Գլուխ 12

   
1․ Եւ եղեւ նա իբրեւ կազմեցաւ ի թագաւորութիւն, եթող նա զպատուիրանս Տեառն եւ ամենայն Իսրայէլ ընդ նմա,

2․ եւ եղեւ յամին հինգերորդի թագաւորութեանն Հռոբովամու եկն ել Սուսակիմ արքայ Եգիպտացւոց ի վերա Երուսաղէմի զի մեղան նոքա առաջի Տեառն.

3․ հազար եւ երկերիւր կառաւք եւ վաթսուն հազարաւ հեծեալ վառելով եւ ոչ գոյր բնակութիւն բազմութեանն որ եկին յերկրէն Եգիպտացւոց Լիբէացիք, Աուքիիմ եւ Քուսիիմ.

4․ եւ եկին յաղթահարեցին կալան զքաղաքսն ամուրսն որ էին ի Յուդայ եւ եկին հասին յԵրուսաղէմ,

5․ եւ Սամեա մարգարէ եկն առ Հռոբովամ, եւ առ իշխանս Յուդայ որ էին ժողովեալ յԵրուսաղէմ յերեսաց Սուսակիմ արքային Եգիպտացւոց եւ ասէ ցնոսա. այսպէս ասէ տէր Աստուած. Դուք թողէք զիս եւ ես թողից զձեզ ի ձեռս Սուսակիմ արքային Եգիպտացւոց,

6․ եւ խոնարհեցան եւ զամաւթի հարան իշխանքն Իսրայէղացւոց եւ թագաւորն եւ ասեն. Արդար է տէր Աստուած:

7․ Եւ իբրեւ ետես տէր Աստուած եթէ խոնարհեցան եւ զամաւթի հարան, խաւսել սկսաւ ընդ Սամեա եւ ասէ. Փոխանակ զի խոնարհեցան եւ զամաւթ հարան, ոչ սատակեցից զնոսա այլ մազապուր ապրեցուցից զնոսա, այլ ոչ եթէ համաւրէն կաթեսցէ բարկութութիւն իմ ի վերա Երուսաղէմի

8․ մատնել զնոսա ի ձեռս Սուսակիմ արքայի եւ մտանել նոցա, ընդ ծառայութեամբ նորա, եւ զհամառնուլ նոցա ծառայութեամբ զերկրիս այսորիկ:

9․ Եւ ել Սուսակիմ արքա յԵրուսաղէմ եւ առ նա զգանձս տանն Տեառն եւ զգանձս տան թագաւորացն:

10․ եւ առ նա զվահանսն ոսկիս զոր արար արքայ Սողոմովն, եւ արար Հռոբովամ վահանս պղնձիս, եւ ետ ի ձեռս իշխանացն զի տացեն ի ձեռս այնոցիկ որ պահէին պահս ի դրունս թագաւորին:

11․ Եւ եղեւ յետ բազում ժամանակաց իբրեւ մտանէր արքայ ի տուն Տեառն, եւ մտանէին եւ պահապանքն ընդ նմա եւ որ շուրջ զնովաւ ընթանային եւ որ ի նայն դառնային եւ առնուին զվահանս, եւ շուրջ զնովաւ ընթանային եւ բերէին անդրէն տային ի կարգ պահապանացն,

12․ եւ իբրեւ զամաւթի հարկանէր թագաւորն դառնայր ի նմանէն բարկութիւն Տեառն եւ ոչ մինչ ի սպառ ապականէր սակայն ի մէջ Յուդայ էին բանք բարութեան:

13․ Եւ զաւրանայր արքայ Հռոբովամ յԵրուսաղէմ եւ թագաւորէր յԵրուսաղէմ, եւ լինէր այր ամաց իբրեւ քառասնամեան, եւ եւթնեւտասն ամ թագաւորէր յԵրուսաղէմ քաղաքի զոր ընտրեաց Տէր անուանել զանուն իւր ի վերայ նորա յամենայն ազգաց որդւոցն Իսրայէղի, եւ էր անուն մաւր նորա Մեա Ամինացի:

14․ եւ արար Հռոբովամ չարիս զի ոչ ուղղեաց զսիրտ իւր խնդրել զտէր Աստուած:

15․ եւ ամենայն բանք Հռոբովամու առաջինք եւ վերջինք ոչ եթէ չիցեն գրեալ ի պատգամս Սամեա մարգարէի, եւ յատոքա տեսանողի ազգագրաւ, եւ գործովք իւրովք հանդերձ եւ մարտնչէր Հռոբովամ ընդ Յերոբովամու զամենայն աւուրս կենաց իւրոց:

16․ եւ ննջեաց Հռոբովամ առ հարս իւր եւ թաղեցաւ ի քաղաքին Դաւթի:  Եւ թագաւորեաց Աբիայ որդի նորա փոխանակ: