Գլուխ 1

   
1․ Եւ զաւրացաւ Սողոմովն որդի Դաւթի ի թագաւորութեանն իւրում. եւ տէր Աստուած իւր ընդ նմա էր. եւ մեծացուցաներ զնա յոյժ:

2․ Ապա խաւսել սկսաւ Սաւղոմովն ընդ ամենայն Իսրայէղ` ընդ իշխանս հազարաւոր գնդաց եւ ընդ զաւրագլուխս հարիւրապետացն` եւ ընդ դատաւորսն եւ ընդ ամենայն իշխանս նահապետաց ազգատոհմացն առաջի ամենայն Իսրայէղացւոց:

3․ Եւ գնաց Սողոմովն եւ ամենայն զաւրքն ի բարձունս զի անդ էր վրան ժամուն վկայութեանց տեառն Աստուծոյ զոր արար Մովսէս ծառայ Տեառն յանապատի անդ:

4․ քանզի զտապանակն կտակարանաց Տեառն եկն եբեր Դաւիթ ի Կարիաթիարիմ քաղաքէ եւ կանկնեաց նմա խորան Դաւիթ յԵրուսաղէմ,

5․ եւ սեղանն արուրի զոր արար Բեսէլիէլ որդի Շարուհեայ, ընդէն վրան ժամուն վկայութեանց Տեառն: Եւ խնդիր արար Սողոմովն եւ ժողովուրդն:

6․ եւ եկն մատուցանել անդ Սողոմովն ի վերայ սեղանոյն որ կայր առաջի Տեառն ի խորան ժամուն եւ անդ մատուցանէր ողջակէզս հազարաւորաց

7․ ի գիշերին յայնմիկ երեւեցաւ Տէր Սողոմովնի եւ ասէ. Խնդրեա դու քեզ զինչ խնդրես եւ տաց քեզ:

8․ Եւ ասէ Սողոմովն ցԱստուած. Դու արարեր ընդ Դաւթի հաւր իմոյ ողորմութիւն մեծ, եւ թագաւորեցուցեր զիս փոխանակ նորա,

9․ եւ արդ` տէր Աստուած հաստատեսցի բանն քո որ ընդ Դաւթի հաւր իմում էր, զի դու թագաւորեցուցէր զիս ի վերայ ժողովրդեանս Իսրայէղի մեծիս այսորիկ որ բազմացեալ են իբրեւ զհող երկրի:

10․ Արդ` տուր ինձ իմաստութիւն եւ հանճար զի ելանել մտանել մարթացից առաջի ժողովրդեանս այսորիկ:

11․ Ապա ետ պատասխանի Տէր, եւ ասէ ցՍողոմովն. Փոխանակ զի եղեւ բանս այս ի սրտի քում եւ ոչ խնդրեցեր դու մեծութիւն ընչից ստացուածոց եւ ոչ փառս բարձրութեան եւ զոգիս ատելեաց քոց, եւ ոչ աւուրք կենաց բազում խնդրեցեր դու այլ խնդրեցեր դու իմաստութիւն եւ հանճար զի դատել մարթասցես զժողովուրդ իմ զոր թագաւորեցուցի ես զքեզ ի վերայ դոսա,

12․ զիմաստութիւն եւ զհանճար տալով տաց քեզ, եւ զմեծութիւն եւ զինչս եւ զստացուածս եւ զփառստաց քեզ որպէս զի ոչ ուրեք երբեք եղեւ նման քեզ ի թագաւորս որ յառաջք էին քան զքեզ, եւ ոչ լիցի ոք իբրեւ զքեզ յետ քո

13․ եւ եկն Սողոմովն ի Հռամայ ի Գաբաւովնէ յԵրուսաղէմ ի վրան ժամուն վկայութեանց եւ թագաւորեաց ի վերայ Իսրայէղի:

14․ Եւ արար իւր Սողոմովն կառս եւ երիւվարս եւ եղեն կառք նորա հազար եւ երեք հարիւր եւ հեծեալք իբրեւ երկոտասան հազար եւ եթող անդ զկառսն ի քառսն ի քաղաքս կառապանացն եւ զաւրքն էին ընդ արքայի յԵրուսաղէմ:

15․ եւ կուտեաց արքայ զգանձս ոսկւոյ եւ արծաթոյ յԵրուսաղէմ իբրեւ զքարինս եւ զմայր փայտն ետ ի կողմանսն Հրէաստանի իբրեւ զթթենի դաշտաց բազում յոյժ,

16․ եւ ելք երիւարացն Սողոմովնի յԵգիպտոսէ եւ գինք վաճառականացն թագաւորին,

17․ եւ ելանէր յերկրէն Եգիպտացւոց, կառք մի ընդ վեց հարիւր արծաթոյ եւ ձի մի ընդ հարիւր յիսուն եւ այսպէս առնէր ամենայն թագաւորացն Քետացւոց եւ թագաւորացն Ասորեստանեաց ի ձեռն իւրեանց բերէին: