1. Եւ ննջեաց Յովսափատ առ հարս իւր ի քաղաքի Դաւթի: Եւ թագաւորեաց Յովրամ որդի նորա ընդ նմա,
2. եւ Յովրամ եղբարք վեց որդիք Յովսափատու, Ազարիայ եւ Միքայէլ, եւ Սափատիայ ամենեքին սոքա որդիք Յովսափատու արքային Յուդայ:
3. եւ ետ նոցա Յովսափատ հայրն իւրեանց պարգեւս մեծամեծս, եւ բազումս ոսկի եւ արծաթ եւ զէն պարսպաւոր քաղաքաւքն հանդերձ եւ Յովրամա ետ զթագաւորութիւն իւր, զի նա էր անդրանիկ իւր:
4. եւ եկաց Յովրամ ի թագաւորութեան հաւր իւրոյ, եւ հաստատեցաւ ապա սպան Յովրամ զամենայն եղբարս իւր, եւ բազումս յիշխանաց անդ ի Յուդայ,
5. եւ այր էր Յովրամ երեսուներկու ամաց, եւ թագաւորեաց նա ի վերայ Երուսաղէմի ամս տասն,
6. եւ գնաց նա զճանապարհ թագաւորացն Իսրայէղացւոց որպէս եւ գնայր տունն Աքաաբու, զի դուստրն Աքաաբու կին է նորա, եւ արար նա չարութիւն առաջի Տեառն:
7. եւ ոչ կամէր տէր Աստուած սատակել զտունն Դաւթի, վասն ուխտին զոր եդ Դաւթի զոր աւրինակ ասաց նմա տալ ճրագ եւ որդւոց նորա զամենայն աւուրս կենաց իւրեանց:
8. Յաւուրսն յայնոսիկ թիւրեցաւ Եդովմ ի հնազանդութենէ անդ ի Յուդայ, եւ թագաւորեցոյց յանձն իւր արքայ մի:
9. ապա յարեաւ խաղաց գնաց ի վերայ նորա Յովրամ զաւրաւք իւրովք, ամենայն կառաւք եւ երիւարաւք եւ հեծելազաւր գնդաւն եւ լինէր զի յառնէր Յովրամ կանխեալ գիշերախառն պատել պաշարել վանէր զԵդովմ որ եկեալ էր: Եւ պատէր զնովաւ ամենայն կառաւք եւ երվարաւք հանդերձ, եւ փախչէին մնացորդք զաւրացն յիւրաքանչիւր տեղիս,
10. եւ խստանայր այնուհետեւ Եդովմ ընդ ձեռամբ Յուդայ մինչչեւ յայսաւր ժամանակի: ապա յետս եկաց եւ Ղոբովնոս ի ժամանակի յայնմիկ ի ձեռացն Յովրամայ, զի եթող նա զտէր Աստուած հարցն իւրոց,
11. քանզի նա իսկ արար բարձունս ի քաղաքն Յուդայ եւ պոռնկեցոյց զբնակիչս Երուսաղէմի եւ մոլորեցոյց զՅուդայ,
12. ապա եկն առ նա պատգամ հրովարտակաւ Եղիայ մարգարէի եւ ասէ: Այսպէս ասէ տէր Աստուած Դաւթի հաւր քո. Փոխանակ զի ոչ գնացէր դու ի ճանապարհսն Յովսափատու հաւր քո եւ ի ճանապարհս Ասայի արքայի Հրէաստանի,
13. այլ գնացէր դու ի ճանապարհս թագաւորացն Իսրայէղացւոց եւ պոռնկեցուցեր դու զՅուդայ, եւ զբնակիչս Երուսաղէմի զոր աւրինակ պոռնկեցոյց Ախաաբ զտուն իւր: Զեղբարս քո զորդիս հաւր քո որ լաւ էին քան զքեզ կոտորեցեր դու,
14. վասն այսորիկ հարցէր զքեզ Տէր ի հարուածս մեծամեծս զչարչարանսն որդւովն հանդերձ, եւ կանամբքդ հանդերձ, եւ ամենայն կահիւ եւ կարասիւ հանդերձ,
15. եւ դու ինքն յախտ չարչարանաց անկցիս յախտ որովայնի քո, եւ անկցին թափեսցին աղիք քո աւուրց յաւուրս:
16. Եւ յարոյց Տէր ի վերայ Յովրամու զայլ ազգիսն: զԱրաբացիսն սահմանակիցս Հնդկաց,
17. եւ եկին հասին ի վերայ Յուդայ եւ գիտացին զամենայն ինչս եւ զստացուածս նոցա, որ ինչ գիտին ի տունս թագաւորաց նոցա, զորդիս նորա եւ զդստերս նորա, եւ ոչ մնաց նմա որդի բայց միայն Ոքոզիայ որ կրսեր որդի նորա էր:
18. Եւ յետ այսր ամենայնի հարկանէր զնա Տէր ի հարուածս որովայնի որ ոչ գոյր նորա բժշկութիւն եղեւ աւուրց աւուրս,
19. եւ իբրեւ եկն ժամանակ նորա յաւուրցն երկուցեալ թափեցաւ աղիքն որովայնիւն հանդերձ եւ մեռաւ նայ յախտ չարչարանաց իւրոց: Եւ ոչ արարին նմա այնուհետեւ ժողովուրդն լալիս եւ կամախին, եւ ոչ հուր այրեցին նմա հարցն իւրեանց:
20. Եւ այր էր երեսուներկու ամաց Յովրամ զի եհաս ի թագաւորութիւն եւ ամս տասն կալաւ զթագաւորութիւն ի վերա Երուսաղէմի, եւ մեռաւ նա ոչ գովութեամբ: Եւ թաղեցաւ նա ի քաղաքի Դաւթի ոչ ի գերեզմանս թագաւորացն:
Հաղորդում կայքում սխալի վերաբերյալ
Տվյալ հատվածում առկա է սխալ: