Գլուխ 7

   
1․ Եւ իբրեւ կատարեաց Սողոմոն զաղաւթս իւր, էջ հուրն յերկնից եւ լափեաց զամենայն ողջակէզս եւ զպատարագս առհասարակ, եւ փառք Տեառն լցին զտունն:

2․ եւ ոչ կարէին քահանայքն մտանել ի տունն Տեառն,  ել ի փառքն Տեառն լցին զտաճարն:

3․ եւ ամենայն որդիքն Իսրայէղի տեսանէին զի իջանէր հուրն եւ լափէր զպատարագսն, եւ փառք Տեառն ի վերայ տաճարին, եւ անկանէին ամենայն ժողովուրդքն յերկիր ի վերայ երեսաց իւրեանց ի վերայ կճեա ատարած սալայարկ յատակացն, երկիր պագանէին եւ աւրհնէին զԱստուած զի բարի է ասեն զի յաւիտեան է ողորմ նորա:

4․ Եւ թագաւորն եւ ամենայն ժողովուրդն մատուցանէին զողջակէզսն տեառն Աստուծոյ:

5․ Զուարակս քսան եւ երկու հազարս եւ նոխազս քսան եւ երկու հազարս եւ արար զնաւակատիս տաճարին, թագաւորն եւ ամենայն զաւրք իւր, որ հասեալ կային յիւրաքանչիւր տեղոջ,

6․ եւ քահանայքն փողովք եւ թմբկաւք առաջի Տեառն զոր արար Դաւիթ արքայ. խոստովան լինել զի բարի է ասել զի յաւիտեան է ողորմ նորա, եւ աւրհնութիւն ի Դաւիթ ի ձեռն նոցա, եւ քահանայքն աւրհնէին ի ձայն փողոյ, եւ ժողովուրդն կայր հաստատեալ յիւրաքանչիւր տեղւոջ:

7․ Ապա սրբեաց Սողոմովն զմիջոց սրահի տանն Տեառն զի անդ մատուցին զողջակէզսն եւ զճարպս քաւութեանցն զսեղանն պղնձի զոր արար Սողոմովն մատուցանել զողջակէզսն եւ զճարպս հաշտութեան:

8․ Եւ արար Սողոմովն զտաւն նաւակատեացն ի ժամանակի յայնմիկ զեւթն աւր, եւ ամենայն Իսրայէղ ընդ նմա ի ժողովս մեծ ի մտից սահմանաց Եմաթայ մինչչեւ ի հեղեղատն կողմանցն Եգիպտացւոց:

9․ Եւ արար յաւուրն ութերրորդի զոտն ջեռեայսն զի զեւթն աւր արար զնաւակատիս սեղանոյն, եւ զեւթն աւր արար զտաւն տարեկանացն,

10․ եւ յաւուր քսաներրորդի իններրորդի, եւթներորդ ամսեանն, արձակեաց Սողովոմովն, զժողովուրդն յիւր տեղիս լի ամենայն ուրախութեամբ զուարթացեալ սրտիւք ի վերայ ամենայն զոր արար տէր Աստուած Դաւթի եւ Սողոմովնոյ որդւոյ նորա եւ Իսրայէղի ժողովրդեան իւրոյ:

11․ Եւ կատարեաց Սողովմովն զտունն Տեառն եւ զտուն արքայութեան իւրոյ, եւ զամենայն կամս զոր կամեցաւ Սողոմովն առնել ի տան Տեառն, եւ ի տան անձին իւրոյ յաջողեցաւ նմա:

12․ Ապա երեւեցաւ Տէր տերանց Սողոմովնի ի տեսլեալ եւ ասէ ցնա. Ահա լուա աղաւթից քոց եւ ընտրեցի ես ինձ ի տեղւոջ յայսմիկ տուն պատարագաց,

13․ արդ` եթէ ածից կարգեցից փակեցից զերկինս եւ տաց հրաման մարախոյ ուտել սպառել զերկիր

14․ եւ եթէ առաքեցից զմարդամահ յերկիր ժողովրդեան իմոյ, եւ դոքա սարսեսցեն յինէն եւ դարձցին խնդրեսցեն զերեսս իմ եւ դարձին այր իւրաքանչիւր ի չարեաց իւրեանց եւ ես լուայց նոցա յերկնից եւ հաշտեցայց նոցա եւ քաւեցից զմեղս նոցա, եւ բժշկեցից զերկիր նոցա:

15․ եւ արդ` աչք իմ եղիցի բաց եւ ականջք իմ ի լսել աղաւթից տեղւոյս այսորիկ,

16․ զի ընտրեցի սրբեցի զտունս զայս, զի եղիցի անուն իմ կոչեցեալ ի վերայ դորա եւ աչք իմ եւ սիրտ իմ այդր զամենայն աւուրս կենաց դոցա:

17․ Եւ դու թէ գնասցես առաջի իմ զոր աւրինակ գնայր Դաւիթ հայր քո եւ արասցես դու զամենայն որ ինչ պատուիրեցի քեզ, զի պահեսցես դու զիրաւունս իմ, եւ զարդարութիւնս իմ:

18․ հաստատեցից զաթոռ թագաւորութեան քո որպէս ուխտ եդի Դաւթի հաւր քո, եւ ասեմ եթէ մի պակեսցէ ի քէն այր իշխան յԻսրայէղէ:

19․ Ապա եթէ դարձջիք դուք եւ թողջիք զհրամանս իմ եւ զպատուիրանս իմ զոր եդի ես առաջի ձեր, եւ գնասջիք դուք պաշտել զդիս աւտարոտիս, եւ երկիր պագանիցէք սնոտեաց.

20․ սատակեցից ջնջեցից յերկրէ զոր ետու ձեզ, եւ զտունդ զոր սրբեցի յանուն իմ ի բաց թաւթափեցից յերեսաց իմոց, եւ արարից զնա առակ աւրինակ խայտառակութեան ընդ ամենայն ազգս,

21․ եւ տունս այս որ ի բարձր շինեցաւ կործանեսցի եւ ամենայն անցաւորք որ առ դովաւ անցանիցեն զարմանայցեն:

22․ եւ ասիցեն. Եթէ ընդէ՞ր արար Աստուած ընդ երկիրս ընդ այս եւ ընդ տունս ընդ այս եւ ասիցեն ոմանք ցնոսա. Փոխանակ զի թողին զԱստուած հարցն իւրեանց որ եհան զնոսա յերկրէն Եգիպտացւոց, եւ չոգան նոքա զհետ դիցն աւտարաւտւոց երկիր պագին նոցա եւ ծառայեցին նոցա, վասն այսորիկ ած զայս ամենայն չարիս ի վերայ դոցա: