1. Եւ այլազգիք հասեալ պատերազմ տային ընդ Իսրայէղ եւ ի փախուստ դառնայր գունդն Իսրայէղեան յերեսաց այլազգեաց
2. եւ զհետ մտեալ էին այլազգիքն Շաւուղի եւ որդոց նորա եւ հարին այլազգիքն զՅովնաթան, եւ զԱմինադաբն, եւ զՄիսուէն զորդիսն Շաւուղի
3. եւ ծանրացաւ պատերազմ ի վերայ Շաւուղի, եւ եկին հասին նմա աղեղնաւորք եւ արգելին զնա:
4. Խաւսել սկսաւ Շաւուղ ընդ զինպետին իւրում եւ ասէ առ ի վեր զսուսեր քո եւ սպան զիս, զի մի եկեսցեն հասցեն անթլփատքն եւ խաղ առնիցեն զիս, եւ ոչ կամէր առնել նա զհրամանն Շաւուղի, զի երկնչէր յոյժ, ապա եհան Սաւուղ զսուսեր իւր եւ զիւրովի չոգաւ:
5. Իբրեւ ետես զինպետն եթէ մեռաւ Շաւուղ, ել եւ ինքն ընդ սուր իւր եւ անդէն մեռաւ.
6. մեռաւ սաւուղ եւ երեքին որդիք նորա յաւուր յայնմիկ եւ ամենայն տուն նորա միանգամայն սատակեցան:
7. Իբրեւ տեսին ամենայն այր Իսրայէղեան որ ի հովիտս անդ էին, եթէ փախեաւ գունդն Իսրայէղացւոց, եւ մեռաւ Սաւուղ եւ որդիք իւր, թողին զիւրաքանչիւր քաղաքս եւ փախեան, եւ եկին այլազգիքն եւ մտին բնակեցան անդէն ի նոսա:
8. Եւ եղեւ ի վաղիւ անդր եկին իջին ի տեղի պատերազմին դիակապուտ լիել այլազգիքն, եւ եկին գտին զՇաւուղ եւ զորդիսն անկեալ ի մէջ դիականցն ի լերինն Գեղբուէ:
9. Մերկացին զնոսա եւ առին զզէնս նոցա յիւրեանս եւ հատին զգլուխ նորայ եւ առաքեցին ընդ ամենայն կողմանս այլազգեաց: Եւ յղեցին աւետարանս ընդ ամենայն կուռս պաշտամանց նոցա,
10. եւ տարան եդին զզէնն եւ զգլուխն ի մեհեանս իւրեանց ի տանն Դեգոնայ:
11. Եւ լուան շուրջ բնակիչքն յԱբիս Գաղաադ զամենայն գործս զոր գործեցին այլազգիքն ընդ Շաւուղ եւ ընդ որդիսն, եւ ընդ Իսրայէղ,
12. յարեան վաղվաղակի իջին Գաղգաղայ եւ առին զդիակունս Շաւուղի եւ զորդւոցն եւ բերին թաղեցին զոսկերս նոցա ընդ կաղնեաւն յաղիս եւ անդ նստան լացին աւուրս եւթ:
13. Արդ մեռաւ Սաւուղ յանաւրէնութեան իւրում զոր արար առաջի Տեառն, զի ոչ պահեաց նա զհրամանն Տեառն, եւ երթել հարցանէր նա զվոհուկսն եւ խնդրէր ի նմանէն, եւ Սամուէլ մարգարէն խաւսէր ընդ նմա,
14. եւ նա ոչ խնդրէր ի Տեառնէ, արդ սպան զնա Տէր, եւ դարձոյց զարքայութիւն ի Դաւիթ յորդի Յեսսեա:
Հաղորդում կայքում սխալի վերաբերյալ
Տվյալ հատվածում առկա է սխալ: