթսնամենից եւ ի վեր իցէ, եթէ արու իցէ` եղիցին գինք նորա հնգետասան երկդրամեան արծաթոյ. եւ իգի` տասն երկդրամեան:
8. Ապա թէ աղքատ իցէ ի գնոց, կայցէ առաջի քահանային, հատցէ նմա քահանայն գին. եւ որչափ ինչ կար իցէ ի ձեռին ուխտաւորին, արկցէ նմա գին քահանայն:
9. Եւ թէ յանասնոց մատուցանելեաց Տեառն իցէ պատարագ. որչափ ինչ տացէ ի նոցանէ Տեառն` սուրբ լինիցին.
10. եւ մի փոխանակեսցէ զլաւն ընդ յոռւոյն, եւ մի զյոռին ընդ լաւին. ապա թէ փոխանակելով փոխանակեսցէ զայն
անասուն ընդ անասուն, եղիցի այն եւ փոխանակն սուրբ:
11. Ապա թէ յամենայն անասնոյ անսրբոց` յորոց ոչ մատչիցի պատարագ Տեառն, կացուսցէ զանունն առաջի քահանային.
12. եւ արկցէ նմայ գինս քահանայն ի մէջ լաւին եւ յոռոյն. եւ որպէս զիարդ արկցէ նմա գինս քահանայն` կացցէ այն:
13. Իսկ եթէ փրկելով փրկեսցէ զնա. զհինգերորդ մասն գնոցն յաւելցէ ի նոյն:
14. Եւ մարդ ոք` որ սրբիցէ զտուն իւր սրբութիւն Տեառն, արկցէ նմա գինս քահանայն ի մէջ լաւին եւ յոռւոյն. եւ որպէս զիարդ արկցէ նմա գինս քահանայն` նոյն կացցէ:
15. Ապա թէ որ սրբեաց զնա` փրկեսցէ զտուն իւր, յաւելցէ զհինգերորդ արծաթոյ գնոց ի նոյն. եւ նմին իսկ եղիցի:
16. Եւ եթէ յանդւոյ կալուածոց իւրոց սրբեսցէ ոք ինչ Տեառն, եղիցին գինք նորա ըստ սերման իւր. քոռի միոջ գետնոյ եղիցի յսուն երկդրամեան արծաթոյ:
17. Եւ թէ յամէ թողութեանն սրբեսցէ զանդն իւր. ըստ գնոցն որչափ ինչ իցեն, կացցեն:
18. Ապա թէ յետ թողութեանն սրբեսցէ զանձն իւր, համարեսցի նմա քահանայն զարծաթն յայլ եւս ամսն` մինչչեւ ցտարին թողութեան. եւ հատցէ փոքր ինչ ի գնոցն նորա:
19. Ապա թէ փրկեսցէ զանդն որ սրբեաց զնա, յաւելցէ զհինգերորդ մասնն արծաթոյն գինս իւր. եւ նորա իսկ լիցի:
20. Ապա թէ ոք փրկեսցէ զանդն իւր եւ վաճառեսցէ զանդն այլում մարդոյ. մի եւս փրկեսցէ.
21. այլ եղիցի անդն ելեալ ի թողութեանն սուրբ Տեառն, իբրեւ զերկիր մի զատուցեալ` քահանային եղիցի կալուած:
22. Ապա թէ յանդւոյ զոր գրեալ իցէ, եւ ոչ իցէ յիւրոց կալուածոց` սրբեսցէ Տեառն.
23. հաշուեսցի ընդ նմա քահանայն ի գնոցն մինչչեւ ցտարին թողութեանն. եւ տացէ զգինս յաւուրն յայնմիկ սրբութիւն Տեառն:
24. Եւ յամին թողութեան դարձցի անդրէն առ այրն յորմէ ստացեալ իցէ. որոյ իւր իսկ էր կալուած երկրին:
25. Եւ ամենայն գինք եղիցին ըստ սրբութեան կշռոցն. քսան դանկ լիցի երկդրամեանն:
26. Եւ ամենայն անդրանիկ որ ծնանիցի խաշանց քոց` Տեառն լիցի. եւ որ ոք սրբեսցէ զայն. եթէ արջառ իցէ եւ եթէ ոչխար` Տեառն լիցի:
27. Եւ թէ ի չորքոտանեաց անսրբոց` փրկիցի ըստ գնոց իւրոց. զհինգերորդ մասնն ի նոյն յաւելցէ` եւ նորին լիցի. ապա թէ ոչ փրկիցի` վաճառեսցի ըստ գնոց իւրոց:
28. Ամենայն նուէր` զոր նուիրեսցէ ոք Տեառն, յամենայնէ որ ինչ իւր իցէ` ի մարդոյ մինչչեւ յանասուն, եւ յանասնոյ մինչչեւ ցկալուածս իւր, մի դարձցի անդրէն եւ մի փրկեսցի. ամենայն նուէր սուրբ սրբութեանց լինիցի Տեառն:
29. Ամենայն նուէր` որ նուիրեսցի ի մարդկանէ, մի փրկեսցի, այլ մահու մեռանիցի:
30. Ամենայն տասանորդ յերկրէ` ի սերմանեաց երկրին եւ ի պտղոյ ծառոց` Տեառն է սրբութիւն Տեառն:
31. Եւ թէ փրկելով ոք փրկեսցէ զտասանորդսն իւր, զհինգերորդ մասն յաւելցէ ի նոյն, եւ նորին լիցի:
32. Եւ ամենայն տասանորդ` արջառոյ եւ ոչխարի, եւ ամենայն տասանորդ` որ մտանիցէ ընդ թուով գաւազանի` սրբութիւն Տեառն լիցի:
33. Մի լիցի խտիր ընդ բարին եւ ընդ յոռին. եւ մի փոխանակեսցես զբարին ընդ յոռոյն. ապա թէ փոխանակելով փոխանակեսցես. եւ նա եւ փոխանակն իւր եղիցին սուրբ` եւ մի փրկեսցին:
34. Այս են պատուիրանք, զոր պատուիրեաց Տէր Մովսէսի առ որդիսն Իսրայէղի, ի լերինն Սինայի:
Հաղորդում կայքում սխալի վերաբերյալ
Տվյալ հատվածում առկա է սխալ: