1. Եւ իբրեւ լինէր ամն եւթներորդ զաւրանայր Յուդայէ, եւ առնոյր նա զհարիւրապետսն Զարեհ զորդին Յովրամայ, եւ զԻսմայէլ զորդի Յովնանու, եւ զԱզարիայ զորդի Յովբեթայ եւ զՄաասի զորդի Ագայիու, եւ զԵղիշափան որդի Զեքրեա, եւ առ նա զնոսա ընդ իւր ի տուն Տեառն,
2. եւ ուխտ դնէին դաշինս կռէին, եւ ժողովէին զՂեւտացիսն յամենայն քաղաքաց անտի Յուդայ, եւ զիշխանսն, նահապետս ազգատոհմացն Իսրայէղի եւ եկին յԵրուսաղէմ,
3. եդին ուխտ ամենայն ժողովն եւ դաշինս կռեցին ի տան Տեառն ընդ արքայի եւ ասէ ցնոսա Յուդայէ. Եւ աւասիկ որդի արքայի թագաւորեսցէ սա որպէս խաւսեցաւ Տէր ի վերայ տան Դաւթի,
4. եւ արդ` այս բան է զոր ասացէք դուք երրորդ մասն ի ձէնջ մտցէ շաբաթուց ցքահանայիցն եւ Ղեւտացւոցն եւ դռնապանացն ընդ դրունս մտիցն,
5. եւ երորդ մասն ի դրան յարքունի եւ երորդ մասն ի դրանն ի միջնում, եւ ամենայն ժողովուրդն ի սրահս տանն Տեառն.
6. եւ մի ոք մի մտցէ ի տուն Տեառն բայց միայն քահանայքն եւ Ղեւտացիքն պաշտաւնեայք Ղեւտացիոցն նոքա մտցեն միայն զի ի սրբութեան կան եւ ամենայն ժողովուրդն պահեսցեն պահ Տեառն:
7. եւ պատեսցին Ղեւտացիքն զարքայիւ շուրջ եւ այր իւրաքանչիւր գործի իւր ի ձեռին իւրում, եւ որ մտանիցէ ի տուն մեռցի, եւ եղիցի այն միայն որ ընդ արքայի մտանեն, եւ ելանեն:
8. եւ արարին Ղեւտացիքն այնպէս եւ պատուէր ետ Յուդայէ քահանայապետ այր իւրաքանչիւր ընդ մտանելն շաբաթուն,
9. եւ յելանելն նորա զի ոչ պակասեցոյց Յուդայէ քահանայապետ շաբաթաւորս զհարիւրապետսն կարգեալս եւ կազմեալս նիզակաւքն եւ ասպարաւքն, եւ զամենայն զզէն արքայի Դաւթի որ էր ի տան Տեառն ետ ցնոսա,
10. եւ կացոյց զամենայն ժողովուրդն այր իւրաքանչիւր զինու հանդերձ յանկենէ անտի տանն աջակողմն կուզին մինչչեւ յանկիւն տանն ձախակողմ կուսի սեղանոյն, եւ ի տաճարի անդ շուրջ զարքայիւ,
11. եւ ած եհան Յուդայէ զորդին արքայի եւ ետ ի նա զթագաւորութիւնն եւ զվկայութիւնն եւ թագաւորեցուցին զնա, եւ աւծ զնա Յուդայէ եւ որդիքն իւր, եւ ասեն. Յաւիտեան կացցէ արքայ,
12. եւ իբրեւ լուաւ զայն բարբառ Գոթողիայ, եւ ժողովրդեանն զամբոխն զի վեր ի վայր սուր հային եւ աւրհնէին եւ ընդ նոսա թագաւորն եկն եմուտ առ արքայ ի տուն Տեառն,
13. եւ ետես անդ զարքայ զի հաստատեալ կայր առ սեանն եւ ի մտի դրանն իշխանք եւ փողքն աւրհնութեան եւ իշխանքն շուրջ զարքայիւ եւ յամենայն ժողովուրդքն ցնծացեալք փողովք, եւ երգովք սրնգաց եւ երգիչքն եւ աւրհնիչք պատառեալ զպատմուճան իւր եւ ի ձայն բարձր ճիչ կալաւ եւ ասէ. Դաւ է դաւ է:
14. եւ ել ի դուս յարքայէ քահանայ Տեառն եւ հրաման ետ հարիւրապետացն եւ զաւրագլխացն զաւրուցն եւ ասէ ցնոսա. Հանէք զնա ի բաց ի տաճարէ աստի, եւ երթայք զհետ դորա ի դուրս եւ անդ արտաքոյ մեռցի դա սրով զի այսպէս հրամայեալ էր քահանայապետիցն. Մի ոք եթէ մեռցի ի ներքս ի տաճարին Տեառն,
15. եւ թոյլ ետ նմա եւ ձեռն արկին ի նա եւ ածին հանին ի դուռն հեծելոց տանն արքունի եւ անդէն սպանին զնա:
16. եւ անդէն ի նմին տեղւոջ ուխտ եդին դաշինս կռեցին ի մէջ ժողովրդեանն եւ ի մէջ արքայի զի եղիցին նոքա այնուհետեւ ժողովուրդ տեառն Աստուծոյ,
17. եւ եկն եմուտ ամենայն ժողովուրդն երկրին ի տունն Բահաղու եւ կործանեցին զնա եւ զբագինս նորայ, եւ զպատկերս նորա մանրեցին, եւ զՄատկթանն զքուրմն Բահաղու սպանին առաջի բագնաց նոցա,
18. եւ ետ Յուդայէ զայցելութիւն տանն Տեառն ի ձեռն քահանայիցն եւ Ղեւտացւոց եւ կանգնեաց նա զշաբաթապահսն քահանայիցն եւ զՂեւտացւոց որպէս եւ հրաման ետ Տէր Դաւթի ի վերայ տանն Տեառն մատուցանել ընդ ողջակէզս պատարագ որպէս եւ գրեալ է յաւրէնս Մովսէսի ուրախութեամբ ցնծութեամբ ի ձայն երգոց ի ձեռն Դաւթի:
19. եւ եկին կացին դարապանքն դրունս տան Տեառն եւ ոչ էր հնար մտանել ամենայն որ արատաւոր էր ընդ ամենայն ժողովուրդն
20. եւ առին զհարիւրապետսն եւ զիշխանս եւ զզաւրագլուխս, զաւրացն զամենայն ժողովս երկրին, եւ ածին հանին զթագաւորն ի տաճարն Տեառն Աստուծոյ, եւ եկն եմուտ ընդ ներքին դուռն թագաւորութեանն եւ նստուցին զարքայ յաթոռ թագաւորութեան:
21. եւ ուրախ եղեն ուրախութիւն մեծ ամենայն ժողով երկրին եւ դադարեաց քաղաքն իբրեւ զԳոթողիայ սպանին սուսերաւ:
Հաղորդում կայքում սխալի վերաբերյալ
Տվյալ հատվածում առկա է սխալ: