1․ Սոքա են որ եկին առ Դաւիթ ի Սիկեղակ մինչդեռ ի նեղութեանն էր յերեսաց Շաւուղի, որդւոյ Կիսեա: Սոքաեկին ի բուն ճգնութեանն աւգնականք նմա ի պատերազմի
2․ կորովի աղեղնաւորք աջող, ջաղող պարսիւք, տիզաւք, նետիւք, յեղբարցն Շաւուղի, ի Բենիամին գնդէ
3․ իշխան Աքիեզեր, եւ Յովաս, որդիք Ամասայ Գաբաւովնացւոց, եւ Եզիէլ, եւ Փաղեթ, որդի Ասմովթայ, եւ Բարաքիէլ, եւ Յեւուղ, Անաթովթացիք
4․ եւ Սամեաս, Գաբաւովնացի հզաւրք ընդրեալք ընդ երեսունսն: Յերեմիայ, եւ Յեզիէլ, եւ Յովնան, եւ Յովսափատ, Գադարովթեա,
5․ Եղիեզեր, եւ Յերիմովթ Բաղեամ, եւ Շամրեաս, եւ Սափատիա Քարաբացի,
6․ Եղկանայ, եւ Յեշովէ, Եքիէլ, եւ Յեզրաառ, եւ Յեզբաամ, եւ Կորացիքն,
7․ Յովղեղա, եւ Զաբդեա, որդիք Յերիոամայ որդւոյ Գեդովրայ,
8․ եւ ի Գաղաադէ մեկնեցան գնացին առ Դաւիթ յանապատէ անտի, արք հզաւրք պատրաստեալք ի պատերազմ նիզակաւորք սպարաւորք: Դէմք առեւծուց դէմք նոցա, թեթեւութիւն ոտից իբրեւ թեթեւութիւն այծեմանց արագութեամբ ի վերա լերանց:
9․ Եղիեզեր զաւրաց գլուխ, Աբդիայ երկրորդ, Եղիաբ երրորդ,
10․ Մասամանէ չորրորդ, Երեմիայ հինգերորդ,
11․ Եթի վեցերրորդ, Էլիէլ եւթներորդ,
12․ Յովնաթան ութերորդ, Եզաբաղ իններորդ,
13․ Յերամայ Մաքաբենի մետասաներորդ:
14․ Այս իշխանք յորդւոցն Գադայ զաւրավար զաւրացն, մի մի ի հարիւրոյ աստի մեծ եւ փոքր առ հազարս կշռեալս:
15․ Սոքա այն են որ անցին ընդ գետն Յորդանան յամսեանն առաջնում եւ նայ գայր լի ափամբ եւ ափամբ առհասարակ ծայրիւ իւրով, եւ հալածեցին նոքա անտի զբնակիչս հովտացն յարեւելս եւ յրեւմուտս,
16․ եւ եկին նոքա յորդւոցն Բենիամին գնդէն յաւգնականութիւն Դաւթի,
17․ ապա ել Դաւիթ, ընդ առաջ նոցա խաւսել կալաւ եւ ասէ ցնոսա. Եթէ խաղաղութեամբ եկիք յաւգնականութիւն ինձ, եղիցի սիրտ իմ ի ձեզ ի հաւասարութիւն միաբանութեամբ: Եւ եթէ մատնել եկիք զիս ի ձեռս թշնամեաց իմոց, ոչ ի ձեռս արդար ճշմարտութեան տեսցէ Աստուած հարցն մերոց եւ յանդիմանեսցէ զձեզ,
18․ եւ ոգի զգեցաւ Ամասիայ այր իշխան երեսնիցն եւ ասէ. Երթ, երթ Դաւիթ որդի Յեսսեա, դու եւ ժողովուրդ քո, խաղաղութիւն ընդ քեզ եւ խաղաղութիւն յաւգնականս քո, զի աւգնեաց քեզ Աստուած քո, եւ ընկալաւ զնոսա Դաւիթ, եւ կացոյց զնոսա զաւրավարս ի վերայ ամենայն զաւրաց իւրոց,
19․ եւ ի Մանասէէ եւս եկին կացին առաջի Դաւթի, զի ելեալ գայր նա ընդ այլազգիսն որ եկին ի վերա Շաւուղի ի գործ պատերազմի, եւ ոչ տայր նոցա աւգնականութիւն Դաւթի, զի ի խորհրդի եղեն ընդ նախարարսն այլազգեաց եւ ասեն. Եթէ ի գլուխս մեր դարձցին անդրէն առ Տէր իւր Շաւուղ եւ հանին զնա անտի,
20․ եւ իբրեւ գնաց Դաւիթ ի Սիկեղակ, եկին կացին առաջի նորա, ի Մանասեան գնդէ անտի Յեդնայ եւ Յուզաբաղ, եւ Յադիէլ, եւ Միքաէլ, եւ Յուզաբատ, եւ Եղիուս, եւ Շիղաթայ: Իշխանք զաւրավարք հզաւրք զաւրութեանց
21․ եւ նոքա եկին յաւգնականութիւն Դաւթի ի Գեդուր, զի էր նա անդ հալածական, զի հզաւրք զաւրութեամբ էին ամենեքեան եւ եղեն իշխանք զաւրավարք զաւրաց նորա
22․ զի ժամանակէ ի ժամանակ զաւրհանապազ գային առ Դաւիթ յաւգնականութիւն իբր ի բանակ մեծ իբր ի բանակ Աստուծոյ:
23․ Եւ այս անուանք իշխանաց զաւրավարաց, որ եկին առ Դաւիթ ի Քեբրոն դարձուցանել զարքայութիւն իշխանութեան Շաւուղի առ Դաւիթ ըստ բանին Տեառն: Եւ այս թիւք.
24․ Որդիք Յուդայ սպառազէնք նիզակաւորք եւ սպարաւորք վեց հազար եւ եւթհարիւր կուռ վառել:
25․ Որդւոցն Շմաւոնի նոյնպէս հզաւրք զաւրութեանց կարգեալք եւ կազմեալք, պատրաստեալք ի գործ պատերազմի եւթ հազար եւ հարիւր,
26․ որդւոցն Ղեւեայ չորս հազար եւ հինգ հարիւր
27․ եւ Յունադա զաւրագլուխ: Եւ որդւոցն Ահարովնի ընդ նմա երեք հազար եւ եւթ հարիւր,
28․ եւ Սադովք մանուկ հզաւր զաւրութեամբ ի վերայ, եւ ի տանէ հաւր իւրոյ քսան երկու զաւրագլուխք:
29․ Եւ յորդւոցն Բենիամենի յեղբարցն Շմաւոնի երեք հազարք, եւ բազումք ի նոցանէ մինչչեւ ցայս ժամ պահապան կային ի վերա տանն Շաւուղի:
30․ Եւ ի տանէն Եփրեմա քսանհինգ հազար եւ ութ հարիւր այր, արք հզաւրք պատերազմողք ըստ ազգի ազգի գնդացն նահապետաց,
31․ եւ ի կէս ազգին Մանասեան գնդին, ութ ու տաս հազար, որ անուանեցան անուամբ գալ թագաւորեցուցանել զԴաւիթ:
32․ Եւ յորդւոցն Իսաքարայ արք իմաստունք գիտութեամբ, ժամանակագէտք, յառաջադէմ իմանալ գիտել զինչ գործիցէ Իսրայէղի ի սկզբան իւրում երկերիւր արք հաւասար ամենեքին, եւ եղբարք իւրեանց ընդ ինքեանս:
33․ Եւ ի Զաբուղովն գնդէ անտի գային ի գործ պատերազմի ամենայն պատրաստութեամբ իւրեանց հիսուն հազար, ոչ ձեռնունայն եւ ի սիրտս սիրտս բաժանեալս:
34․ Եւ ի Նեփթաղիմ գնդէ իշխանք հազար եւ ընդ նոսա գային սպարաւորք եւ նիզակաւորք երեսուն եւ եւթ հազար:
35․ Եւ ի Դան գնդէ անտի կազմեալք ի գործ պատերազմի քսան եւ ութ հազար եւ հինգ հարիւր:
36․ Եւ Յասէր գնդէ անտի գային յաւգնականութիւն գործոյ պատերազմին քառասուն հազար
37․ եւ յայնկոյս Յորդանան գետոյ: Ի Հռուբէն եւ ի Գադ, եւ ի կէս ազգին Մանասեան գնդէ անտի գային ամենայն կազմութեամբ, պատրաստութեամբ գործոյ պատերազմին հարիւր քսան հազար,
38․ ամենայն պատրաստութեամբ ի գործ պատերազմի միաբան ի Քեբրովն, թագաւորեցուցանել զԴաւիթ ի վերայ ամենայն որդւոցն Իսրայէղի, եւ ամենեքին հաւասարութեամբ միաբան հասին առ Դաւիթ
39․ եւ լինէին անդ առ նմա զերիս աւուրս ուտելով եւ ըմբելով, զի պատրաստեալ էր նոցա համաբարս յերբարցն իւրեանց,
40․ ի սահմանակցացն իւրեանց Իսաքարայ ի Զաբողոնէ, ի Նեփթաղեմայ, եւ կրէին իշովք, ուղտովք, եւ ջորովք, եւ մղաւք զկերակուրս ալեր եւ գինոյ եւ չամչոյ, եւ պաղատիտս ձեթ, եւ զարջառ, եւ զոչխար յոյժ, զի ուրախութիւն մեծ էր ընդ ամենայն Իսրայէղ:
Հաղորդում կայքում սխալի վերաբերյալ
Տվյալ հատվածում առկա է սխալ: