Գլուխ 13

   

1․ Յամին ութուտասներորդի թագաւորութեանն Յերոբովամու թագաւորեաց Աբիայ ի վերայ Յուդայ

2․ եւ երիս ամս թագաւորեաց յԵրուսաղէմ եւ անուն մաւր նորա Մաաքայ դուստր Աբէսողոմայ եւ էր պատերազմ ի մէջ Աբիա եւ ի մէջ Յորոբովամու:

3․ Եւ եկն ճաշակեցաւ Աբիայ ի գործ պատերազմի պատերազմող գնդաւն, բուռն զաւրու չորեք հարիւր հազար ընտիր ընտիր պատերազմողաւք եւ Յերոբովամ եկն ճակատեցաւ ընդ դէմ նորա ի գործ պատերազմի ութ հարիւր հազար պատերազմող զաւրաւք ընտիր ընտիր զաւրականաւք:

4․ Եւ յարեաւ Աբիայ ի լեռնէ անտի Մոսորովն որ է ի ներքս ի լերինն Եփրեմի, եւ խաւսել սկսաւ եւ ասէ. Լուարուք ինձ Յերոբովամ եւ ամենայն Իսրայէղ,

5․ ոչ դուք ձեզէն գիտէք թէ տէր Աստուած, Աստուած Իսրայէղի ետ արքայութիւն Դաւթի ի վերայ ամենայն Իսրայէղի եւ դուք ուխտ եդիք ընդ որդիս նորա մինչչեւ յաւիտեանս ժամանակաց:

6․ Արդ` համարաձաւ Յերոբովամ որդի Նաբատայ ծառայ Սողոմովնի որդւոյ Դաւթի եւ յետս եկաց յԱստուծոյ ի Տեառնէ իւրմէ:

7․ Եւ ժողովեցան առ նա արք անաւրէնք որդիք անաւրինաց, եւ զաւրացաւ նայ ի վերայ Հռոբովամու որդւոյ Սողոմովնի, եւ Հռոբովամ ինքն մանուկ եւ սրտիւ վատ եւ ոչ կարաց զաւրանալ կալ ընդ դէմ:

8․ եւ արդ` դուք ասէք պնդել ընդ դէմ կալ արքայութեան Տեառն ի ձեռն որդոյն Դաւթի, եւ դուք բազմութիւն յոյժ, եւ ընդ երինջ ոսկիք զոր արար ձեզ Յերոբովամ Աստուածս,

9․ ոչ դուք այն էք որ մերժեցէքզքահանայսն Տեառն զորդիսն Ահարովնի եւ զՂեւտցիսն եւ կացուցէք դուք ձեզ քուրմս ի ժողովրդենէ երկրի, որպէս եւ այլ ժողովուրդք որ գնային լնուլ ի ցուլսն յորդի կովու, եւ ի խոյս եւթն եւ լինէր նա քահանա յայնմիկ որ չէրն իսկ Աստուած,

10․ եւ այն մեք եմք որ ոչ թողաք զտէր Աստուած մեր, եւ այսաւր որդիքն Ահարոնի քահանայք են եւ պաշտեն ի տան Տեառն եւ Ղեւտացիքն ի կարգս շաբաթուց իւրեանց խունկս արկանեն ի տանն Տեառն,

11․ ողջակիզաւք հանդերձ զայգուն այգոյն եւ զերեկուն երեկուն, ի խունկս խանածոյս, եւ ի հացս ցանկորդս, ի վերայ սրբոյ սեղանոյն, եւ աշտանակ ոսկի ճրագարանաւքն հանդերձ լուցանեն ընդ երեկոյս, զի պահեսցեն զպահն տեառն Աստուծոյ հարցն մերոց եւ դուք թողէք զնոսա,

12․ եւ արդ` աւասիկ Տէր մեր, գլուխ կա մեր, եւ քահանայք նորա, եւ փողք նշանացն նորա որ նշանակեն ի վերայ ձեր, արդ` որդիք Իսրայէղի մի տայք պատերազմ ընդ տեառն Աստուծոյ ձերում, զի ոչ աջողի ձեզ,

13․ եւ Յերոբովամ դարանամուտ լինէր շուրջ պատէր զգնդաւն Յուդայ կիսովքն զկնի ի դարան մտանէր, եւ կիսովքն առաջի ի դիւմի հարկանէր,

14․ իբրեւ հայեցաւ ետես Յուդայ զի զկնի եւ առաջի շուրջ պատեալ էին, զաղաղակ բարձին, առ Տէր աղաղակեցին, եւ քահանայքն փող հարին, եւ ի փողս նշանակացն աղաղակեցին այր Յուդայ հասարակ ամենեքին,

15․ եւ եղեւ իբրեւ աղաղակեցին արք Յուդայ, եւ Տէր եբեկ զառաջին թեւ գնդին Իսրայէղացւոց, եւ Յերոբովամ գնդաւն ցրուեցաւ առաջի Աբիայ եւ գնդին Յուդայ:

16․ եւ փախուստ եղեւ որդւոցն Իսրայէղի յերեսաց Յուդայ եւ մատնեաց զնոսա տէր Աստուած ի ձեռս նոցա:

17․ եւ եհար վանեաց սատակեաց ի նոցանէ գնդաւն իւրով հարուածս մեծամեծս: Եւ անկան յաւուր յայնմիկ վիրաւորք Իսրայէղացւոցն հինգ հարիւր հազար յարանց զաւրաւոր պատերազմողաց,

18․ եւ նկուն եղեն որդիքն Իսրայէղի յաւուր յայնմիկ: Եւ զաւրացան որդիքն Յուդայ յաւուր յայնմիկ, զի յուսացան ի տէր Աստուած հարցն իւրեանց,

19․ եւ երթայր Աբիայ զհետ Յերոբովամու, եւ հասանէր պատէր զԲեդէլ եւ զդստերս նորա, եւ զՅեսենայ եւ զԲենայ, եւ զդստերս իւր զԱփրովն եւ զդստերս իւր:

20․ Եւ ոչ կարաց պատգարհել Յերոբովամ զի զամենայն աւուրս կենաց իւրոց Աբիա զկնի էր եւ հալածէր զնա, ապա սատակեաց զնա Տէր եւ մեռաւ,

21․ եւ հզաւրացաւ Աբիայ եւ առ իւր կանայս չորեքտասան, եւ եղեն նորա ուստերք քսան եւ երկու, եւ դստերք վեշտասան:

22․ Եւ որ այլ ինչ բանք են Աբիայ եւ գործք նորա եւ ճառք նորա, ահաւասիկ գրեալ են ի գիրս քննութեան Յադոմ մարգարէին: