Գլուխ 5

   
1․ Եւ կատարեաց զամենայն գործսն Սողոմովն արքայ: Եւ առեալ բերէր Սողոմովն զայն ամենայն նուէրս Դաւթի հաւր իւրոյ զոսկիս եւ զարծաթս, զկահ եւ զկարասի դնել ի տան գանձի տանն Տեառն:

2․ Յայնմ ժամանակի ժողով հրամայէր առնել Սողոմովն ամենայն ծերակոյտ ժողովրդեան Իսրայէղացւոց եւ անդ ժողովէին ամենայն իշխանք եւ պետք զաւրավարք եւ նահապետք եւ զաւրագլուխք ազգաց ազգաց որդւոցն Իսրայէղի յԵրուսաղէմ, զի ելցեն բերցեն զտապանակն կտակարանաց Տեառն ի քաղաքէն Դաւթի, այսինքն` Սիոն:

3․ Եւ ժողովեցան ամենայն ժողովքն առ արքա Սողովմոն ամենայն ազգ Իսրայէղեան ի տաւսն տարիկալնին, այսինքն` է ամիս եւթներորդ:

4․ եւ առեալ մատուցին ամենայն Ղեւտացիքն զտապանակն կտակարանաց

5․ եւ զվրան ժամուն եւ զամենայն կահ եւ կարասի նուիրեալ ի վրան ժամու անդր բերէին յԵրուսաղէմ:

6․ Եւ արքայ Սողոմովն եւ ամենայն ժողովք զաւրացն Իսրայէղացւոց երկիւղածք որ ժողովեալ էին ի նա, զոհէին զոհս զուարակս եւ խոյս եւ նոխազս, որոց ոչ գոյր թիւ բազմութեան համարոյն նոցա:

7․ եւ բերէին քահանայքն զտապանակն կտակարանաց Տեառն ի տեղի իւր ի Դաբիր ի տան սրբոյն սրբոց ի ներքոյ Քրովբէիցն

8․ եւ անդ էին Քրովբէքն թռուցեալ տարածեալ զթեւս իւրեանց ի վերայ տեղւոյն տապանակին: եւ ծածկէին Քրովբէքն զտապանակն, մերձեցեալ պատեալ Քրովբէքն զտապանակաւն,

9․ եւ ի վերայ ունելեացն լամպաւորացն եւ էին լամբաւորքն ի վեր քան զտապանակն

10․ եւ ոչ երեւէին գլուխք լամպաւորացն ի սրբոյն սրբոց եւ ի տապանակէ անտի ընդ դէմ Դաբիրայ եւ արտաքս ինչ ոչ երեւէին եւ անգէին զտապանակաւն զամենայն աւուրս կենաց իւրեանց եւ անդ ի ներքս ի տապանակի անդ այլ ինչ ոչ կայր բայց միայն տախտակք երկու զոր եդ Մովսէս ի նմա ի լերինն ի Քորէբ, որ մի անգամ պատուիրեալ էր նմա տեառն Աստուծոյ որդւովքն հանդերձ Իսրայէղի իբրեւ ելանէին նոքա յերկրէն Եգիպտացւոց:

11․ Եւ եղեւ իբրեւ ելին քահանայքն ի սրբոյն սրբոց զի էին ամենեքեան նուիրեալք եւ ոչ էին ընտրել կարգ ըստ կարգի շաբաթաւուրութեան,

12․ եւ Ղեւտացիքն որդովքն հանդերձ Ասափայ երգիչն Եման, եւ Իդիթովմ որդւովք եւ եղբարբք իւրեանց հանդերձ ի հանդերձ բեհեզեղէն ի փողս եւ ի քնարս եւ ի թմբուկ առաջի սեղանոյն, եւ ընդ նոսին քահանայք հարիւր եւ քսան փողովք իւրեանց հանդերձ:

13․ եւ լինէր ձայն փողոյն ի հարկանել զփողս իւրեանց ելանէր ձայն մի բարբառոյ միաբանութեամբ ի խոստովանելն առաջի տեառն Աստուծոյ, եւ իբրեւ ամբառնային զձայնս իւրեանց ի ձայն փողոյն եւ քնարին եւ թմբկին եւ ի ձայն աւրհնութեան ասէին առ հասարակ: Խոստովան եղերուք Տեառն զի բարի է, զի յաւիտեան է ողորմ նորա, եւ տունն առ հասարակ լի լինէր ամպաւքն եւ փառաւքն Տեառն,

14․ եւ ոչ հանդարտ էին քահանայքն կալ առաջի երեսաց ամպոյն զի եղեւ տունն փառաւքն Աստուծոյ: