Գլուխ 24

   
1. Եւ Յովաս էր այր ամաց իբրեւ եւթն զի եղեւ թագաւոր եւ ամս քառասուն կալաւ զթագաւորութիւնն Երուսաղէմի, եւ անուն մաւր նորա Սաբիայ ի Բերսաբեէայ,

2. եւ գնայր ուղղութեամբ Յովաս զամենայն աւուրս կենաց Յուդայէ քահանայապետի:

3. եւ առ Յովաս երկու կանայս եւ եղեն նորա ուստերք եւ դստերք:

4. Եւ եղեւ յետ այսորիկ եդ ի սրտի իւրում հանդես առնել տանն Տեառն:

5. եւ ժողովեցին զքահանայապետսն, եւ զՂեւտացիս եւ ասէ ցնոսա. Ելէք դուք ընդ ամենայն քաղաքսդ Յուդայ եւ ժողովեցէք յամենայն Իսրայէղ արծաթ զի հաստատեսցի տունն տեառն Աստուծոյ Իսրայէղի կանխաւ ամ յամէ, եւ դուք երագեցէք խաւսել ընդ ժողովրդեանդ եւ ոչ երագեցին Ղեւտացիքն:

6. ապա կոչեաց արքայ զՅուդայէ, եւ զիշխանսն եւ ասէ ցնա. Ընդէր չար արեր խնդիր վասն Ղեւտացւոցն բերել ի տուն Տեառն յԵրուսաղէմէ Յուդայ զսակ մտին որ հրամայեալ էր Մովսէսի առն Աստուծոյ: Ի ժամանակին իբրեւ ժողովեաց զԻսրայէղ ի վրան ժամուն յանապատի ան:

7. Զի Գոթողիայ անաւրէն եւ որդիք նորա, զի կողոպտեցին զերծին զտուն Աստուծոյ, եւ զնուէրսն ամենայն տանն Տեառն տարան եդին կռոցն Բահաղու

8. եւ արդ` արասցէ տապանակ մի եւ դիցէ առ դրան տանն Տեառն արտաքոյ

9. եւ քարոզ կարդասցի ընդ ամենայն Յուդայ եւ Երուսաղէմ գալ բերել տեառն Աստուծոյ որպէս եւ ասաց Մովսէս ծառայ Տեառն յանապատի անտ,

10. եւ իբրեւ լուան ուրախ եղն ամենայն իշխանքն եւ ամենայն ժողովուրդն եւ բերէին արկանէին ի տապանակ անդր մինչչեւ լցաւ,

11. եւ լինէր իբրեւ բերէին զտապանակն առ իշխանսն թագաւորին ի ձեռն Ղեւտացւոցն: Եւ իբրեւ տեսանէին եթէ լցաւ արծաթն գայր դպրապետն արքունի եւ իշխանն մեծ ի քահանայապետին թափէին զտապանակն եւ բառնային եւ անդէն դնէին եւ այնպէս առնէին աւրստաւրէ եւ ժողովեցին արծաթ բազում:

12. եւ եդ զարծաթն արքայ եւ Յուդայ եւ քահանայապետն ի գործ տարազու տաճարին Տեառն, ուր գործէին եւ ունէին ի վարձու քարկուռս, եւ հիւսունս եւ առ նոսին դարբինս եւ ճարտարապետս պղնձոյ եւ երկաթոյ, զի հանդերձեսցեն զտունն Տեառն, եւ գործէին որ գործէին զգործ Տեառն:

13. Եւ բարձրանայր գործն ի ձեռս նոցա, եւ կազմեր հանդերձէր տունն Տեառն ի վերայ կացութեանն նորայ, եւ լինէր զգուշութիւն յոյժ,

14. եւ իբրեւ կատարէին զգործ տանն Տեառն գային բերէին զմնացորդս արծաթոյն առ արքայ եւ առ Յուդայէ եւ առնէին զայն ի սպաս տան Տեառն անաւթս պաշտաման ողջակիզաց եւ պատարագաց, եւ խնկաղացս եւ ի բաժակս եւ ի ճաշակս եւ այսպէս առնէին ամենայն աւուրց կենաց Յուդայէի,

15. եւ ծերացաւ Յուդայէ եւ էր լի աւուրբք եւ մեռաւ Յուդայէ եւ էին ամք նորա հարիւր երեսուն զի մեռաւ.

16. եւ թաղեցին զնա ի քաղաքին Դաւթի ընդ թագաւորսն զի արար նա բարիս յԵրուսաղէմ եւ ընդ Իսրայէղի եւ ի մէջ Աստուծոյ եւ ի մէջ տան նորա:

17. Եւ եղեւ յետ մահուանն Յուդայեայ ժողովեցան իշխանքն Յուդայ եւ եկին մտին երկիր պագին արքայի եւ շրջեցին զմիտս Յովասու արքայի ապա ունկնդիր եղեւ արքայ նոցա:

18. եւ թողին նոքա զտուն տեառն Աստուծոյ հարցն իւրեանց եւ պաշտեցին նոքա զաստղն կռոցն սնոտեաց, եւ եղեւ բարկութիւն Տեառն ի վերայ Յուդայ եւ ի վերա Երուսաղէմի յաւուրսն յայնոսին:

19. եւ առաքեաց տէր Աստուած մարգարէս զի դարձուսցեն զնոսա առ տէր Աստուած, եւ դիցեն նոցա ուխտս վկայութեան եւ ոչ լուան,

20. եւ ոգի Տեառն վառեաց զԶաքարիայ Յուդայեանց քահանայապետին եկն եհաս ի վերայ ժողովրդեանն եւ ասէ ցնոսա. Այսպէս ասէ Տէր. Ընդէ՞ր դուք անցանէք զանցանէք զպատուիրանաւք Տեառն եւ ոչ աջողի ձեզ զի թողէք դուք զտէր Աստուած, եւ նա լքցէ զձեզ,

21. եւ նոքա յարեան ի վերա նորա, եւ քարկոծ առնէին զնա քարամք պատուիրանաւ Յովասու արքայի ի սրահին Տեառն:

22. եւ ոչ յիշեաց Յովաս արքայ զողորմ զոր արար Տէր ընդ նա, եւ Յուդայէ հայր նորա եւ սպանին զնայ յետ նորա, եւ իբրեւ մեռանէրն ասէ. Տեսցէ Տէր եւ դատեսցի:

23. եւ եղեւ ընդ կատարել տարւոյն, եկին հասին զաւրք Ասորոց ի վերայ Յովասու, եւ առին զՅուդայ եւ զԵրուսաղէմ եւ սատակեցին զամենայն իշխանս նոցա, եւ զամենայն զառ զապուր զաւարին առին եւ ետուն տանել ի Դամասկոս թագաւորին իւրեանց.

24. զի սակաւ ինչ զաւրաւք եկեալ էին նոքա ի վերայ նոցա բազմաց եւ Տէր մատնեաց զնոսա ի ձեռս նոցա:

25. եւ զդատաստանն զայն զոր ասաց մարգարէն, եւ մինչդեռ էին յայսմ չափու լքին զնա ի բաց կացին, եւ նա էր անկեալ ի հիւանդութիւնս մեծամեծս, եւ եկին հասան ի վերայ Յովասու ծառայքն իւր վասն արեանցն որդւոցն Յուդայէ քահանայապետին եւ անդէն սպանին եւ մեռաւ եւ թաղեցին զնա ի քաղաքին Դաւթի եւ ոչ թաղեցին զնա ի գերեզմանս թագաւորացն:

26. եւ որ հարանն ի վերայ նորա Զաբաադ որդի Սամաադու ի Սոմանիտացւոց անտի,

27. եւ որդիք նորա հինգ հասին ի վերա նորա հնգեքին եւ բազում ինչ մթերս ի վերա նորա դնէին: Այլ սկիզբն տանն Աստուծոյ եւ այլ ճառք բանից աւասիկ գրեալ են ի գիրս ճառից թագաւորացն:  Եւ թագաւորեաց Ամեսիա որդի նորա փոխանակ նորա: