1․ Եւ եկն Հռոբովամ յԵրուսաղէմ զաւրաժողով առնէր զՅուդայ եւ զԲենիամին հարիւր ութսուն հազար այր երիտասարդ տեղեկացեալ պատերազմի եւ գնաց գալ տալ պատերազմ ընդ որդիսն Իսրայէղի եւ դարձուցանել անդրէն զտէրութիւն:
2․ Եւ եղեն պատգամք Տեառն առ Սամես այր Աստուծոյ եւ ասեն.
3․ Երթ ասայ դու ցՀռոբովամ որդի Սողոմովնի արքայի Յուդայ եւ ցամենայն որդիսն Իսրայէղի որ ընդ Յուդայն են ընդ Բենիամին եւ ասասցես:
4․ Այսպէս ասէ տէր Աստուած Իսրայէղի. Մի ելանէք դուք տալ պատերազմ ընդ եղբարս ձեր, այլ դարձցի այր իւրաքանչիւր ի տուն իւր, զի յինէն եղեւ բանդ այդ: եւ լուան բանի Տեառն եւ ոչ չոգան ի վերայ Յորոբովամու,
5․ եւ եկն բնակեցաւ Հռոբովամ յԵրուսաղէմ եւ սկսաւ շինել քաղաքս պարսպաւորս ի Հրէաստանի:
6․ եւ շինեաց նա զԲեդէլն եւ զԵտամն եւ զԹեկուլ,
7․ Բէթսուրն եւ Սովկովթն եւ զԱդողամն,
8․ զԳէթն եւ զՄարէսայ եւ զԻփ,
9․ զԱդուրամն եւ զՂաքիս եւ զԱզեկայ,
10․ զՍարաան եւ զԱաղովն եւ զՔեբրովն. այն որ ի Հրէաստանի եւ ի Բենիամին էին քաղաքս ամրացեալս պարսպաւք:
11․ Եւ կացոյց ի վերայ նոցա զաւրագլուխս, եւ համբարս գինի եւ ձէթ
12․ քաղաքաց քաղաքաց, զէն եւ վահանս եւ նիզակս յոյժ յոյժ: Եւ էին նմա այնուհետեւ Յուդայ եւ Բենիամին:
13․ եւ քահանայքն եւ Ղեւտացիքն որ էին ընդ ամենայն կողմանս Իսրայէղացւոց, ժողովեցան առ նա յամենայն սահմանաց զի թողին լքին Ղեւտացիքն զտունս իւրեանց ի բաժինս իրեանց եւ գնացին առ Յուդայ յԵրուսաղէմ:
14․ եւ եհան զնոսա Յերոբովամ եւ որդիքն Իսրայէղի զի մի պաշտեսցեն զպաշտաւն Տեառն:
15․ Եւ անդ կացուցանէր քուրմս բարձանցն եւ կռոցն սնոտեաց եւ երնջոցն զոր առնէր Յերոբովամ.
16․ եւ եհան վարեաց զՂեւտացիսն յազգաց ազգաց որդւոցն Իսրայէղի, զկնի նոցա յամենայն ազգացն Իսրայէղացւոց որ ետուն զսիրտս իւրեանց առ ի խնդրել զտէր Աստուած Իսրայէղի, եկին յԵրուսաղէմ մատուցանել պատարագս տեառն Աստուծոյ հարցն իւրեանց իւրում,
17․ եւ զաւրացոյց Տէր զթագաւորութիւնն Յուդայ, եւ զաւրացոյց զՀռովբովամ զորդի Սաղոմովնի, եւ գնաց նա ըստ ճանապարհացն Դաւթի եւ Սողոմովնի հաւրն իւրոյ ամս երիս,
18․ եւ առ անձին Հռոբովամ կին զՄայեղէթ դուստր Յերիմութայ որդւոյ Դաւթի զհաւր իւրոյ ի տանէ Եղաբայ որդւոյ Յեսսեայ,
19․ եւ ծնաւ նմա որդիս զՅէուս եւ զՍամարիայ եւ զՍամ
20․ եւ յետ այսորիկ առ զՄաաքայ զդուստր Աբէսողովմա եւ ծնաւ նմա զԱբիայ եւ զՀեթի եւ զԶիայ եւ զՄաղովմիթ:
21․ Եւ Հռոբովամ սիրեաց զՄաաքայ դուստր Աբեսողովմա քան զամենայն կանայս իւր, եւ քան զամենայն հարճս իւր, զի էին նորա ութեւտասն կին եւ հարճք վաթսուն եւ եղեն նորա որդիք տասնեւութ եւ դստերք վաթսուն:
22․ Եւ կացոյց Հռոբովամ զԱբիայ որ ի Մաաքայ էր իշխան եւ առաջնորդ եղբարց իւրոց զի այնպէս եդեալ էր ի մտի իւրում թէ թագաւորեցուսցէ զնա:
23․ Եւ աճեաց Աբիայ եւ էր առաջադէմ քան զամենայն եղբարս իւր եւ յամենայն սահմանս Յուդայ եւ ի Բենիամին եւ ի քաղաքս ամուրս կուտէին համբարս յոյժ: Եւ խնդրեաց նա իւր կանայս բազումս յոյժ:
Հաղորդում կայքում սխալի վերաբերյալ
Տվյալ հատվածում առկա է սխալ: