Գլուխ 25

   
1. Այր իբրեւ ամ քսանհնգից Ամեսիայ ի թագաւորել իւրում, եւ քսանհինգ ամ թագաւորեաց ի վերայ Երուսաղէմի, եւ անուն մաւր նորա Յովաբիմ յԵրուսաղէմէ,

2. եւ արար նա ուղղութիւն եւ զաւրդարութիւն առաջի Տեառն, այլ ոչ յամենայն սրտէ իւրմէ:

3. Եւ եղեւ իբրեւ հաստատեցաւ թագաւորութիւն ի ձեռին նորա սպան նա զծառայսն որ սպանին զհայր նորա,

4. եւ զորդիս նոցա ոչ սպանին ըստ պատուիրանին աւրինաց Տեառն, որպէս եւ գրեալ է յաւրէնս Մովսէսի պատուիրանաց Տեառն, եթէ ոչ մեռցին հարք վասն որդւոց եւ ոչ որդիք վասն հարց այլ այր իւրաքանչիւր ի մեղս իւր մեռցի:

5. Ապա ժողովեաց Ամեսիայ զտունն Յուդայ եւ կացոյց զնոսա ըստ ազգս ազգս տոհմաց նահապետութեան իւրեանց ի հազարապետս եւ հարիւրապետս ընդ ամենայն տունն Յուդայ եւ Բենիամէն եւ արար համար ի քսանամէնից եւ ի վեր եւ եգիտ զնոսա երեք հարիւր հազար այր զաւրութեան պատրաստեալ ի գործ պատերազմի որ ունէր նիզակ եւ ասպար,

6. եւ առնոյր նա ի վարձու ի տանէն Իսրայէղի հազար այր զաւրութեան արծաթոյ հարիւր քանքարի:

7. եկն առ նա այր Աստուծոյ եւ ասէ. Արքայ, մի գնասցեն ընդ քեզ զաւրք Իսրայէղի, զի ոչ է տէր Աստուած ընդ Իսրայէղի, ամենայն որդւովքն հանդերձ Եփրեմեայ:

8. զի եթէ կարծիցես դու յաղթել ի պատերազմի անդ բազմութեամբս այսուիկ վաթթարեսցէ զքեզ Տէր առաջի թշնամեաց քոց զի կարող է Տէր աւգնել եւ վաթթարեցուցանել:

9. Ետ պատասխանի Ամեսիայ առն Աստուծոյ եւ ասէ. Եւ զինչ արարից զայն հարիւր քանքար զոր ետու զաւրացն Իսրայէղացւոց: Ասէ ցնա այրն Աստուծոյ. Կարող է Տէր ի բազմագոյն եւս քան զայն տալ քեզ:

10. Ապա մեկնեաց զատոյց Ամեսիայ զզաւրս զայնս որ եկեալ էին յԵփրեմէ, երթալ գնալ նոցա յիւրաքանչիւր տունս իւրեանց: Եւ բարկացան յոյժ նոքա ի վերայ Յուդայ եւ գնացին նոքա յիւրաքանչիւր տունս իւրեանց սրտմտութեամբ բարկութեամբ,

11. եւ Ամեսիա զաւրացաւ եւ առ նա զզաւրս իւր եւ գնաց ի հովիտս աղտիցն եւ անդ կոտորէր նա զորդիսն Սէիր իբրեւ տասն հազար:

12. եւ տասն եւս այլ հազար ձերբակալ առնէին որդիքն Յուդայ, եւ առեալ ածէին զնոսա ի կատար քարապսակին, եւ անդ քարավէժ առնէին զնոսա եւ սատակէին:

13. եւ որդիքն զաւրութեանց զոր դարձոյցն Ամեսիայ զի մի գնասցեն ընդ նմա ի գործ պատերազմի անկան զքաղաքաւքն Յուդայ եւ կոտորեցին զնոսա ի Շամրնէ մինչ ի Բեթորովն եւ սատակեցին ի նոցանէ աւար բազում:

14. Եւ եղեւ իբրեւ դարձաւ Ամեսիայ ի կոտորածէ անդի Եդոմեացուցն, եւ առեալ բերէր ընդ իւր եւ զկուռսն որդւոցն Սէիրայ, եւ կացուցանէր զնոսա իւր յԱստուածս, եւ առաջի նոցա երկիր պագանէր, եւ ողջակէզս մատուցանէր:

15. եւ եղեւ բարկութիւն սրտմտութեան Տեառն ի վերայ Ամեսիայ: Եւ առաքեաց նա ի վերայ նորա մարգարէ եւ ասէ. Զի ցանկացար դու խնդրել քեզ դիս սնոտիս ժողովրդեան, որք ոչ կարացին փրկել զժողովուրդս իւրեանց ի ձեռաց քոց:

16. եւ եղեւ մինչ դեռ խաւսէր նա ընդ նմա ետ պատասխանի նա եւ ասէ. Միթէ խորհրդակից ինչ արքայի տուեալ է ուրուք զքեզ, զգոյշ լեր անձին քում գուցէ երբէք սատակիցեն զքեզ եւ լռեաց մարգարէն, եւ ասէ. Այն զի խորհեցաւ Տէր սատակել զքեզ փոխանակ զի ոչ լուար դու խրատու իմում:

17. եւ խորհեցաւ Ամեսիայ արքայ Յուդայ, եւ առաքեաց առ Յովաս որդի Յովաբասու արքայի Իսրայէղի եւ ասէ. Եկ եւ տեսցուք մեք յանդիման զմիմեանս:

18. եւ առաքեաց անդրէն Յովաս արքայ Իսրայէղի առ Ամեսիայ արքայ Յուդայ եւ ասէ. Դժնիկ որ ի Լիբանան լերին է, առաքեաց առ մայրսն Լիբանանու եւ ասէ. Տուր ինձ, ասէ, զդուստր քո որդւոյ իմում կնութեան, եւ եկեսցեն մտցեն ամենայն գազանք անտառիդ որ ի Լիբանան դիցեն, եւ եկին գազանքն կոխան արարին եւ սատակեցին զդժնիկն,

19. արդ` ասես ի մտի քում. թէ Սատակելով սատակեցի ես զԵդովմայեցիսն, արդ` հպարտացաւ սիրտ քո եւ մեծամտեցեր, երթ նիստ ի տան քո խաղաղիկ, եւ զի պիտոյ է քեզ բախել ընկերի քում, եւ սատակիցիս դու եւ Յուդայ ընդ քեզ:

20. եւ ոչ անսաց Ամեսիայ բանիցն զի Տեառն է մատնել զնա ի ձեռս Յովասու արքայի զի ընդրեաց նա զդիսն Եդովմաեցւոց:

21. եւ ել Յովաս արքայ Իսրայէղի եւ եղեն յանդիման միմեանց նա եւ Ամեսիայ արքայ Յուդայ ի Բեթսամիւս Հրէաստանի,

22. եւ վաթթարեցաւ Յուդայ յերեսաց Իսրայէղացւոցն, եւ լինէր փախստեայ այր յիւրաքանչիւր դադարս իւր,

23. եւ զԱմեսիայ արքայ զորդի Յովասու որդի Ոքոզիայ ձերբակալ առնէր արքայն Իսրայէղի ի Բեթսամիւս, եւ ածէր զնա յԵրուսաղէմ եւ քակեաց նա ի պարսպաց անտի Երուսաղէմի ի դրանէ անտի Եփրեմի մինչ ի դուռն անկեանն երեք հարիւր կանգուն:

24. եւ զամենայն զոսկին եւ զարծաթն զկահ եւ զկարասի որ գտաւ ի տան Տեառն եւ որ Յաբեդոմանց եւ զգանձս տանն արքունի եւ զորդիսն խառնակութեանց առ նա եւ դարձաւ ի Շամրին:

25. եւ եկաց Ամեսիայ որդի Յովասու արքայի Յուդայ յետ մահուանն Ամեսիայ արքային Իսրայէղի զհնգէտասան ամ:  զհնգէտասան ամ:

26. եւ ամենայն բանք Ասեսիայ առաջինք եւ վերջինք, աւասիկ գրեալ են ի ճառս թագաւորացն Յուդայ եւ Իսրայէղի:

27. Եւ ի ժամանակին իւրում յետս եկաց Ասեսիա ի Տեառնէ, եւ ժողովեցան ի վերա նորա գունդ յԵրուսաղէմ եւ փախեաւ անկաւ նա ի Ղաքիս եւ առաքեցին զկնի նորա ի Ղաքիս եւ սպանին զնա անդէն

28. ի վերայ ձիաստանի անդ եւ թաղեցին զնա առ հարս իւր ի քաղաքին Դաւթի: