1. Դարձեալ խաւսել սկսաւ Դաւիթ ընդ զաւրսն եւ ասէ. Որդեակ իմ Սողոմովն զոր ընտրեաց Տէր մանուկ մատաղ եւ գործ մեծ, զի ոչ եթէ մարդկան է բնակութիւն գործոյն այլ Տեառն Աստուծոյ
2. բայց ես յամենայն զաւրութենէ իմմէ պատրաստեցին նիւթ տան Աստուծոյ իմոյ, զոսկի յոսկւոյ տեղ եւ զարծաթ յարծաթոյ տեղ եւ զպղինձ ի պղընձոյ զերկաթ յերկաթոյ տեղ, եւ զփայտ ի փայտի տեղ եւ քարինս լրի, եւ ականս պատուականս ազգի ազգիս եւ զամենայն ակն պատուական, եւ վէմս դահանակեայս:
3. Եւ դարձեալ զի հաճեալ էի ես մտադեւր, շինել զտուն Տեառն Աստուծոյ իմոյ, գոյ եւ այլ որ ես ստացայ ինձ ոսկի եւ արծաթ եւ ետու ես ի տաճարն Տեառն Աստուծոյ իմոյ, ի բարձրութիւն թող զայն որ պատրաստեցի ես նիւթ տաճարին, ետու ես ի տուն սրբոյն սրբոց:
4. Երիս հազարս քանքարս ոսկի ի Սոփերայ եւ եւթն հազար քանքար արծաթոյ սրբոյ զի աւծցես նովաւ զորմս տաճարին
5. ի վերայ ոսկւոն ոսկւով, եւ ի վերայ արծաթոյն արծաթով, եւ յամենայն գործ ձեռին ճարտարապետաց: Արդ եթէ իցէ ոք յաւժար խոտաւուտ բերել այսաւր լցցէ զձեռս իւր Տեառն Աստուծոյ:
6. Եւ անդէն վաղվաղակի սկսան նահապետք ազգատոհմացն եւ իշխանք որդւոցն Իսրայէղի, եւ զաւրագլուխ հազարաւոր գնդաց եւ որ պետք պետք էին ի վերայ ամենայն գործոյն տան թագաւորին,
7. եւ շինաւղք անգամ եկին բերին գործ տանն Տեառն, ոսկւոյ քանքարս հինգ հազարս, եւ բիւր սատերս, եւ արծաթոյ քանքարս տասն հազարս, եւ պղնծոյ քանքարս բիւր եւ ութ հազար, եւ երկաթոյ հարիւր հազար քանքար,
8. եւ որոց գտան ականք պատուականք ի գանձս իւրեանց, եկին բերին ի ձեռն յԻսրայէլայ Գերսովնեանց,
9. եւ ուրախ եղեն ժողովուրդն ի վերա ինքնակամ մտադիւր նպաստիցն, զի ամենեքին մտադիւր կամաւք կամակարութեամբ բերին զնպաստն ի շինած տան Տեառն:
10. Եւ Դաւիթ արքայ ուրախ եղեւ յուրախութիւն մեծ, եւ աւրհնեաց Դաւիթ զՏէր առաջի ամենայն ժողովրդոցն եւ ասէ. Աւրհնեալ ես դու Տէր Աստուած Իսրայէղի հարցն մերոց յաւիտենից մինչչեւ յաւիտեան:
11. Քեզ Տէր մեծութիւն եւ զաւրութիւն եւ մեծ վայելչութիւն, յաղթութիւն եւ խոստովանութիւն, զի դու ամենայն յամենայնի յերկինս եւ յերկրի ամենեցուն տիես: Յերեսաց քոց խռովին ամենայն թագաւորթիւնք ազգաց
12. քո է Տէր արքայութիւն եւ ամբառնալ իշխանութեանց զի ի քէնէ ամենայն մեծութիւն եւ փառք, դու ամենայնի տիրես, եւ ի ձեռն քո են ամենայն իշխանութիւնք եւ զաւրութիւնք, ի ձեռս քո են Տէր ամենակալ ամենայն ողորմութիւնք, մեծացուցանել եւ զաւրացուցանել զամենայն
13. եւ արդ Տէր գոհանամք զքէն, եւ աւրհնեմք զանուն փառաց քոց զի ով ուստեք էի ես,
14. եւ կամ զինչ ժողովուրդ իմ, զի զաւրացաք մեք նպաստս կամաւք կամակարութեամբ մատուցանել քեզ, զի քո էր այս ամենայն եւ զքո առեալ քեզ մատուցանեմք,
15. եւ մեք նշդեհք եւ պանդուխտք առաջի քո, որպէս ամենայն հարք մեր եւ իբրեւ ստուեր են աւուրք մեր ի վերայ երկրի, եւ ոչ եթէ առ այս ամենայն է յոյս մեր
16. Տէր Աստուած մեր, որ պատրաստեցաք նիւթ շինածոյ տան անուան սրբոյ քո այլ ի ձեռաց քոց առաք Տէր, եւ քեզ այդրէն մատուցանեմք:
17. Եւ գիտացաք թէ դու ես որ քննես զսիրտ, եւ սիրես զարդարութիւն, եւ ես պարզմտութեամբ սրտի իմում զնպաստ մատուցի զայս, եւ ժողովուրդքս քո այս որ գտաւ աստ տեսի զի մտադիւրութեամբ զնպաստս մատուցանեն քեզ:
18. Տէր Աստուած Աբրահամու, Սահակա, Յակոբու հարցն մերոց պահեա զնոսա զստեղծուած խորհրդոց սրտից ժողովրդեան քո, եւ ուղղեա զսիրտս սոցա առ քեզ
19. եւ Սողոմովնի որդւոյ իմում տուր սիրտ սրբութեան կատարել զամենայն պատուիրանս քո, եւ զվկայութիւնս քո եւ զհրամանս քո, եւ կատարել զամենայն գործս շինուածոյս, որ առաջի արկեալ է զնիւթ շինածոյս զոր պատրաստեցի,
20. եւ ասէ Դաւիթ ցամենայն ժողովուրդն աւրհնեցէք եւ դուք զՏէր Աստուած մեր եւ աւրհնեցին ամենայն ժողովուրդքն զՏէր Աստուած հարցն իւրեանց, եւ ծունր եդին եւ երկիրպագին Տեառն եւ արքայի:
21. Ապա մատուցանէր Դաւիթ պատարագս եւ ողջակէզս ի վաղիւ անդր աւուրն առաջնումն, զուարակս հազարս եւ խոյս հազար, եւ գառինս հազար, ըստ զոհից նոցա ողջակէզս բազմութեանն ամենայն Իսրայէղացւոց:
22. Եւ կերան եւ արբին յաւուր յայնմիկ խնդութեամբ եւ ուրախութեամբ բազմաւ:
23. Եւ դարձեալ թագաւորեցուսցին զՍողոմովն զորդի Դաւթի եւ աւծին զնա ի ձեռն Տեառն ի թագաւորութիւն եւ զՍադովքն աւծին ի քահանայութիւն եւ նստաւ Սողոմովն յաթոռ Տեառն ի թագաւորութիւն փոխանակ Դաւթի հաւր իւր, եւ յաջողեցաւ նմա եւ լսէին նմա ամենայն Իսրայէղ,
24. եւ իշխանք եւ հզաւրք եւ ամենայն որդիքն արքայի հաւր իւրոյ Դաւթի հնազանդեցան նմա:
25. Եւ մեծացոյց Տէր զՍողոմովն առաջի ամենայն Իսրայէղացւոցն եւ եդ ի վերայ նորա փառս արքայութեան որոյ ոչ ուրէք երբէք եղեն ի վերայ թագաւորութեանցն, որ յառաջ քան զնա ի վերայ տանն Իսրայէղի:
26. Եւ Դաւիթ որդի Յեսսեայ թագաւորեաց ի վերայ Իսրայէղի, եւ աւուրք թագաւորութեան նորա քառասուն ամ
27. ի Քեբրովն եւթն, ի յԵրուսաղէմ երեսուն եւ երիս:
28. Եւ մեռաւ Դաւիթ ի ծերութեան բարութեամբ, լի աւուրբք մեծութեամբ եւ փառաւք,
29. եւ այլ բանք Դաւթի արքայի առաջին եւ վերջին: Եւ աւանիկ գրեալ է ի բանս Սամուէլի որ տեսանէր, եւ ի բանս Նաթանայ եւ ի բանս Գադայ որ տեսանէր,
30. վասն ամենայն թագաւորութեանց զաւրութեանց նորա, եւ վասն ամենայն ժամանակացն որ անցին ի վերայ նորա եւ որ անցին ի վերայ Իսրայէղի եւ ընդ ամենայն թագաւորութիւնս երկրի:
Հաղորդում կայքում սխալի վերաբերյալ
Տվյալ հատվածում առկա է սխալ: