Գլուխ 2

   
1․ Սողոմովնի շինել նմա զտունն յանուն Տեառն եւ զտունն թագաւորութեան իւրում,

2․ եւ ժողովեաց Սողոմովն եւթանասուն հազար այր բեռնակիր, եւ ութսուն հազար այր քարակոփ ի լերինն, եւ վարդապետք ի վերայ նոցա երեք հազարք եւ վեց հարիւր,

3․ եւ առաքեաց Սողոմոն առ Խիրամ արքայ Ծուրացւոց եւ ասէ. Զոր աւրինակ արարեր դու ընդ Դաւթի հաւր իմոյ եւ առաքեցեր դու նմա մայր փայտ զի շինէր նա իւր ապարանս բնակել նմա ի նմա,

4․ արդ` աւասիկ ես որդի նորա շինեմ տաճար անուան տեառն Աստուծոյ իմոյ նուիրել զնա նմա զի արկանիցեն խունկս անուշից առաջի նորա եւ մատուցանել պատարագս հանապազորդս եւ հանել ողջակէզս յամենայն ժամ զայգուն եւ զերեկուն, եւ ի շաբաթս շաբաթս, եւ ի գլուխս ամսոց եւ տարեկանաց տեառն Աստուծոյ մերոյ յաւիտեանս ժամանակաց ի մէջ տան Իսրայէղի,

5․ եւ տաճարն զոր ես շինեմ մեծ է եւ տէր Աստուած մեծ է քան զամենայն կուռս հեթանոսաց,

6․ եւ ո կարէ շինել նմա տուն քանզի երկինք եւ երկիր ոչ հանդարտ են նմա, եւ ես ո եմ որ շինեմ նմա տուն, բայց չափ է զի դնիցեմք խունկս առաջի նորա:

7․ Եւ արդ` առաքեսցես դու ինձ արս իմաստունս որ տեղեակ իցեն ոսկւոյ եւ արծաթոյ, պղնձոյ, երկաթոյ ծովագործ ծիրանոյն կարմրոյ կապուտակի, եւ բեհեզ նիւթոյ առաքեսցես ինձ արս տեղեկացեալս կոփել քանդակել ընդ ճարտարապետսն մեր որ ի Հրէաստանի, եւ յԵրուսաղէմ քաղաքի են զոր պատրաստեաց Դաւիթ հայր իմ ի գործ ճարտարութեան

8․ եւ տացես բերել ինձ փայտս սարոյն, մայր եւ կաղամախ ի Լիբանան լեռնէ, զի մեք գիտեմք եթէ տեղեկացեալ են ծառայք քո ընտրել հարկանել իջուցանել փայտս ի Լիբանան լեռնէ, եւ արդ` ահա գնասցեն ծառայք իմ ընդ ծառայս քո

9․ ընդրել հարկանել պատրաստել փայտ բազում յոյժ, զի տունն զոր ես շինեմ մեծ է եւ փառաւոր:

10․ եւ ահաւասիկ գործաւորացս փայտահարիտ ծառայից քոց հրաման տուաք տալ վսեստակ ցորենոյ քոռս քսան հազար եւ գարոյ քոռս քսան հազար, եւ ձիթոյ մարս, եւ գինոյ մարս քսան հազար:

11․ Եւ ետ պատասխանի Խիրամ արքայ Ծուրացւոց ի ձեռն հրեշտակացն հրովարտակաւ առ Սողոմովն, եւ ասէ ցՍողոմովն. Առ ի սիրել տեառն Աստուծոյ զժողովուրդ իւր ետ տէր Աստուած զքեզ ի վերայ դոցայ թագաւոր:

12․ Աւրհնեալ տէր Աստուած Իսրայէղի որ արար զերկինս եւ զերկիր որ ետ Դաւիթ արքայի որդի իմաստուն զի հանճարով զգաստութեամբ որ շինեսցէ տուն Տեառն տաճար արքայութեան նորա,

13․ արդ` առաքեցի ես քեզ զայր իմաստուն լի հանճարով զԽիրամ ծառայ իմ

14․ զորդի կնոջն ի դստերացն Դանայ եւ հայր նորա այր Սիգովնի այր իմաստուն հանճարեղ ի գործ ոսկւոյ եւ արծաթոյ ի պղնձոյ յերկաթոյ ի գործ փայտի եւ քարի ի գործ ականց պատուականաց ի գործ նիւթել անկանել ծիրանի կապուտակ բեհեզ եւ կարմիր ի գործ կռել կոփել ի քանդակել յիմանալ խորհել ըստ ամենայն իմաստութեան որ զինչ դիցես դու առաջի նորա ընդ իմաստունս տեառն իմոյ Դաւթի հաւր քո,

15․ բայց արդ` զցորեանն եւ զգարին եւ զգինին, եւ զձէթն զոր հրամայեաց առաքեսցէ տէր իմ արքայ ծառայից իւրոց.

16․ եւ մեք հարցուք զփայտ ի Լիբանան լեռնէ, ըստ ամենայն պիտոյից քոց, եւ բերցուք զնաւտոփայս ընդ ծով ի կողմանս Յովպացւոց եւ դու հանցես զնա յԵրուսաղէմ:

17․ Եւ հրաման ետ Սողոմովն ժողովել զամենայն եկս ճարտարաց յետ համարոյն զոր համարեցաւ զնոսա Դաւիթ հայր նորա գտան ի մէջ հարիւր յիսուն եւ երեք հազարք եւ վեց հարիւր այր:

18․ եւ արար ի նոցանէ Սողոմովն եւթանասուն հազարս տանձնակիր, եւ ութսուն հազար քարակոփ ի լերինն եւ երիս հազարս եւ վեց հարիւր գործավարս ի վերա նոցա: