Գլուխ 13

   
1․ Ապա խորհուրդ կալաւ Դաւիթ ընդ ծերակոյտս ժողովրդեանն, ընդ հազարաւորս ընդ բիւրաւորս

2․ եւ ասէ. Եթէ հաճոյ իցէ ամենայն ժողովրդեանդ Իսրայէլի զմտաւ ածէք, զի ի Տեառնէ Աստուծոյ մերմէ յաջողեցաւ մեզ այս ամենայն, եկայք առաքեսցիւք առ մնացորդս տանն Իսրայէղի ընդ ամենայն երկիր առ ամենայն եղբարս մեր զի իցեն նոքա քահանայք եւ Ղեւտացիք ի քաղաքս քաղաքս իւրաքանչիւր ի բնակութեան, զի եկեսցեն ժողովեսցին առ մեզ,

3․ եւ դարձուսցուք մեք զտապանակն կտակարանաց Տեառն Աստուծոյ մերոյ առ մեզ, զի ոչինչ եղեւ նմա խնդիր երբեք յամս յաւուրս Շաւուղի:

4․ Ետուն պատասխանի ամենայն զաւրքն եւ ասեն. Այո ուղիղ բարի է բանդ յաչս ամեայն ժողովրդեանս եղիցի այդպէս:

5․ Եւ հրաման ետ Դաւիթ ժողովել ամենայն Իսրայէղացւոցն յիւրաքանչիւր ի սահմանաց անտի եգիպտացւոց մինչ ի մուտս Եմաթու զի եկեսցեն բարձցեն զտապանակն կտակարանացն ի քաղաքէ անտի Յարիմ,

6․ եւ եկին հասին Դաւիթ եւ ամենայն զաւրքն ի Կարիաթարիմ. ածել անտի զտապանակն կտակարանաց Տեառն Աստուծոյ որ նստի ի քերովբէս զի կոչեցաւ անուն նորա անդ

7․ ի վերայ նորոյ սայլի, ի տանէ անտի Ամենադաբ եւ Ոզիայ եւ եղբարք նոցուն ածին զնոսա

8․ եւ Դաւիթ եւ այմենայն Իսրայէղ գային առաջի, ամենայն զաւրաւք իւրեանց խաղալով, խնդալով փողովք, եւ երգովք, եւ թմբկաւք,

9․ եւ եկին հասին մինչչեւ ի կալն ի Քեղովն: Եւ ձգեաց զձեռն իւր Ոզիայ բուռն հարկանել զտապանակէն, զի թիւրեաց իմն անդ զուարակն,

10․ բարկացաւ սրտմտութեամբ Տէր ի վերայ Ոզիայ եւ անդէն սատակեաց զնա, զի իշխեաց ձգել զձեռն իւր, բուռն հարկանել զտապանակէն եւ անդէն մեռաւ Ոզիայ առաջի Աստուծոյ:

11․ Եւ տրտմեցաւ Դաւիթ յոյժ, զի եղեն հարուածքն այն ի Տեառնէ ի վերայ Ոզիայ, եւ կոչեաց զանուն տեղոյն այնորիկ հարուածք Ոզիայ:

12․ Եւ երկեաւ Դաւիթ ի Տեառնէ յաւուր յայնմիկ եւ ասէ, զիարդ մարթացից դադարեցուցանել զտապանակն Տեառն առ իս,

13․ եւ ոչ իջոյց Դաւիթ զտապանակն կտակարանաց Տեառն Աստուծոյ ի քաղաքն Դաւթի, այլ դարձոյց զնա ի տուն Աբեդադանայ Գեթացւոյ,

14․ անդ հանգեաւ տապանակն կտակարանաց ի տան Աբեղդանայ ամիսս երիս, եւ աւրհնեաց Տէր զտունն Աբեղդանայ եւ զամենայն ինչս եւ զստացածս նորա: