1․ Եւ եղեւ յետ բանիցս այսոցիկ եւ յետ ճշմարտութեանս այսորիկ եկն ել Սենեքերիմ արքայ Ասորեստանեաց եկնեհաս ի վերայ Յուդայ եւ սփռեցաւ տարածեցաւ ընդ ամենայն քաղաքս պարսպաւորս եւ եդ ի մտի իւրում պատել պաշարել եւ առնուլ զնոսա:
2․ եւ ետես Եզեկիայ եթէ խորհուրդ ի միտ առեալ գալ տալ պատրազմ ի վերայ Երուսաղէմի.
3․ խորհուրդ կալաւ ընդ ծերակոյտ ժողովրդեանն իւրում, եւ ընդ ամենայն մեծամեծս զի ելցեն խցցեն զականս աղբերացն արտաքոյ քաղաքին:
4․ ապա հաճոյ թուեցաւ յանձն առին ամենեքին եւ ելին բազմութիւն յոյժ, եւ խցին զականս աղբերցն եւ թաքուցին զգնացս ջուրցն եւ կորուսին զգետն որ ընդ մէջ քաղաքին էր, թէ գուցէ գայցէ արքայն Աստանեաց գտանիցէ ջուր եւ զտեղի առեալ զաւրասցի ի վերայ քաղաքիս,
5․ եւ դարձել աճապարէր շինէր զպարիսպն կործանեալս եւ կանգնէր զաշտարակն եւ արտաքոյ պարսպին այլ պատուար ածին եւ շուրջ զքաղաքաւն Դաւթի պարիսպ ամրացուցանէր:
6․ Պատրաստէր զէն, եւ մեքենայս բազում եւ պահապանս բազում կացուցանէր եւ իշխանս զաւրագլուխս ի վերայ զաւրացն, եւ ի գործ պատերազմի կացուցանէր եւ ժողովեցան առ նա ի մէջ քաղաքին ամենեքին: Եւ խաւսել սկսաւ Եզեկիա ի սիրտս մարդկանն եւ ասէ.
7․ Քաջալերեցարուք պինդ կացէք զաւրացարուք մի երկնչիք մի զանգիտէք մի զարհուրիք յերեսաց թագաւորին Ասորեստանեաց եւ մի յազգաց զաւրաց ժողովրդեան նորա, զի ընդ մեզ բազումք են քան ընդ նոսա.
8․ ընդ նմա բազում մարմնաւոր եւ ընդ մեզ տէր Աստուած զաւրութեանց տալ պատերազմ ընդ մեր, եւ փրկել զմեզ, եւ այսպէս քաջալերէր Եզեկիայ արքա զՅուդայ:
9․ Ապա յետ այսորիկ առաքեաց Սենեքերիմ արքայ զծառայս իւր ի վերա Երուսաղէմի: Եւ ինքն էր ի Ղաքիս եւ ամենայն զաւրք իւր ընդ նմա, եւ առաքեաց նա առ Եզեկիայ արքայ Յուդայ եւ առ ամենայն զաւրսն Յուդայ որ էին յԵրուսաղէմ եւ ասէ.
10․ Այսպէս ասէ Սենեքերիմ արքայ Ասորեստանեաց. Յո կամ յինչ յուսացեալ էք դուք զի ելեալ նստիք դուք այդմ արգեալնի յԵրուսաղէմ.
11․ ոչ աւադիկ Եզեկիայ պատրէ զձեզ պահել պաշարել զձեզ մատնել զձեզ ի սով եւ ի ծարաւ, եւ ի մահ, եւ քաջալերէ զձեզ եւ ասէ. Տէր Աստուած ապրեցուցանէ զձեզ ի ձեռաց թագաւորաց Ասորեստանեայց.
12․ ոչ այդ այն Եզեկիայ է որ քակեաց զբարձունսն եւ կործանեաց զբագինսն եւ ասէ ցՅուդայ եւ ցբնակիչս Երուսաղէմ, եւ աւասիկ կամ ասէ առաջի սեղանոյս այսորիկ, երկիր պագէք դուք, եւ ի սմին խունկս արկեալ պաշտաւն պաշտիջիք,
13․ արդ` ոչ գիտէք դուք զինչ գործ գործեցի ես, կամ արք իմ ընդ ամենայն ազգս ազգաց երկրի.
14․ միթէ կարացին ինչ ընդ դէմ կալ դիքն հեթանոսաց ամենայն երկրի, եւ կամ փրկեցին զիւրաքանչիւր ժողովս ի ձեռաց իմոց:
15․ եւ արդ` մի խաբեսցէ զձեզ Եզեկիայ արքայ մի տացէ ձեզ զուր տարապարտուց յուսալ ի նայ, արդ` ով է այն Աստուած որ կարէ փրկել զձեզ ի ձեռաց իմոց: Մի պատրեսցէ զձեզ եւ մի հաւատայք դուք նմա զի ոչ կարեն աստուածք ամենայն հեթանոսաց ապրեցուցանել զիւրաքանչիւր ժողովուրդ ի ձեռաց իմոց եւ ի հարց մերոց: Իսկ արդ` այլ Աստուած զիարդ կարասցէ փրկել զձեզ ի ձեռաց իմոց:
16․ եւ խաւսեցան արքն բանս ամբարտաւանս յԱստուած եւ յԵզեկիայ եւ ի ժողովուրդն Յուդայ:
17․ Նայեւ հրովարտակս եւս ետ բերել Սենեքերիմ արքայն նախատանաց Տեառն Իսրայէղի, եւ զայս եւս գրեալ էր եթէ որպէս ոչ կարացին դիքն հեթանոսաց փրկել զիւրաքանչիւր զժողովուրդս իւրեանց ի ձեռաց իմոց: Սոյնպէս եւ Աստուածդ Իսրայէղի ոչ կարէ փրկել զԵզեկիայ եւ զժողովուրդդ ի ձեռաց իմոց,
18․ եւ գոչեցին ի վերայ ի բարբառ մեծ. զարհուրեցուցանել զզաւրսն որ ի վերայ պարսպին էին զի զանգիտեցուսցեն զնոսա առնուլ զքաղաքն:
19․ եւ խաւսել սկսան յԱստուած իբրեւ ի դիսն հեթանոսաց:
20․ Ապա եկաց յաղաւթս Եզէկիայ արքայ եւ Եսայի մարգարէ որդի Ամովսայ, աղաղակեցին առ Աստուած յեկինս ի վերայ բանիցն այնոցիկ:
21․ եւ առաքեաց տէր Աստուած զհրեշտակ յերկնից եւ սատակեաց զամենայն զաւրն պատերազմողս զիշխանս զաւրավարս բանակին Ասորեստանեաց: Եւ դադարեցոյց զնոսա ամաւթալից կոր ակնեալ յերկիրն իւրեանց եւ եկն եմուտ ի տուն Աստուծոյ իւրոյ եւ մտին որդիքն որ յորովայնէ իւրմէ էին եւ անդէն մաշեցին զնա ի սուր սուսերի իւրեանց,
22․ եւ փրկեաց տէր Աստուած զԵկեզկիա եւ զամենայն բնակիչսն Երուսաղէմի ի ձեռաց Սենեքերիմ արքային Ասորեստանեաց, եւ ի ձեռաց ամենայն զաւրաց նորա, եւ հաստատեաց տէր Աստուած շուրջ զնոքաւք խաղաղութիւն,
23․ եւ բազում այնուհետեւ սկսան շուրջանակի բերել զպատգամսն Աստուծոյ յԵրուսաղէմ, եւ բազում ընձայս եւ գահամունս բերէին Եզէկիայ արքայի, եւ բարձրացաւ այնուհետեւ Եզեկիայ յաչս ազգաց ամենայնի որ բնակեալ էին շուրջ զնովաւ:
24․ Եւ ընդ ժամանակսն ընդ այնոսիկ հիւանդացաւ Եզեկիայ արքայ յախտ մահու հիւանդութեան, եւ եկաց յաղաւթս Եզէկիայ առ տէր Աստուած իւր եւ ետ նմա նշան.
25․ սակայն ոչ ըստ պարգեւացն Աստուծոյ հատոյց նմա Եզէկիա, այլ մեծամտեաց եւ հպարտացաւ եւ բարձրացաւ սիրտ իւր: Եւ եղեւ բարկութիւն մեծ ի վերայ եւ ի վերայ Երուսաղէմի եւ ի վերայ նորա,
26․ եւ խոնարհեցաւ Եզէկիայ ի բարձրութենէ մեծամտութեան սրտին իւրոյ ինքն եւ բնակիչն Երուսաղէմի, եւ ոչ ած այնուհետեւ Տէր զբարկութիւն իւր ի վերայ Եզեկիայ յաւուրս իւր:
27․ Եւ եղեւ Եզեկիա մեծութիւն յոյժ եւ փառք բազում եւ գանձք յոյժ արծաթոյ եւ ոսկւոյ, եւ ականց պատուականաց եւ խնգոց.
28․ եւ արար տունս տունս զինուց եւ գանձից եւ խնգոց եւ շտեմարանս շտեմարանս իւրաքանչիւր արդեանց ցորենոյ, եւ գինոյ
29․ եւ ձիթոյ եւ ասպաստանս ասպաստանս, եւ կայեանս կայեանս խաշանց բազում յոյժ, զի ետ նմա Աստուած ստացուածս բազումս,
30․ եւ արգել նա զելս ջրուն որ էր ի վեր, եւ որ էր ի խոնարհ ընդ արեւմուտս քաղաքին եւ աջողեցաւ նմա:
31․ եւ այնպէս արար ընդ հրեշտակս իշխանացն որ եկին ի Բաբելացւոց անտի հարցանել վասն նորա, եւ թոյլ ետ նմա Տէր փորձել զնա, զի գիտասցէ զինչ կա ի սրտի նորա:
32․ եւ վասն այլոց բանից որ ինչ գրեալ է վասն նորա ի ճառս Եսայեա մարգարէի որդւոյ Ամովսայ ցուցանէ, եւ ի ճառս այլոց թագաւորացն Յուդայ եւ Իսրայէղի:
33․ Եւ ննջեաց Եզէկիա առ հարս իւր, եւ թաղեցին զնա ի գլուխս գերեզմանացն որդւոցն Դաւթի: Եւ փառաւորեցուցին զնա ի մահու անդ իւրում ամենայն տուն Յուդայ: Եւ թագաւորեաց Մանասէ որդի նասա փոխանակ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: