Գլուխ 19

   
1․ Եւ եղեւ յետ այսորիկ իբրեւ մեռաւ Նաաս արքայ որդւոցն Ամովնայ, եւ թագաւորեաց Անան որդի նորա ընդ նորա:

2․ Խաւսել սկսաւ Դաւիթ եւ ասէ. Եկայք արասցուք եւ մեք ազատութիւն ընդ Անանու որդւոյ Նաասու, որպէս արար հայր նորա առ մեզ ազատութիւն: Եւ առաքեաց հրեշտակս առ Անան մխիթարել զնա վասն հաւր իւրոյ: Եւ եկին ծառայք Դաւթի յերկիրն որդւոցն Ամովնայ առ Անան Մխիթարել զնա:

3․ Եւ մատեան իշխանք որդւոցն Ամովնայ առ Անան եւ ասեն ցնա: Մի թէ փառաւորել ինչ յղեաց Դաւիթ զհայր քո առաջի աչաց քոց, ոչ զի քննեսցեն եւ դիտեսցեն, եւ լրտեսեսցեն զքաղաքս քո ծառայք իւր:

4․ Եւ յղեաց Անան զծառայ իւր, եւ կալան զծառայսն Դաւթի, գերծին զհերս եւ հատին զդրաւշակս, եւ արձակեցին զնոսա անդրէն,

5․ եւ լու եղեւ Դաւթի արքայի վասն ծառայից իւրոց, զի էին այնպէս անարգեալ յոյժ յղեաց ընդ առաջ նոցա եւ ասէ ցնոսա, նստարուք դուք այդրէն յերիքով մինչչեւ բուսցին հերք ձեր, եւ ի չափ հասցեն եւ ապա եկեսջիք եւ նստան անդ որպէս եւ հրամայեաց նոցա:

6․ Ապա իբրեւ տեսին որդիքն Ամովնայ, եւ Անան արքայ իւրեանց առեալ հազար քանքար արծաթոյ եւ խնդրեցին վարձու զասորիսն միջագետաց, զասորիսն Մաաքայ եւ զասորիսն ի Սոբաա, եւ Կառս հեծեալս

7․ երիւարաւք հազարս: Եւ զԲաամաք արքայ զաւրաւք իւրովք եւ եկին պատրաստեցան կացին ի գործ պատերազմի ի Միտաբա, եւ որդիքն Ամովնայ ժողովեցան յիւրաքանչիւր քաղաքացն ի պատերազմ:

8․ Եւ իբրեւ լուաւ Դաւիթ առաքեաց նա զՅովաբ սպարապետն, եւ զամենայն զաւրս իւր,

9․ ապա ելին որդիքն Ամովնա, կարգեցան պատրաստեցան ի գործ պատերազմի առ դրան քաղաքին, եւ թագաւորքն որ եկեալ էին ճակատեցան ի դաշտին անդ առանձինն, եւ իբրեւ հայեցաւ

10․ ետես Յովաբ եթէ պատրաստեցան, կազմեցան, ճակատեցան, համարձակեցան ընդդէմ ունել նորա, զկնի եւ առաջի առհասարակ, ընդրեալ իւր ընդիր ընդիր երիտասարդացն Իսրայեղացւոց: Եւ կազմեցաւ պատրաստեցաւ, ճակատեցաւ ընդդէմ ասորեստանեաց,

11․ եւ զայլ ամենայն զաւրսն ետ ի ձեռն Աբեսայ եղբաւր իւրոյ, եւ կարգեաց ճակատեցոյց ընդդէմ որդւոցն Ամովնայ:

12․ Եւ ասէ Յովաբ զեղբարս իւր, եթէ իցէ զաւրասցի ինչ քան զիս, եւ յաղթահարեսցէ զիս Ասորեստանայն, ձեռն տուեալ ինձ վաղվաղակի ի թիկունս հասանիջիք, ապա թէ իցէ զաւրասցի ինչ ի վերայ քո Ամոնացին եւ յաղթահարեսցէ զքեզ ձեռն առեալ քեզ անդէն վաղվաղակի ի թիկունս հասից

13․ հապա քաջալերեաց, ժիր լիցուք ի վերա զաւրաց քաղաքաց յատակաց երկրին Աստուծոյ մերոյ, եւ Տէր որ ինչ բարի իցէ առաջի աչաց իւրոց զայն կատարեսցէ:

14․ Եւ ճակատեցաւ Յովաբ գնդաւն իւրով ընդդէմ ասորեստանեացն, եւ իբրեւ պատրաստեցաւ յարձակել, ի փախուստ եղեւ Ասորեստանայն,

15․ եւ չոգան ամրացան ի քաղաք եւ Յովաբ զկնի նոցա,

16․ եւ իբրեւ ետես ասորին, եթէ յաղթահարեցաւ յԻսրայէլացւոյ անտի: Դեսպանս արձակէր վաղվաղակի, հանէր զասորեստանայն որ յայնկոյս գետոյն էր եւ Սոփաք սպարապետն Ադրազադարու առաջնորդ նոցա

17․ եւ ժողովեաց Դաւիթ զամենայն Իսրայէղ եւ անց ընդ գետն Յորդանան գալ ի վերայ նոցա, եհաս, կազմեցաւ, պատրաստեցաւ, ճակատեցաւ ի գործ պատերազմի, դէմ յանդիման ասորեստանեացն:

18․ Անդէն վաղվաղակի փախուստ լինէր ասորեստանեացն յերեսացն Իսրայէղացւոցն, եւ հասանէր հարկանէր վանէր Դաւիթ ի զաւրաց անտի ասորեստանեացն եւթն հազարս: Եւ քառասուն հազար այր եւ զՍոփաք սպարապետն զաւրաց Ադրազադարու, անդէն սպանանէր,

19․ եւ տեսին ծառայքն Ադրազադարու թէ բեկան առաջի երեսացն Իսրայէղացւոց, ուխտ եդին, դաշինս կռեցին, եթէ այլ ոչ եկեսցուք ի թիկունս որդւոցն Ամովնայ եւ ինքեանք ի ծառայութիւն մտին Դաւթի: