1․ Եւ էր Աքազ իբրեւ ամաց քսան, եւ թագաւորեաց նա ի վերայ Երուսաղէմի ամս իբրեւ վեշտասան: Ոչ արար նա ուղղութիւն առաջի Տեառն իբրեւ Դաւիթ հայր նորա,
2․ այլ գնաց Աքազ ըստ ճանապարհաց թագաւորացն Իսրայէղի.
3․ քանզի եւ կուռս ձուլածոյս կանգնեաց նա ի Բահղիմ, եւ զոհս մատուցանէր նա ի ձորն Բեենովման, եւ շրջեցուցանէր նա զորդիս իւր եւ զորդիսն որդւոցն Իսրայէղի ընդ ամենայն բարձունս,
4․ եւ անդ խունկս արկանէր եւ ի վերայ տանեաց եւ ի ներքոյ ամենայն անտառաց եւ ի ներքոյ ամենայն ծառոց վարսաւորաց:
5․ Եւ մատնեաց զնա տէր Աստուած ի ձեռս թագաւորին Ասորւոց, եւ սատակեաց նովաւ յաշխարհի սատակումն մեծ, եւ գերեաց գերութիւն յոյժ եւ վարեաց ած զգերին յամենայն քաղաքն ի Դամասկոս: Եւ ի ձեռս թագաւորին Իսրայէղացւոց մատնեաց զնա Տէր եւ սատակեաց զնա ի սատակումն մեծ հարուածոց.
6․ եւ սպան Փակէէ, որդին Հռոմելայ, արքայ Իսրայէղի ի տանէն Յուդայ, յաւուր միում հարիւր քսան հազար արս հզաւրս պատերազմողս, փոխանակ զի թողին նոքա զտէր Աստուած հարցն իւրեանց:
7․ Եւ անդ սպանանէր Զեքրիա հզաւրն Եփրեմայ զՄանասէ, զորդին արքայի, եւ զԵզրիա զաւրագլուխ նորա, եւ զԵղկանայ զերկրորդ թագաւորին:
8․ Եւ ի գերութեան վարէին որդիքն Իսրայէղի յեղբարց նոցա երկերիւր հազար կին եւ զուստերս եւ զդստերս, եւ աւար բազում յոյժ առին ի նոցանէ եւ բերին զաւարն ամենայն ի Շամրին:
9․ Եւ անդ էր մարգարէ մի Տեառն Ուդիթ անուն, եւ ել նա ընդ առաջ զաւրացն մինչ գային դեռ ի Շամրին, եւ ասէ ցնոսա. Ահաւասիկ բարկութիւն տեառն Աստուծոյ հարցն մերոց ի վերայ Յուդայ, եւ մատնեաց զնոսա ի ձեռս ձեր, եւ կոտորեցէք դուք զնոսա մեծաւ բարկութեամբ, եւ ել աղաղակն այն մինչչեւ յերկինս:
10․ Եւ արդ` որդիք Յուդայ եւ Երուսաղէմ, դուք ասէք, թէ ստացաք մեք ի ծառայութիւն եւ յաղախնութիւն, այլ ես աւասիկ իբր ոչ թէ ոչ եկից ես ընդ ձեզ. ուխտէ ընդ ձեզ տէր Աստուած ձեր, զի մեղք ընդ ձեզ են առ տէր Աստուած ձեր:
11․ Արդ` լուարուք դուք ինձ եւ դարձուցէք զգերութիւնդ, զոր գերեցէք դուք յեղբարցն ձերոց, զի սրտմտութիւն բարկութեան Տեառն է ի վերայ ձեր:
12․ Յոտն կացին իշխանքն յորդւոցն Եփրեմայ Ազարիա Ովնանեանց եւ Րաքիմայ Ասաղիմովթեանց եւ Եզեկիայ Սեղեմեանց եւ Ամասիա Փաղիղեանց, եւ հասին ի վերայ այնոցիկ, որ գային ի պատերազմէ անտի.
13․ եւ ասեն ցնոսա. Մի ածէք ի ներքս զգերութիւնդ առ մեզ, զառ յանցանելն առ Տէր դուք եւս մեղս ի մեղաց վերայ յաւելուք եւ ի վերայ տգիտութեանդ մերոյ, զի բազում են մեղք մեր եւ մեծ է բարկութիւն սրտմտութեան Տեառն ի վերայ Իսրայէղի:
14․ Եւ ի բաց կացին վաղվաղակի արք պատերազմին, որ ածէին զգերին, եւ թողին զաւարն առաջի իշխանացն իւրեանց եւ առաջի ամենայն ժողովրդեանն:
15․ Եւ մատեան արքն այն, որ անուանեցան յառաջ, հասին ի վերայ գերութեանն, եւ առ ի կապուտ կողոպտածոյ անտի աւարին, եւ զգեցուցանէին զմերկութիւն գերեացն, եւ ագուցանէին զբոկութիւն նոցա. եւ անդէն ի նմին վայր ի վաղվաղակի տային ուտել եւ ըմբել նոցա, եւ աւծանէին եւ հանգուցանէին զնոսա, եւ բառնային զտկարս նոցա գրաստու, եւ հասուցանէին զնոսա ի քաղաքն Փիւնիկեցւոց առ եղբարս իւրեանց, եւ դարձուցանէին զնոսա անդէն ի Շամրին:
16․ Ի ժամանակին յայնմիկ առաքեաց Աքազ առ արքայն Ասորոց, զի աւգնական լիցի նմա:
17․ Եւ յայնմ ժամանակի Եդովմայեցիք յարուցեալ հասանէին հարկանել զՅուդայ, հարկանէին վանէին գերէին գերութիւն մեծ:
18․ Եւ այլազգիքն հասեալ էին ի վերայ քաղաքացն դաշնեայն ի կողմանցն արեւմտից ի վերայ Յուդայ, եւ առին նոքա զԲեթսամիւսն եւ զԵդովնն եւ զԳադերովթն եւ Սոկովթն եւ զգիւղաքաղաքս նոցա, եւ զԹամնայնն եւ զԹամնանն եւ զգիւղաքաղաքս իւր, զԳամզայն եւ զգիւղաքաղաքս իւր, եւ բնակեցան նոքա անդէն ի նոսին:
19․ Զի նկուն արար Տէր զՅուդայ վասն Աքազու արքային Հրէաստանեաց, փոխանակ զի յայտնեցան Յուդա եւ ապստամբեցան ապստամբութիւն ի Տեառնէ:
20․ Եւ եկն ի վերայ Աքազու Թեկղաթ Փաղսար, արքայ Ասորոց, եւ անդէն սատակեաց զնա:
21․ Թէպէտ եւ առ Աքազ զգանձն ի տանէ Տեառն եւ զգանձս իշխանացն դատաւորաց, եւ ետ նա զայն թագաւորին Ասորոց, սակայն յոչինչ աւգուտ լինէր նմա,
22․ բայց եթէ յաւելոյր ի նեղութիւն նորա, եւ յաւել եւս Աքազ յետս կալ ի Տեառնէ խաւսել սկսաւ:
23․ եւ ասէ. Խնդրեցից ես զդիսն Դամասկացւոց որ եկեալ հարկանեն զիս, եւ ասէ. եթէ Դիքն արքայի Ասորւոց զաւրացեալ են ի վերա նորա, արդ` եկայք մատուսցուք նոցա ողջակէզս եւ աւգնեսցեն մեզ, զի նոքա եղեն նմա խոչ ընդ ակն եւ խոչ ընդ յոտն ամենայն Իսրայէղի:
24․ Եւ դարձոյց յետս Աքազ զամենայն Իսրայէղ եւ զսպաս տան Տեառն կոտորէր բաշխէր զամենայն եւ խնոյր զդրունս տանն Տեառն, եւ առնէր անդ բագինս բագինս անկեան անկեան Երուսաղէմի:
25․ եւ յամենայն քաղաքս Յուդայ առնէր բարձունս խունկ արկանել դիցն աւտարոտւոցն, բարկացուցանել զտէր Աստուած հարցն իւրոց:
26․ եւ այլ բանք Աքազու եւ գործք նորա առաջինք եւ վերջինք աւասիկ գրեալ են ի ճառս թագաւորացն Յուդայ եւ Իսրայէղի: Եւ ննջեաց Աքազ ընդ հարս իւր եւ թաղեցաւ նա ի քաղաքին Դաւթի եւ ոչ մուծին զնա ի ներքս զի գերեզմանք էին թագաւորացն: Եւ թագաւորեաց Եզեկիա որդի նորա ընդ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: