Գլուխ 4

   
1․ Եւ արար նա զսեղանն պղնձի կանգունս քսան երկայնութիւն եւ կանգունս քսան ի լայնութիւն:

2․ եւ արար նա զծովն տասն կանկուն չափով շրթանէ ի շուրթն եւ շուրջ զնովաւ լարաչափ երեսուն կանգուն,

3․ եւ նմանութիւն զուարակացն ի ներքոյ ծովուն շուրջ զիւր

4․ եւ պատեալ առ երկուս երկուս կանգուն երկու երկու կարգք ցլուց գործ ձուլածոյ քանդակեալ գործ հաստատեալ կայր ծովն ի վերայ երկոտասան ցլուցն երեքն հայէին ընդ Հիւսիւսի եւ երեքն ընդ Արեւմուտս, եւ երեքն ընդ Հարաւ եւ երեքն ընդ Արեւելս, եւ ծովն ի վերայ նոցա եւ ինքեանք կային միմեանց յետս ընդ դէմ, թիկունս ի թիկունս

5․ եւ թանձրութիւն ծովուն ուղուկ մի, եւ շուրթն ծովուն իբրեւ շուրթն բաժակի քանդակեալ տախտակի նմանութիւն Շուշան ծաղկի եւ տանէին ընդ ամենեսին իբրեւ երիս հազարս մար.

6․ եւ կատարեաց զնա: Անդ առնէր դնէր աւազանս տասն եւ դնէր զհինգն ընդ աջմէ եւ զհինգն ընդ ահեկէ, զի ի նոսա լուանայցեն զգործ ողջակիզացն ողողանել ի նոսա, եւ ծովն լցեալ կայր պատրաստական ի լուանալ սրբել քահանայիցն ի նմա,

7․ անդ առնէր դնէր զտաշտանակսն ոսկիս ըստ աւրինակին իւրեանց, եւ դնէր հինգ ընդ աջմէ եւ հինգ ընդ ահեկէ:

8․ Անդ առնէր սեղանս ոսկիս հինգ ընդ աջմէ եւ հինգ ընդ ահեկէ: Անդ առնէր դնէր տաշտս ոսկիս հարիւր:

9․ Անդ առնէր սրահս քահանայապետից եւ սրահս քահանայիցն եւ զսրահն մեծ: Անդառնէր զդրունս պղընծապատս:

10․ եւ առնոյր դնէր զծովն յաջակողմն կուսէ տաճարին յանգեան անդ ընդ Արեւելս ի հարակողմ կուսէ:

11․ եւ առնէր Խիրամ կատսայս եւ սանս եւ կասկարայս եւ մսահանս եւ շամփուրս եւ զամենայն զկահ եւ զկարասի եւ կատարէր Խիրամ զամենայն գործ զոր արար Սողոմովն արքայ ի տան Աստուծոյ:

12․ զսիւնսն զերկոսին խարսխաւք խոյակաւք հանդերձ եւ զքոթարովթն ի վերայ խոյակաց սեանցն երկուս, եւ վարմս երկուս վանդակաձեւս ծածկեալ զերկոսին խոյակսն քոթարոթայն որ էին ի վերա խոյակաց սեանցն

13․ երկուցուն եւ նռնաձեւս ոսկիս, եւ ի միջի երկոցուն վանդակապ վարմաց նորա երեք հարիւր երկուս կարգս ի միում վանդակապատ վարմի, եւ երկուս կարգս ի միում ծածկեր զերկոսին աստիճանսն քոթարովթայն որ էին ի վերայ սեանցն:

14․ եւ զմենքենովթն առնէր տասն եւ զաւազանսն առնէր ի վերա մեքենովթացն:

15․ եւ զծովն առնէր մի եւ զցուլսն առնէր երկոտասան ի ներքոյ ծովուն:

16․ եւ զհրաւանդսն եւ զհանելիսն եւ զկաթսայսն եւ զմսահանսն եւ զամենայն զկահ եւ զկարասի եւ զգործի զոր առնէր Խիրամ բերէր դնէր առաջի Սողոմովնի ի տան Տեառն, ի պարզեալ սրբեալ զտեալ պղնծոյ

17․ եւ պղինձն գործեալ հալեալ ձուլեալ ի թանձրութեան երկրին ի կողմանս Յորդանան գետոյ ի մէջ Սովկովթայ եւ ի մէջ Սարեդաթայ:

18․ Եւ արար Սողոմոն զկահ եւ զկարաս ի բազում յոյժ եւ ոչ կարացին ստուգել ճշմարտիւ զկշիռ համար պղնձոյ:

19․ եւ արար Սողոմովն զամենայն կահ եւ զկարասի տան Տեառն: Եւ զսեղանսն ոսկիս եւ ի վերայ նոցա զցանգորդ հաց պատարագացն

20․ զաշտանակսն ոսկիս եւ զճրագարանսն լուսոյն ըստ աւրինակի կարգին դէմ յանդիման գաբիրայն յոսկւոյ քաջէ

21․ եւ ճրագարանք իւրեանց եւ բազմակակալք իւրեանց

22․ եւ զտաշտքն եւ պատժանակքն եւ բաժակքն եւ ճաշակքն եւ խնկաղացքն եւ կրակարանքն ամենայն յոսկւոյ քաջէ, դրունքն ներքին որ սրբոյս սրբոց եւ դրունք տաճարին յոսկոյ քաջէ: